ឯកសារវិនិច្ឆ័យការចុះបញ្ជីដីធ្លីមានលក្ខណៈជាប្រព័ន្ធចំនួន ៤២៥៩ក្បាលដី ក្នុងភូមិចំនួន០៣មានភូមិព្រៃវែង ភូមិដូនស្វា និងភូមិប្រាសាទ ក្នុងឃុំសំរោងយា ស្រុកពួក ខេត្តសៀមរាប ត្រូវបានមន្ទីរជំនាញ សហការជាមួយអាជ្ញាធរមូលដ្ឋាន បិទផ្សាយជាសាធារណៈ ដើម្បីឲ្យប្រជាពលរដ្ឋ និងអ្នកកាន់កាប់ ឬម្ចាស់ក្បាលដី ធ្វើការពិនិត្យ ផ្ទៀងផ្ទាត់មុននឹងឈានទទួលបានប័ណ្ណកម្មសិទ្ឋសម្គាល់ម្ចាស់អចលនទ្រព្យ ដែលពិធីនេះធ្វើឡើងក្នុងវត្តពោធិឃុំសំរោងយា នៅព្រឹកថ្ងៃទី១៧ ខែធ្នូ ឆ្នាំ២០២៤នេះ។
លោក ប៊ូ ជុំសម្បត្តិ អនុប្រធានមន្ទីររៀបចំដែនដី នគរូបនីយកម្ម សំណង់ និងសុរិយោដីខេត្តសៀមរាប បានពន្យល់ថា៖ ឯកសារវិនិច្ឆ័យការចុះបញ្ជីដីធ្លីជាងបួនពាន់ក្បាលដីនៅឃុំសំរោងយានេះ ប្រកាសបិទផ្សាយជាសាធារណៈមានរយៈពេល១៥ថ្ងៃ គិតចាប់ពីថ្ងៃទី១៧ ដល់ថ្ងៃទី៣១ ខែធ្នូ ឆ្នាំ២០២៤ ដោយគិតរួមទាំងថ្ងៃបុណ្យ និងថ្ងៃឈប់សំរាក ដែលមានទីតាំងស្ថិតក្នុងបរិវេណវត្តពោធិ៍ ភូមិព្រៃវែង ឃុំសំរោងយា មានមន្ត្រីប្រចាំការជួយសម្របសម្រួលនិង តម្រូវឱ្យបងប្អូនប្រជាពលរដ្ឋ ជាម្ចាស់ដី ឬនិងអ្នកកាន់កាប់ដី ព្រមទាំងស្ថាប័ន និងអង្គភាពពាក់ព័ន្ធទាំងអស់មក ពិនិត្យផ្ទៀងផ្ទាត់មើលទិន្នន័យនេះឱ្យបានគ្រប់ៗគ្នា ដើម្បីធានាបាននូវភាពសុក្រឹត្យត្រឹមត្រូវ ក្នុងការចេញវិញ្ញាបនបត្រសម្គាល់ម្ចាស់អចលនវត្ថុ (ប័ណ្ណកម្មសិទ្ធិ)។
លោក ប៊ូ ជុំសម្បត្តិ បានសំណូមពរ ដល់ម្ចាស់ដី និងអ្នកកាន់កាប់ដី ព្រមទាំងស្ថាប័ន និងអង្គភាពពាក់ព័ន្ឋទាំងអស់ សូមមកពិនិត្យផ្ទៀងផ្ទាត់មើលទិន្នន័យក្បាលដីខ្លួនឲ្យបានគ្រប់ៗគ្នាទៅលើឈ្មោះម្ចាស់ដី សាវតា ទំហំដី ប្រភេទទ្រព្យ ហើយអ្នកពាក់ព័ន្ឋទាំងអស់ មានសិទ្ឋិធ្វើការកែតម្រូវ ឬជំទាស់តវ៉ាមកគណៈកម្មការរដ្ឋបាល ក្នុងករណីដែលពិនិត្យទៅឃើញថាមានកំហុសឆ្គង មន្រ្ទីជំនាញធ្វើការពិនិត្យ និងកែតម្រូវជូន ដើម្បីធានាបាននូវភាពសុក្រិតត្រឹមត្រូវទាំងលក្ខណៈបច្ចេកទេស និងទាំងលក្ខណៈច្បាប់ ។
លោក សាន សារិត អភិបាលរងស្រុកពួក បានមានប្រសាសន៍ថា សូមអំពាវនាវ និងសំណូមពរដល់បងប្អូនប្រជាពលរដ្ឋដែលជាម្ចាស់ក្បាលដី និងអ្នកកាន់កាប់ដី សូមចូលរួមពិនិត្យ ផ្ទៀងផ្ទាត់ឱ្យបានគ្រប់គ្នា ដើម្បីធានាបាននូវភាពត្រឹមត្រូវ ច្បាស់លាស់ គ្មានកំហុសឆ្គង ព្រោះវាជាឱកាសចុងក្រោយ ដែលម្ចាស់ក្បាលដីអាចមានសិទ្ធតវ៉ាបើពិនិត្យឃើញមានកំហុសឆ្គងនូវព្រំដីឬឈ្មោះរបស់ម្ចាស់ក្បាលដី បើបងប្អូនអាក់ខាន ឬយឺតយ៉ាវ វានឹងនាំឲ្យបាត់បង់ផលប្រយោជន៍របស់បងប្អូន។
លោកអភិបាលរងស្រុកបន្តថា៖ ការចុះបញ្ជីដីមានលក្ខណៈជាប្រព័ន្ឋនេះ គឺធ្វើឡើងដើម្បីផ្តល់ប័ណ្ណកម្មសិទ្ឋជូនទៅឱ្យបងប្អូនប្រជាពលរដ្ឋដែលជាម្ចាស់ដី ឬអ្នកកាន់កាប់ដីទាំងអស់ដើម្បីយកទៅប្រើប្រាស់ ដូចជាយកទៅដាក់បញ្ចាំ និងហ៊ីប៉ូតែកដើម្បីខ្ចីប្រាក់មកប្រកបមុខរបរផ្សេងៗ សំដៅលើកស្ទួយជីវភាពរស់នៅប្រចាំថ្ងៃ ឬជាឯកសារសំអាងនៅពេលមានជម្លោះដីធ្លីកើតមានឡើង៕
អត្ថបទ និងរូបភាព៖ លោក យូ វង្ស
កែសម្រួល៖ លោក ហាំ ម៉េងហួត
