សិក្ខាកាមជំនាន់ទី៣ ឆ្នាំសិក្សា២០២៤ ចំនួន៧៥នាក់ មកពីខេត្តចំនួន១៥ បានបញ្ចប់វគ្គហ្វឹកហ្វឺន និងចុះកម្មសិក្សារបស់អង្គការស្លាបព្រាកម្ពុជា ដោយជោគជ័យ និងរៀបចំពិធីប្រគល់វិញ្ញាបនបត្រជាផ្លូវការនៅព្រឹកថ្ងៃទី១៩ ខែធ្នូ ឆ្នាំ២០២៤នេះ ក្រោមអធិបតីភាព ឯកឧត្តម ប៉ាក់ សុខុម រដ្ឋលេខាធិការក្រសួងទេសចរណ៍ និង លោក លី សារី អភិបាលរងខេត្តសៀមរាប ដោយមានការចូលរួមពីអាជ្ញាធរមូលដ្ឋាន តំណាងអង្គការដៃគូ និងអ្នកពាក់ព័ន្ធជាច្រើនរូប។
លោកស្រី ម៉ៅ សុផាន់នី នាយិកាអង្គការស្លាបព្រាកម្ពុជា បានឱ្យដឹងថា ចាប់តាំងពីឆ្នាំ២០០៩ ដល់ឆ្នាំ២០២៤ សិក្ខាកាមដែលបានបញ្ចប់ដោយជោគជ័យវគ្គជំនាញបដិសណ្ឋារកិច្ច និងចុះកម្មសិក្សានៅអង្គការស្លាបព្រាកម្ពុជា មានចំនួន៥៤៤នាក់ ហើយ១០០ភាគរយនៃសិស្សដែលបានបញ្ចប់ការសិក្សា មានការងារក្នុងកំឡុងពេល១ខែ បន្ទាប់ពីថ្ងៃបញ្ចប់វគ្គសិក្សា។ ដោយឡែកក្នុងឆ្នាំសិក្សា២០២៤នេះ អង្គការបានបណ្តុះបណ្តាលសិក្ខាកាមចំនួន ៧៥នាក់ ស្រី៤៣នាក់ លើជំនាញសេវាកម្មម្ហូបអាហារ និងភេសជ្ជៈ ,ជំនាញធ្វើម្ហូប និងជំនាញបារីស្តា/ឆុងកាហ្វេ និងជំនាញធ្វើនំ និងដុតបង្អែម ខណៈសិក្ខាកាមមួយចំនួនធំមានកន្លែងការងាររួចជាស្រេចហើយ។
លោក លី សារី អភិបាលរងខេត្ត មានប្រសាសន៍ថា វិញ្ញាបនបត្របញ្ជាក់ការសិក្សានេះ សម្រាប់ជួយឱ្យសិក្ខាកាម មានលទ្ធភាពស្វែងរកឱកាសការងារល្អៗ ដើម្បីខ្លួនឯង គ្រួសារ និងសង្គមជាតិ។ លោកក៏បានលើកទឹកចិត្ត និងណែនាំដល់សិក្ខាកាមដែលទើបបញ្ចប់វគ្គ ត្រូវស្គាល់ច្បាស់អំពីខ្លួនឯង និងធ្វើការដឹងគុណដល់ខ្លួនឯង តាមរយៈប្រព្រឹត្តិតែអំពើល្អ ដឹងគុណដល់មាតាបិតាអាណាព្យាបាលដែលពួកគាត់មានថ្ងៃនេះ និងជាពិសេសដឹងគុណដល់ប្រមុខរាជរដ្ឋាភិបាលដែលបាននាំសុខសន្តិភាព ឱ្យមានការអភិវឌ្ឍប្រទេសជាតិ បើគ្មានសន្តិភាពទេយើងក៏គ្មានថ្ងៃនេះដែរ។
មានប្រសាសន៍ក្នុងឱកាសនោះ ឯកឧត្តម ប៉ាក់ សុខុម រដ្ឋលេខាធិការក្រសួងទេសចរណ៍ បានវាយតម្លៃខ្ពស់ ចំពោះការរៀបចំដឹកនាំ និងការបណ្តុះបណ្ដាលរបស់អង្គការស្លាបព្រាកម្ពុជា ដែលបានជំរុញឱ្យយុវជនយើងងាកមកចាប់ជំនាញច្បាស់លាស់ កាត់បន្ថយការបោះបង់ការសិក្សាហើយគ្មានការងារធ្វើពិតប្រាកដ។ ជាពិសេសការប្រែក្លាយវិបត្តិទៅជាឱកាសសម្រាប់ពង្រឹងគុណភាព និងផលិតភាពនៃការបណ្តុះបណ្តាលជំនាញវិជ្ជាជីវៈទេសចរណ៍ និយាយជារួមនៅកម្ពុជា និងនិយាយដោយឡែកក្នុងខេត្តសៀមរាបនេះផ្ទាល់តែម្ដង។
ឯកឧត្តមក៏បានណែនាំដល់សិក្ខាកាមទាំងអស់ នៅពេលចេញទៅបំពេញការងារតាមជំនាញរៀងៗខ្លួន ត្រូវប្រើប្រាស់សមត្ថភាពដែលខ្លួនខិតខំប្រឹងប្រែងសិក្សាកន្លងមកនេះ ដោយឈរលើគោលការណ៍គោរពការងារ ទីកន្លែង និងមនុស្សជុំវិញខ្លួន បំពេញការងារដោយភាពស្មោះត្រង់។ ទោះជាចេញបំពេញការងារក៏ពិតមែន តែសូមឱ្យប្អូនៗសិក្សាបន្ថែមពីមនុស្សជុំវិញខ្លួន កន្លែងការងារ ព្រោះវាគឺជាបទពិសោធថ្មីៗ ដែលជំរុញឱ្យប្អូនបំពេញការងារបានកាន់តែល្អ ក្លាយជាបុគ្គលិកឆ្នើម ឬក៏អាចមានឱកាសប្រែក្លាយខ្លួនឱ្យក្លាយជាម្ចាស់ ឬអ្នកគ្រប់គ្រងលើអាជីវកម្មខ្លួនឯងនាថ្ងៃអនាគតផងដែរ៕
អត្ថបទ និងរូបភាព៖ លោក អ៊ុន ណារាជ្យ
