នៅព្រឹកថ្ងៃទី១៧ ខែធ្នូ ឆ្នាំ២០២៤នេះ មន្ទីរសុខាភិបាល នៃរដ្ឋបាលខេត្តសៀមរាប បានបើកកិច្ចប្រជុំក្រុមការងារពិសេសលុបបំបាត់ជំងឺគ្រុនចាញ់ថ្នាក់ខេត្ត ប្រចាំត្រីមាសទី៤ ឆ្នាំ២០២៤ ដើម្បីពង្រឹងតួនាទីក្រុមការងារពាក់ព័ន្ធ ធ្វើបច្ចុប្បន្នភាពពីជំងឺគ្រុនចាញ់ លទ្ធផលការងារ និងពិភាក្សាលើបញ្ហាប្រឈមរកដំណោះស្រាយ ដើម្បីផ្ដល់អនុសាសន៍ និងលើកទិសដៅអនុវត្ដបន្ដ ក្នុងគោលបំណងសម្រេចគោលដៅលុបបំបាត់ជំងឺគ្រុនចាញ់ ដែលដឹកនាំដោយលោក នាក់ ណេរ៉ុន អភិបាលរងខេត្តសៀមរាប ព្រមទាំងមានការចូលរួមពី មជ្ឈមណ្ឌលជាតិប្រយុទ្ធនិងជំងឺគ្រុនចាញ់ ថ្នាក់ដឹកនាំ មន្ត្រីជំនាញ អាជ្ញាធរមូលដ្ឋាន និងអ្នកពាក់ព័ន្ធជាច្រើនរូប។
លោក អ៊ីវ មករា ប្រធានកម្មវិធីគ្រុនចាញ់នៃមន្ទីរសុខាភិបាលខេត្តសៀមរាប បានបង្ហាញថាការស្រាវជ្រាវករណីគ្រុនចាញ់មាននៅតាម មន្ទីរពេទ្យបង្អែក (RH) មណ្ឌលសុខភាព(HC) អ្នកស្ម័គ្រចិត្តភូមិព្យាបាលជំងឺគ្រុនចាញ់ (VMW) ក្នុងរយៈពេល១១ខែ ឆ្នាំ២០២៤នេះ បានស្រាវជ្រាវមានចំនួន ១០០.៨៦៨ករណី ដែលក្នុងនោះ បានរកឃើញករណីវិជ្ជមានជំងឺគ្រុនចាញ់ចំនួន៣ករណី ជាប្រភេទវីវ៉ាក់ (P.v)ទាំងអស់ ដែលករណីទាំងនេះត្រូវបានចាត់ថ្នាក់ថា ជា “ករណីលាប់”។ ក្នុងនោះក្រុមការងារពិសេសលុបបំបាត់ជំងឺគ្រុនចាញ់ ជាមួយអាជ្ញាធរ បានបន្តចុះអប់រំផ្សព្វផ្សាយ លើកទឹកចិត្តឱ្យប្រជាពលរដ្ឋមករកសេវាធ្វើតេស្តប្រសិនបើ សង្ស័យ ពិសេសប្រជាពលរដ្ឋចល័ត មកពីតាមតំបន់ប្រឈមនានា ដូចជាតាមព្រំដែន ឬតំបន់ព្រៃភ្នំ។
ក្នុងនោះផងដែរ ស្រុកប្រតិបត្តិសូទ្រនិគម បានធ្វើការចែកមុងជ្រលក់ថ្នាំដល់ប្រជាពលរដ្ឋចំនួន១០២២មុង ក្នុងនោះចែកមុងគ្រែ សរុបបានចំនួន ៧២៣០មុង និងមុងអង្រឹងបាន ២៤២៤មុង និងបានចែកមុងគ្រែដល់ស្ត្រីមានផ្ទៃពោះបានចំនួន ៣៦៨មុង ដែលស្ថិតនៅក្នុងមណ្ឌលសុខភាពចាន់ស មណ្ឌលសុខភាពតាប៉ែក មណ្ឌលសុខភាពខ្នងភ្នំ មណ្ឌលសុខភាពកន្ទួត និងមណ្ឌលសុខភាពពង្រក្រោម។
លោក នាក់ ណេរ៉ុន អភិបាលរងខេត្តសៀមរាប បានសម្ដែងនូវការកោតសរសើរដល់អ្នកពាក់ព័ន្ធក្នុងការចូលរួមធ្វើសកម្មភាពលុបបំបាត់នូវជំងឺគ្រុនចាញ់ ឲ្យស្របតាមគោលការណ៍រាជរដ្ឋាភិបាលនៃព្រះរាជណាចក្រកម្ពុជា ដែលបានដាក់ចេញនូវផែនការលុបបំបាត់ជំងឺគ្រុនចាញ់គ្រប់ទម្រង់ នៅត្រឹមឆ្នាំ២០២៥។ដូចនេះយើងត្រូវសហការគ្នាគ្រប់អ្នកពាក់ព័ន្ធបន្តការតេស្តស្រាវជ្រាវរកមេរោគគ្រុនចាញ់ និងចែកមុងជ្រលក់ថ្នាំដល់ប្រជាជនគោលដៅ បន្តធានាឱ្យមានតេស្ត និងថ្នាំគ្រប់គ្រាន់នៅតាមតំបន់គោលដៅឲ្យបានជាប់ជាប្រចាំ និងត្រូវបន្តចុះអប់រំផ្សព្វផ្សាយ អំពីវិធីបង្ការជំងឺដែលឆ្លង ដោយសារសត្វមូសឱ្យបានទូលំទូលាយ ដើម្បីសម្រេចគោលដៅលុបបំបាត់ជំងឺគ្រុនចាញ់នាពេលខាងមុខ ជាពិសេសចូលរួមជាមួយយុទ្ធសាស្រ្តរាជរដ្ឋាភិបាល ក្នុងការសម្រេចគោលដៅប្រទេសកម្ពុជាឲ្យមានចំណូលមធ្យមកម្រិតខ្ពស់នៅឆ្នាំ២០៣០៕
អត្ថបទ និងរូបភាព៖ លោក ធន់ ពូថេ
កែសម្រួល៖ លោក ហាំ ម៉េងហួត
