ក្រុមគ្រូពេទ្យរបស់មន្ទីរពេទ្យបេះដូង Fuwai ខេត្តយូណាន និងមន្ទីរពេទ្យមិត្តភាពកម្ពុជា-ចិន ព្រះកុសុមៈ ប្រទេសកម្ពុជា បានសហការគ្នាចុះពិនិត្យ និងព្យាបាលជូនកុមារដែលមានជំងឺបេះដូងពីកំណើតដោយឥតគិតថ្លៃ ក្នុងឃុំត្បែង និងឃុំរំចេក ស្រុកបន្ទាយស្រី ខេត្តសៀមរាប ដើម្បីស្វែងរកកុមារដែលមានជំងឺបេះដូងចំហពីកំណើត ដើម្បីយកទៅព្យាបាលនៅប្រទេសចិន ក្នុងករណីធ្ងន់ និងករណីស្រាលព្យាបាលនៅកម្ពុជា ដោយការចំណាយទាំងអស់ជាមូលនិធិរបស់ប្រទេសចិន ហើយកម្មវិធីនេះធ្វើរយៈពេល២ថ្ងៃ ចាប់ពីថ្ងៃទី៩-១០ ខែធ្នូ ឆ្នាំ២០២៤។
លោកវេជ្ជបណ្ឌិត លូ ជាំង អនុប្រធានមន្ទីរពេទ្យបេះដូងហ្វូវៃ (Fuwai) ខេត្តយូណាន បានឱ្យដឹងថា កាលពីឆ្នាំ២០១៩ ក្រុមគ្រូពេទ្យកម្ពុជា-ចិន បានធ្វើការចុះពិនិត្យសុខភាពបេះដូងជូនដល់សិស្សានុសិស្សម្ដងរួចមកហើយ នៅក្នុងឃុំខ្នារសណ្តាយ ឃុំឃុនរាម និងឃុំព្រះដាក់ ហើយក៏បានជួយព្យាបាល និងវះកាត់ដោយ ជោគជ័យជូនដល់កុមារចំនួន ៥នាក់ផងដែរ។ ចំពោះលើកនេះជាលើកទី២ សម្រាប់សកម្មភាពចុះពិនិត្យនេះ ដើម្បីបន្តស្វែងរកកុមារដែលមានជំងឺបេះដូងពីកំណើត នៅក្នុងស្រុកបន្ទាយស្រី ដើម្បីយកទៅព្យាបាល។ លោកបន្តថា ជំងឺបេះដូងចំហពីកំណើត នៅតែជាជំងឺគំរាមគំហែងទៅដល់សុខភាពរបស់កុមារ បាននាំការឈឺចាប់ទៅដល់គ្រួសាររាប់មិនអស់ ដោយយោងតាមស្ថិតិមានទារកដែលទើប និងកើតប្រមាណ១ភាគរយ ទទួលរងជំងឺបេះដូងពីកំណើត ការពិនិត្យ និងព្យាបាលទាន់ពេលវេលា ជាគន្លឹះនៃការកាត់បន្ថយនៃការគំរាមគំហែងដល់អាយុជីវិតរបស់កុមារ ព្រោះកុមារគឺជាអនាគត នៃសង្គមជាតិ ហើយសុខភាពគឺជាមូលដ្ឋានគ្រឹះនៃការអភិវឌ្ឍ។
ក្នុងឱកាសនោះ លោក លូ ឈីជឺ អគ្គកុងស៊ុលចិនប្រចាំខេត្តសៀមរាប មានប្រសាសន៍ថា សកម្មភាពរបស់ក្រុមគ្រូពេទ្យកម្ពុជា-ចិន ថ្ងៃនេះគឺជាការរឹតចំណងមិត្តភាពចិន-កម្ពុជា ហើយកិច្ចសហប្រតិបត្តិការផ្នែកវេជ្ជសាស្រ្ត និងសុខាភិបាល ជាទំនាក់ទំនងយ៉ាងសំខាន់រវាងប្រទេសទាំងពីរ ការចុះពិនិត្យលើកទីពីរនេះ មិនត្រឹមតែអនុវត្តសកម្មភាពដែលឆ្លើយតប នៃគំនិតផ្ដួចផ្ដើមខ្សែក្រវាត់ និងផ្លូវប៉ុណ្ណោះទេ ថែមទាំងបានរួមគ្នាកសាងសហគមន៍ អនាគតរួមគ្នា បង្ហាញភាពស្និតស្នាលរវាងប្រជាជននៃប្រទេសទាំងពីរ។ លោកសង្ឃឹមថា ក្រោមសកម្មភាពផ្នែកវេជ្ជសាស្រ្ត បច្ចេកវិទ្យាវេជ្ជសាស្រ្តជឿនលឿន បទពិសោធវេជ្ជសាស្រ្តដ៏សម្បូរបែបនៅប្រទេសចិន នឹងត្រូវបាននាំយកមកកម្ពុជា ដើម្បីផ្ដល់អត្ថប្រយោជន៍ដល់អ្នកជំងឺកាន់តែច្រើននៅកម្ពុជា។
លោក រិន ឡូត អភិបាលស្រុកបន្ទាយស្រី មានប្រសាសន៍ថា ស្រុកបន្ទាយស្រី ដោយបានការគាំទ្រពីស្ថានទូតចិនប្រចាំកម្ពុជា រួមនឹងបណ្ដាសង្គមស៊ីវិលចិន ក្រៅពីសកម្មភាពចុះពិនិត្យសុខភាពបេះដូងជូនដល់សិស្សានុសិស្សហើយ ក៏មានសកម្មភាពជាច្រើនទៀតនៅក្នុងស្រុកបន្ទាយស្រី ដែលសកម្មភាពទាំងនេះ គឺជាការរួមចំណែកជាមួយរាជរដ្ឋាភិបាលកម្ពុជា ក្នុងការអភិវឌ្ឍវិស័យសុខាភិបាលនៅតាមតំបន់ជនបទ និងបំពេញបាននូវតម្រូវការជាក់ស្តែងជូនដល់ប្រជាជនកម្ពុជា ស្របទៅនឹងយុទ្ធសាស្ត្របញ្ចកោណដំណាក់កាលទី១ របស់រាជរដ្ឋាភិបាលនីតិកាលទី៧ បានផ្តោតលើការអភិវឌ្ឍមូលធនមនុស្ស ហើយមូលធនមនុស្សនេះមិនអាចកាត់ផ្តាច់បានឡើយពីសុខភាពល្អរបស់កុមារដែលជា ទំពាំងស្នងឬស្សី ជាអ្នកបន្តវេនដ៏ខ្លាំងក្លារបស់កម្ពុជា។
ជាមួយគ្នានោះ ក្រុមគ្រួសារកុមារទាំង៥រូប ដែលបានវះកាត់ជាសះស្បើយកាលពីឆ្នាំ២០១៩ បានថ្លែងអំណរគុណដល់មន្ទីរពេទ្យបេះដូង Fuwai ខេត្តយូណាន និងមន្ទីរពេទ្យមិត្តភាពកម្ពុជា-ចិន ព្រះកុសុមៈ ដែលបានចុះពិនិត្យសុខភាព និងនាំពួកគេទៅព្យាបាលនៅប្រទេសចិន និងបានផ្តល់លទ្ធភាពឱ្យពួកគេមានសុខភាពល្អជាប្រក្រតីឡើងវិញ៕
អត្ថបទ និងរូបភាព៖ លោក ធន់ ពូថេ
កែសម្រួល៖ លោក អ៊ុន ណារាជ្យ
