ថ្លែងនៅក្នុងពិធីបើកមហោស្រពមិត្តភាពកម្ពុជា-ចិន ឆ្នាំ២០២៤ នៅក្រុងសៀមរាប នាព្រឹកថ្ងៃទី១២ ខែធ្នូ ឆ្នាំ២០២៤នេះ ឯកឧត្តម វង្សី វិស្សុត ឧបនាយករដ្ឋមន្រ្តីប្រចាំការ និងជារដ្ឋមន្ត្រីទទួលបន្ទុកទីស្តីការគណៈរដ្ឋមន្ត្រី បានបង្ហាញថា ក្នុងរយៈពេលជា៣០ឆ្នាំចុងក្រោយនេះ កម្ពុជាទទួលបានការជួយជ្រោមជ្រែងជាយ៉ាងពេញទំហឹងពីមិត្តចិន សម្រាប់ការអភិវឌ្ឍប្រទេសលើគ្រប់វិស័យ ហើយកម្ពុជា-ចិន មានទំនាក់ទំនងការទូតជាមួយគ្នាមានរយៈពេលជាច្រើនសតវត្សមកហើយ ហើយទំនាក់ទំនងនេះកាន់តែស្អិតរមួតទ្វេឡើង ជាពិសេសនៅក្នុងរយៈពេល៣០ឆ្នាំចុងក្រោយនេះ។
ឯកឧត្តម វង្សី វិស្សុត បន្តថា ក្នុងរយៈពេលជា ៣ទសវត្សកន្លងមកនេះ មិត្តចិនរួមចំណែកយ៉ាងធំធេងនៅក្នុងដំណើរការអភិវឌ្ឍកម្ពុជាតាមរយៈការផ្តល់ជំនួយឥតសំណង កម្ចីសម្បទាន ដើម្បីគាំទ្រដល់វិស័យអាទិភាពសំខាន់ៗជាច្រើនទៅតាមតម្រូវការរបស់កម្ពុជា ពិសេសការកសាងហេដ្ឋារចនាសម្ព័ន្ធរូបវន្ត ដូចជាផ្លូវ ស្ពាន ថ្នល់ បណ្តាញអគ្គិសនីជាដើម។ គិតត្រឹមឆ្នាំ២០២៣ កន្លងទៅនេះ ប្រទេសចិនបានជួយសាងសង់ និងជួសជុលឡើងវិញ នូវផ្លូវថ្នល់ប្រវែងប្រមាណជាង ៤.០០០គីឡូម៉ែត្រ ស្ពានធំៗចំនួន១១កន្លែង ។
ឯកឧត្តម ឧបនាយករដ្ឋមន្ត្រីប្រចាំការ បន្ថែមថា មិត្តចិនក៏បានជួយសាងសង់នូវសំណង់ហេដ្ឋារចនាសម្ព័ន្ធវប្បធម៌ សង្គមផ្សេងៗដូចជា ពហុកីឡដ្ឋានមរតកតេជោ មន្ទីរពេទ្យមិត្តភាពកម្ពុជាចិនក្នុងខេត្តត្បូងឃ្មុំ អគារមន្ទីរពេទ្យមិត្តភាពកម្ពុជា-ចិន ព្រះកុសុមៈ និងជំនួយអភិវឌ្ឍន៍ធនធានមនុស្សជាដើម។ ជាមួយគ្នានេះ ក្នុងគំនិតផ្តួចផ្តើមខ្សែក្រវាត់និងផ្លូវ ក៏មានគម្រោងធំៗមួយចំនួនដូចជា ផ្លូវល្បឿនលឿនភ្នំពេញក្រុងព្រះសីហនុ ព្រលានយន្តហោះអន្តរជាតិសៀមរាបអង្គរ និងគម្រោងផ្លូវល្បឿនលឿនភ្នំពេញ បាវិត ផ្លូវល្បឿនលឿនភ្នំពេញ សៀមរាប ប៉ោយប៉ែត ក៏នឹងអាចលេចចេញជារូបរាងនៅក្នុងពេលខាងមុខនេះដែរ ដែលគម្រោងទាំងនេះនឹងជួយលើកកម្ពស់ការតភ្ជាប់ប៉ូលសេដ្ឋកិច្ចជាតិបានកាន់តែប្រសើរថែមទៀត។
សូមជម្រាបថា មហោស្រពមិត្តភាពកម្ពុជា-ចិន ឆ្នាំ២០២៤ ត្រូវបានរៀបចំដោយផ្ទះយុវជនដើម្បីមិត្តភាពកម្ពុជា-ចិន (YHCCF) សហការជាមួយមូលនិធិចិនដើម្បីសន្តិភាព និងការអភិវឌ្ឍ (CFPD) ដោយមានការចូលរួមពីថ្នាក់ដឹកនាំ អ្នកជំនាញ បញ្ញវ័ន្ត សហគ្រិន និងយុវជនកម្ពុជា-ចិន ប្រមាណ២០០នាក់។ មហោស្រពនេះ ជាព្រឹត្តិការណ៍ប្រកបដោយគុណតម្លៃសម្រាប់បង្កើនទំនាក់ទំនងឱ្យកាន់តែរឹងមាំ និងនាំមកនូវការអភិវឌ្ឍជាវិជ្ជមានរួមគ្នារវាងកម្ពុជា-ចិន។ លើសពីការជួបជុំដើម្បីពិភាក្សា ផ្លាស់ប្តូរការយល់ឃើញរវាងអ្នកជំនាញមកពីប្រទេសទាំងពីរ កម្មវិធីនេះក៏មានការថ្លែងសន្ទរកថាគន្លឹះ ក៏ដូចជា ចែករំលែកទស្សនៈវិស័យពីវាគ្មិនជាតិ-អន្តរជាតិសំខាន់ៗ និងវេទិកាធុរកិច្ចកម្ពុជា-ចិន ដែលផ្តល់ឱកាសឱ្យអ្នកជំនាញ និងសហគ្រិនមកពីប្រទេសទាំងពីរ ជជែកពិភាក្សាពីសក្តានុពល និងឱកាសសម្រាប់កិច្ចសហប្រតិបត្តិការ និងការអភិវឌ្ឍរួមគ្នារវាងប្រទេសកម្ពុជា-ចិន។ បន្ថែមពីលើនេះ ដើម្បីជំរុញឱ្យទទួលបានផ្លែផ្កាកាន់តែសកម្ម ក្នុងព្រឹត្តិការណ៍នេះក៏មានវេទិកាផ្គូផ្គងអាជីវកម្មដែលអនុញ្ញាតឱ្យក្រុមហ៊ុន រួមទាំងស្ថាប័ននានាអាចបង្ហាញផលិតផល សេវាកម្ម និងលក្ខណៈពិសេសរបស់ខ្លួន ដើម្បីស្វែងរកដៃគូវិនិយោគថ្មីៗមកកាន់ប្រទេសកម្ពុជា៕
អត្ថបទ និងរូបភាព៖ លោក ជា ស្រស់
កែសម្រួល៖ លោក អ៊ុន ណារាជ្យ
