យោងតាមលទ្ធផលនៃសិក្សាស្រាវជ្រាវរបស់ធនាគារជាតិនៃកម្ពុជា ដោយមានសហការជាមួយទីភ្នាក់ងារសហប្រតិបត្តិការអន្តរជាតិជប៉ុន (JICA) បានបង្ហាញថា ប្រាក់រៀលបានទទួលការទុកចិត្ត និងការប្រើប្រាស់កាន់តែច្រើន ក្នុងជីវភាពប្រចាំថ្ងៃរបស់ប្រជាពលរដ្ឋ ទាំងទីក្រុង និងនៅតាមតំបន់ជនបទ ក្នុងសកម្មភាពរកប្រាក់ចំណូល ចំណាយ និងសន្សំ ហើយជាក់ស្តែងសម្រាប់ខេត្តសៀមរាប បើតាមទិន្នន័យស្រាវជ្រាវបង្ហាញថា ជាមធ្យមមានប្រមាណ ៨១ភាគរយ នៃការចំណាយប្រចាំថ្ងៃរបស់ប្រជាជនត្រូវបានធ្វើឡើងជាប្រាក់រៀល។
ក្នុងសិក្ខាសាលាផ្សព្វផ្សាយ ស្តីពីប្រាក់រៀលប្រព័ន្ធបាគង និង KHQR នៅក្រុងសៀមរាប នាព្រឹកថ្ងៃទី១២ ខែធ្នូ ឆ្នាំ២០២៤នេះ ឯកឧត្តម ឃឹម លាត ទេសាភិបាលរង ធនាគារជាតិនៃកម្ពុជា បានបង្ហាញថា ក្នុងរយៈពេល ២ទសវត្សរ៍ចុងក្រោយនេះ តម្លៃប្រាក់រៀលបានរក្សាលំនឹងយ៉ាងល្អ ដោយមានតម្លៃក្នុងចន្លោះប្រមាណ ៤.០៥០រៀល/១ដុល្លារ។ ជាមួយគ្នានោះ ដើម្បីឱ្យសេដ្ឋកិច្ចកម្ពុជារឹងមាំ រាជរដ្ឋាភិបាលកម្ពុជា ក៏បានដាក់ចេញនូវគោលនយោបាយជាច្រើន ជាពិសេសចាប់តាំងពីដើមទសវត្សរ៍ឆ្នាំ២០០០មក។ ក្នុងនោះក៏មានគោលនយោបាយលើកកម្ពស់ការប្រើប្រាស់ប្រាក់រៀល ស្របពេលដែលស្ថានភាពម៉ាក្រូសេដ្ឋកិច្ចមានលំនឹងល្អប្រសើរ ក្រោយកម្ពុជាទទួលបានសុខសន្តិភាពពេញលេញនៅចុងឆ្នាំ១៩៩៨ ។
ព័ត៌មានជាតិ ថ្មីៗ
លោក សំកុល សុចិត្រា អភិបាលរងខេត្តសៀមរាប មានប្រសាសន៍ថា ទោះបីខេត្តសៀមរាប មានទេសចរបរទេស និងការទំនាក់ទំនងពាណិជ្ជកម្មច្រើនជាមួយបណ្ដាប្រទេសជិតខាង ដែលបាននាំមកនូវរូបិយបណ្ណមួយចំនួនចូលមកខេត្តសៀមរាប ក៏ប៉ុន្តែការចូលរួមប្រើប្រាស់ប្រាក់រៀលក្នុងខេត្តសៀមរាប នៅតែមានចំនួនច្រើនគួរឱ្យកត់សម្គាល់ ជាពិសេសការចំណាយលើម្ហូបអាហារ ភេសជ្ជៈ សម្លៀកបំពាក់ ការធ្វើដំណើរ និងការប្រើប្រាស់ផ្សេងៗទៀតជាដើម។
ក្នុងន័យនេះ លោកអភិបាលរងខេត្ត សូមលើកទឹកចិត្តដល់រោងចក្រ សហគ្រាស គ្រឹះស្ថានធនាគារ និងហិរញ្ញវត្ថុ ជាពិសេសប្រជាពលរដ្ឋទូទៅ បន្តចូលរួមប្រើប្រាស់ប្រាក់រៀល ជំនួសរូបិយបណ្ណបរទេស ព្រោះការអភិវឌ្ឍសេដ្ឋកិច្ចខេត្តសៀមរាប ក៏ដូចជាសេដ្ឋកិច្ចសង្គមជាតិ អាចប្រព្រឹត្តិទៅបានទាមទារនូវវត្តមានរូបិយវត្ថុជាតិ ដែលដើរតួនាទីយ៉ាងសំខាន់ សម្រួលដល់សកម្មភាពវិនិយោគ ផលិតកម្ម ពាណិជ្ជកម្មឱ្យមានភាពរស់រវើក។ មិនត្រឹមតែប៉ុណ្ណោះទេ ប្រទេសនីមួយៗតែងមានរូបិយវត្ថុជាតិរបស់ខ្លួន ដែលតំណាងឱ្យអត្តសញ្ញាណជាតិ។ ដូចច្នេះការប្រើប្រាស់ប្រាក់រៀល ឱ្យបានទូលំទូលាយ ប្រៀបបាននឹងការរក្សា ការចែករំលែកពីចំណេះដឹងប្រវត្តិសាស្រ្ត វប្បធម៌របស់កម្ពុជា ដល់ទេសចរបរទេស និងអ្នកជំនាន់ក្រោយ ហើយអាចពង្រឹងនូវស្មារតីបង្រួបបង្រួមជាតិ ក្នុងនាមជាប្រជាពលរដ្ឋក្នុងសង្គមជាតិតែមួយ៕
អត្ថបទ និងរូបភាព៖ លោក ធន់ ពូថេ , ឈិត សាវី
កែសម្រួល៖ លោក អ៊ុន ណារាជ្យ
