នៅព្រឹកថ្ងៃទី១២ ខែធ្នូ ឆ្នាំ២០២៤នេះ មន្ទីររៀបចំដែនដី នគរូបនីយកម្ម សំណង់ និងសុរិយោដីខេត្តសៀមរាប និងរដ្ឋបាលស្រុកជីក្រែង បានចុះផ្សព្វផ្សាយប្រកាសកំណត់តំបន់វិនិច្ឆ័យសម្រាប់ការចុះបញ្ជីដីធ្លីមានលក្ខណៈជាប្រព័ន្ធជូនដល់ប្រជាពលរដ្ឋចំនួន១០ភូមិ រួមមាន៖ ភូមិត្រពាំងភ្លោះ ភូមិចេក ភូមិគ្រាំង ភូមិក្បាលដំរី ភូមិគំរូ ភូមិស្វាយចេក ភូមិដុបត្នោត ភូមិស្រឡៅស្រោង ភូមិព្រៃឆ្ការ និងភូមិល្អក់ នៃឃុំពង្រលើ ស្រុកជីក្រែង ស្ថិតក្នុងបរិវេណវត្តក្បាលដំរី។
លោក ស៊ុន សុជាតិ អនុប្រធានមន្ទីរ មានប្រសាសន៍ថា ការចុះបញ្ជីដីធ្លីមានលក្ខណៈជាប្រព័ន្ធ គឺទាមទារការកំណត់ព្រំដី ការវាស់វែង និងការវិនិច្ឆ័យឱ្យបានច្បាស់លាស់ ដែលអនុវត្តផ្ទាល់ដោយមន្ត្រីជំនាញ និងអាជ្ញាធរពាក់ព័ន្ធ ចុះបញ្ជីទាំងដីឯកជន និងដីរដ្ឋ ដោយអនុវត្តទៅតាមនីតិវិធី និងបច្ចេកវិទ្យាទំនើប មានតម្លាភាព និងការទទួលខុសត្រូវហើយមានប្រសិទ្ធភាពលើការគ្រប់គ្រងដីធ្លី។ ការចុះបញ្ជីនេះអនុវត្តតាមនីតិវិធី ៥ដំណាក់កាល៖ ទី១.កំណត់តំបន់ធ្វើការវិនិច្ឆ័យ ទី២.ប្រតិបត្តិការបច្ចេកទេស ចុះកំណត់ព្រំ វាស់វែង និងវិនិច្ឆ័យ ទី៣.ការបិទផ្សាយជាសាធារណៈនូវឯកសារនៃការវិនិច្ឆ័យ ទី៤.ការសម្រេចលើឯកសារវិនិច្ឆ័យ និង ទី៥.ចេញវិញ្ញាបនបត្រជូនម្ចាស់ដី។
លោកក៏បានណែនាំដល់ប្រជាពលរដ្ឋជាម្ចាស់ក្បាលដី និងអ្នកកាន់កាប់ដីទាំងអស់ ត្រូវចូលរួមសហការជិតស្និតជាមួយក្រុមការងារ និងត្រូវរៀបចំឯកសារដែលពាក់ព័ន្ធឱ្យបានគ្រប់គ្រាន់ មុននឹងដំណើរការនៃការកំណត់ព្រំ វាស់វែង វិនិច្ឆ័យឈានមកដល់។
លោក ធូ ចន្ថុល អភិបាលរងស្រុកជីក្រែង មានប្រសាសន៍ ដើម្បីសម្រេចទៅដល់ការចេញវិញ្ញាបនបត្រសម្គាល់ម្ចាស់អចលនទ្រព្យ គឺទាមទារឱ្យម្ចាស់ក្បាលដីជាអ្នកកំណត់ព្រំជាមួយអ្នកជិតខាង ចំណែកមន្ត្រីបច្ចេកទេសគ្រាន់តែជាអ្នកវាស់វែងទៅតាមព្រំដែលចង្អុលបង្ហាញដោយម្ចាស់ដីតែប៉ុណ្ណោះ។ ដូច្នេះសូមឱ្យមានការឯកភាពគ្នាដោយដាំបង្គោលរឹងមាំទុកជាមុនសិន មុនក្រុមការងារទៅដល់ជាមួយនេះម្ចាស់ដីក៏ត្រូវត្រៀមឯកសារចាំបាច់មួយចំនួនផងដែរ។ លោកក៏បានសំណូមពរដល់អាជ្ញាធរមូលដ្ឋានក្នុងភូមិ ត្រូវចូលរួមគ្រប់ដំណើរការអនុវត្តការងារនេះឱ្យបានជាប់ជាប្រចាំ ដើម្បីធានាឱ្យមានតម្លាភាព ច្បាស់លាស់ត្រឹមត្រូវ និងដោះស្រាយបញ្ហាឱ្យទាន់ពេលវេលា និងឆាប់រហ័សដោយភាពទទួលខុសត្រូវ៕
អត្ថបទ និងរូបភាព៖ លោក យូ វង្ស
កែសម្រួល៖ លោក អ៊ុន ណារាជ្យ
