គណៈកម្មាធិការអន្តរជាតិ សម្របសម្រួល កិច្ចគាំពារ និងអភិវឌ្ឍន៍រមណីយដ្ឋានអង្គរ ហៅកាត់ថា ICC Angkor និងសំបូរព្រៃគុក នៅថ្ងៃទី១១ ខែធ្នូ ឆ្នាំ២០២៤នេះ បានបើកកិច្ចប្រជុំបច្ចេកទេសលើកទី៣៩ និងកិច្ចប្រជុំពេញអង្គលើក៣១ ជាផ្លូវការនៅលើទឹកដីនៃខេត្តសៀមរាប ដោយកិច្ចប្រជុំនេះមានរយៈពេល៣ថ្ងៃ ចាប់ពីថ្ងៃទី១១-១៣ ខែធ្នូ ឆ្នាំ២០២៤ ក្រោមអធិបតីភាព លោកជំទាវបណ្ឌិតសភាចារ្យ ភឿង សកុណា រដ្ឋមន្ត្រីក្រសួងវប្បធម៌ និងវិចិត្រសិល្បៈ និងឯកឧត្ដម សាយ សំអាល់ ឧបនាយករដ្ឋមន្ដ្រី រដ្ឋមន្ត្រីក្រសួងរៀបចំដែនដី នគរូបនីយកម្ម និងសំណង់។
ក្នុងឱកាសនោះ លោកជំទាវបណ្ឌិតសភាចារ្យ ភឿង សកុណា បានថ្លែងអំណរគុណ ដល់អ្នកជំនាញទាំងអស់ដែលមានវត្ដមានក្នុងកិច្ចប្រជុំបច្ចេកទេសលើកទី៣៩ នៅលើទឹកដីសៀមរាបអង្គរ ដែលលោកជំទាវបានចាត់ទុកថា អ្នកចូលរួមកិច្ចប្រជុំនេះ គឺជាមិត្ដភក្ដិដ៏ល្អសម្រាប់អង្គរប្រជុំ ហើយសង្ឃឹមថា កិច្ចប្រជុំនេះ នឹងមានបច្ចេកទេសថ្មី ដើម្បីរួមគ្នាលើការអភិរក្សនិងអភិវឌ្ឍប្រកបដោយចីរភាព។
ជាមួយគ្នានោះ ឯកឧត្ដម ឧបនាយករដ្ឋមន្ដ្រី សាយ សំអាល់ បានបង្ហាញការពេញចិត្ត ចំពោះរដ្ឋាភិបាលប្រទេសបារាំង និងប្រទេសជប៉ុន ដែលបានប្រឹងប្រែងលើកិច្ចការពាររមណីយដ្ឋានអង្គរ។ ឯកឧត្ដមថា រមណីយដ្ឋានអង្គរ គឺជាកន្លែងបុរាណវិទ្យាដែលត្រូវការពារ ដោយសារតែបានចុះក្នុងបញ្ជីបេតិកភណ្ឌពិភលោក កាលពីឆ្នាំ១៩៩២ ហើយតំបន់រមណីយដ្ឋានអង្គរ មានប្រជាពលរដ្ឋខ្មែររស់នៅមានការកើនឡើងជាប្រចាំ ដែលជាសម្ពាធដល់កិច្ចការពារនិងអភិរក្សរបស់អង្គរ។
ឯកឧត្ដមមានប្រសាសន៍បន្ដថា នៅក្នុងតំបន់រមណីយដ្ឋានអង្គរ មានប្រជាពលរដ្ឋរស់នៅចំនួន ១៤០ភូមិ នឹងត្រូវពិភាក្សាជាមួយពួកគាត់ និងបានពិភាក្សា ជាមួយសហការរីអាជ្ញាធរជាតិអប្សរា និងបានដាក់សំណើទៅកិច្ចប្រជុំទីស្ដីការគណៈរដ្ឋមន្ដ្រី ដើម្បីដោះស្រាយបញ្ហាប្រឈមនានា។ មិនត្រឹមតែតំបន់អង្គរប៉ុណ្ណោះទេ គឺយើងបានគិតគូរពីបឹងទន្លេសាបផងដែរ។ ឯកឧត្ដមក៏បានស្នើដល់អង្គការយូនីស្កូ រៀបចំហេដ្ឋារចនាសម្ព័ន្ធ ទឹកភ្លើង ផ្លូវ ខណៈដែលប្រជាពលរដ្ឋនៅជុំវិញរមណីយដ្ឋានអង្គរ គឺជាមនុស្សជាតិរបស់យើង ដែលត្រូវបានគិតគូរពីតម្រូវការរបស់ពួកគាត់។
សូមបញ្ជាក់ថា មុនបើកកិច្ចប្រជុំ ICC Angkor នេះ ក្រុមអ្នកជំនាញការ បានចុះពិនិត្យនិងតាមដាន ការងារនៅតាមការដ្ឋាននានា ក្នុងតំបន់រមណីយដ្ឋានអង្គរ ដើម្បីយកពិភាក្សាជាមួយអ្នកជំនាញនៅក្នុងកិច្ចប្រជុំដែលធ្វើឡើងក្នុងមួយឆ្នាំ ២ដង ជារៀងរាល់ឆ្នាំ។ ចំពោះកិច្ចប្រជុំបច្ចេកទេសលើកទី៣៩នេះ ក្រុមអ្នកជំនាញអន្តរជាតិ នឹងពិនិត្យទៅលើការងារមួយចំនួននៅតាមការដ្ឋានការងារជាតិ និងអន្តរជាតិ ដែលកំពុងតែដំណើរការក្នុងការជួសជុល និងអភិរក្សប្រាសាទបុរាណនានា។ ជាមួយគ្នានេះដែរ ក្រុមអ្នកជំនាញអន្តរជាតិ ក៏នឹងធ្វើការតាមដាននិងផ្ដល់យោបល់បច្ចេកទេស ព្រមទាំងអនុសាសន៍ថ្មីៗបន្ថែមទៀត ដើម្បីឱ្យតាមការដ្ឋានយកទៅអនុវត្តន៍ស្របតាមកិច្ចការដែលកំពុងតែបំពេញនោះ៕
អត្ថបទ និងរូបភាព៖ លោក ឈិត សាវី
កែសម្រួល៖ លោក អ៊ុន ណារាជ្យ
