នាព្រឹកថ្ងៃទី១១ ខែធ្នូ ឆ្នាំ២០២៤នេះ អាជ្ញាធរខេត្តសៀមរាប បានបើកវេទិកាផ្សព្វផ្សាយ និងពិគ្រោះយោបល់របស់ក្រុមប្រឹក្សាខេត្ត អាណត្តិទី៤ ឆ្នាំ២០២៤ សម្រាប់គោលដៅទី១ ស្រុកស្រីស្នំ ក្រោមអធិបតីភាព ឯកឧត្តម លី សំរិទ្ធ ប្រធានក្រុមប្រឹក្សាខេត្ត និង លោក សុខ ថុល អភិបាលរងខេត្ត ដោយមានការចូលរួមពីឯកឧត្តមលោកជំទាវសមាជិកក្រុមប្រឹក្សាខេត្ត ថ្នាក់ដឹកនាំមន្ទីរអង្គភាព អាជ្ញាធរមូលដ្ឋាន លោកគ្រូអ្នកគ្រូ សិស្សានុសិស្ស និងប្រជាពលរដ្ឋជាច្រើនរូប។
ឯកឧត្តម លី សំរិទ្ធ មានប្រសាសន៍ថា វេទិកាផ្សព្វផ្សាយ និងពិគ្រោះយោបល់នាពេលនេះ ធ្វើឡើងក្នុងគោលបំណងផ្ដល់ព័ត៌មានជូនប្រជាពលរដ្ឋអំពីសមិទ្ធផល ដែលក្រុមប្រឹក្សាសម្រេចបានកន្លងមក និងបញ្ហាប្រឈមដែលត្រូវដោះស្រាយបន្ត ទទួលសំណួរ និងសំណូមពររបស់ប្រជាពលរដ្ឋ ដែលជាបញ្ហាជីវភាពប្រចាំថ្ងៃ និងក្ដីកង្វល់នានា ដើម្បីធ្វើការឆ្លើយតប និងដោះស្រាយជូន បង្កើនភាពជិតស្និតរវាងប្រជាពលរដ្ឋ និងអាជ្ញាធរ ដើម្បីឱ្យការផ្ដល់សេវាសាធារណ:នានា ជូនពលរដ្ឋក្នុងមូលដ្ឋានកាន់តែមានភាពល្អប្រសើរ។ ក្នុងន័យនេះ បងប្អូនអាចលើកនូវទុក្ខកង្វល់ បញ្ហាប្រឈម និងសំណូមពររបស់បងប្អូន ដោយផ្ទាល់ និងសរសេរជាក្រដាស ដើម្បីឱ្យក្រុមការងារប្រមូលមកធ្វើការស្រាយបំភ្លឺ ឈានទៅរកដំណោះស្រាយចំគោលដៅ មានប្រសិទ្ធភាព និងទាន់ពេលវេលា។
សូមជម្រាបថា សម្រាប់វេទិកាផ្សព្វផ្សាយនាពេលនេះដែរ ក្រុមការងារបានទទួលសំណួរសំណូមពរមួយចំនួន ជុំវិញបញ្ហាផ្លូវពិបាកធ្វើដំណើរ អគ្គិសនីមិនទាន់មានប្រើគ្រប់ផ្ទះ បញ្ហាគ្រោះថ្នាក់ចរាចរពេលសិស្សចេញពីសាលា រួមនឹងបញ្ហាមួយចំនួនទៀត។ ទៅលើសំណួរសំណូមពរទាំងអស់ មន្ត្រីជំនាញ និងអ្នកពាក់ព័ន្ធ បានធ្វើការស្រាយបំភ្លឺ និងឆ្លើយតប ជូនដល់បងប្អូនប្រជាពលរដ្ឋ ហើយចំពោះបញ្ហាដែលមិនទាន់បានបកស្រាយ ក្រុមការងារនឹងទទួលយកទៅពិនិត្យពិភាក្សា ក្នុងក្របខណ្ឌក្រុមប្រឹក្សាខេត្ត ហើយនឹងធ្វើការឆ្លើយតបជាលាយលក្ខណ៍អក្សរជូនដល់ម្ចាស់សំណួរសំណូមពរ តាមរយៈក្រុមប្រឹក្សាស្រុក ភូមិឃុំ នាពេលឆាប់ៗខាងមុខ។
ថ្លែងបិទអង្គវេទិកា ឯកឧត្តម លី សំរិទ្ធ បានគូសបញ្ជាក់ថា វេទិកានាពេលនេះ ពិតជាមានសារៈសំខាន់ណាស់ ក្នុងការជួយជំរុញដល់ការអនុវត្តមុខងាររបស់អ្នកពាក់ព័ន្ធ រួមនឹងអាជ្ញាធរមូលដ្ឋាន ឱ្យកាន់តែមានប្រសិទ្ធភាព ស្របតាមច្បាប់លិខិតបទដ្ឋានគតិយុត្តនៅថ្នាក់មូលដ្ឋាន។ ក្នុងនោះការពិនិត្យ និងដោះស្រាយបញ្ហា សំណួរសំណូមពររបស់បងប្អូនប្រជាពលរដ្ឋ នឹងជួយជំរុញដល់ការអភិវឌ្ឍសេដ្ឋកិច្ចសង្គម សំដៅលើកកម្ពស់គុណភាពជីវិត កាត់បន្ថយភាពក្រីក្ររបស់បងប្អូនប្រជាពលរដ្ឋ នៅតាមបណ្ដាក្រុងស្រុក នៃខេត្តសៀមរាបទាំងមូលផងដែរ។
សូមជម្រាបថា សម្រាប់ឆ្នាំ២០២៤នេះ ក្រុមប្រឹក្សាខេត្តសៀមរាប នឹងរៀបចំវេទិកាផ្សព្វផ្សាយ និងពិគ្រោះយោបល់ ចំនួន១៣គោលដៅ រួមមាន៖ គោលដៅទី១ ស្រុកស្រីស្នំ, គោលដៅទី២ ស្រុកក្រឡាញ់ នៅថ្ងៃទី១២ ខែធ្នូ, គោលដៅទី៣ ស្រុកពួក នៅថ្ងៃទី១៣ ខែធ្នូ, គោលដៅទី៤ ស្រុកស្វាយលើ នៅថ្ងៃទី១៦ ខែធ្នូ, គោលដៅទី៥ ស្រុកបន្ទាយស្រី នៅថ្ងៃទី១៧ ខែធ្នូ, គោលដៅទី៦ ស្រុកវ៉ារិន នៅថ្ងៃទី១៨ ខែធ្នូ, គោលដៅទី៧ ស្រុកអង្គរជុំ នៅថ្ងៃទី១៩ ខែធ្នូ, គោលដៅទី៨ ស្រុកអង្គរធំ នៅថ្ងៃទី២០ ខែធ្នូ, គោលដៅទី៩ ស្រុកជីក្រែង នៅថ្ងៃទី២៣ ខែធ្នូ, គោលដៅទី១០ ស្រុកសូទ្រនិគម នៅថ្ងៃទី២៤ ខែធ្នូ, គោលដៅទី១១ ក្រុងរុនតាឯកតេជោសែន នៅថ្ងៃទី២៥ ខែធ្នូ, គោលដៅទី១២ ស្រុកប្រាសាទបាគង នៅថ្ងៃទី២៦ ខែធ្នូ និងគោលដៅទី១៣ ក្រុងសៀមរាប នៅថ្ងៃទី២៧ ខែធ្នូ ឆ្នាំ២០២៤៕
អត្ថបទ និងរូបភាព៖ លោក ទ្រា ពន្លឺ
កែសម្រួល៖ លោក អ៊ុន ណារាជ្យ
