នៅព្រឹកថ្ងៃទី១៩ ខែធ្នូ ឆ្នាំ២០២៤នេះ អាជ្ញាធរខេត្តសៀមរាប បានបន្តបើកវេទិកាផ្សព្វផ្សាយ និងពិគ្រោះយោបល់របស់ក្រុមប្រឹក្សាខេត្ត អាណត្តិទី៤ សម្រាប់គោលដៅទី៧ នៅស្រុកអង្គរជុំ ខេត្តសៀមរាប ដើម្បីបង្ហាញពីសមិទ្ធផលដែលសម្រេចបានកន្លងមក និងទទួលនូវសំណួរសំណូមពរដែលជាក្ដីកង្វល់របស់ប្រជាពលរដ្ឋ ក្រោមការដឹកនាំរបស់ ឯកឧត្តម លី សំរិទ្ធ ប្រធានក្រុមប្រឹក្សាខេត្ត និងលោក ហែន ពុទ្ធី អភិបាលរងខេត្ត ដោយមានការចូលរួមពីសំណាក់ ឯកឧត្តម លោកជំទាវ ជាសមាជិកក្រុមប្រឹក្សាខេត្ត ថ្នាក់ដឹកនាំមន្ទីរអង្គភាព អាជ្ញាធរមូលដ្ឋាន លោកគ្រូអ្នកគ្រូ សិស្សានុសិស្ស និងប្រជាពលរដ្ឋជាច្រើនរូប។
ឯកឧត្ដម លី សំរិទ្ធ មានប្រសាសន៍ថា វេទិកាផ្សព្វផ្សាយ និងពិគ្រោះយោបល់របស់ក្រុមប្រឹក្សាខេត្ត ជាព្រឹត្តិការណ៍ដ៏មានសារៈសំខាន់ប្រចាំឆ្នាំស្របតាមច្បាប់ ស្តីពីការគ្រប់គ្រងរដ្ឋបាលរាជធានីខេត្ត ក្រុងស្រុកខណ្ឌ និងបានផ្តល់ឱកាសជូនប្រជាពលរដ្ឋ និងអ្នកពាក់ព័ន្ធទាំងអស់ ស្វែងយល់ពីស្ថានភាពទូទៅនៃការអភិវឌ្ឍខេត្ត និងបញ្ហាប្រឈមនានា ព្រមទាំងបើកឱកាសជូនបងប្អូនប្រជាពលរដ្ឋ អ្នកពាក់ព័ន្ធទាំងអស់ ក្នុងការបញ្ចេញមតិរបស់ខ្លួនដែលពាក់ព័ន្ធនឹងក្តីកង្វល់ សំណូមពរ តម្រូវការជាក់ស្តែងក្នុងមូលដ្ឋាន ដើម្បីឱ្យមន្ត្រីជំនាញធ្វើការស្រាយបំភ្លឺជូន។
សូមជម្រាបថា វេទិកានាពេលនេះដែរ ក្រុមការងារទទួលបាននូវសំណួរសំណូមពរពីបងប្អូនប្រជាពលរដ្ឋចំនួន ២២សំណួរសំណូមពរ ដោយផ្ទាល់មាត់ចំនួន៦ និងជាលាយលក្ខណ៍អក្សរចំនួន១៦ ពាក់ព័ន្ធនឹងបញ្ហាហេដ្ឋារចនាសម្ព័ន្ធ បញ្ហាដាក់លូការពារផ្លូវ បញ្ហាទឹកជន់លិចនារដូវវស្សា បញ្ហាតម្លៃកសិផល និងទំនាស់ដីធ្លីដែលមិនទាន់បានដោះស្រាយ។ ក្នុងនោះសំណួរ និងសំណូមពរផ្ទាល់មាត់ចំនួន៦ ត្រូវបានមន្ត្រីជំនាញពាក់ព័ន្ធបានធ្វើការស្រាយបំភ្លឺភ្លាមៗ។ ចំពោះសំណួរសំណូមពរជាលាយលក្ខណ៍អក្សរចំនួន១៦ នៅមិនទាន់បានឆ្លើយបំភ្លឺ ក្រុមប្រឹក្សាខេត្ត នឹងប្រមូលយកទៅពិនិត្យ ពិភាក្សាក្នុងក្របខណ្ឌក្រុមប្រឹក្សាខេត្ត ហើយនឹងធ្វើការឆ្លើយតប និងជម្រាបជូនដំណឹងជាលាយលក្ខណ៍អក្សរដល់ម្ចាស់សំណួរក្នុងពេលឆាប់ៗខាងមុខ។
ថ្លែងបិទវេទិកា ឯកឧត្តម លី សំរិទ្ធ បានបញ្ជាក់ថា អង្គវេទិកានេះ នឹងជួយជំរុញដល់ការអនុវត្តមុខងារគ្រប់ស្ថាប័នពាក់ព័ន្ធ រួមនឹងអាជ្ញាធរមូលដ្ឋានឱ្យការដោះស្រាយប្រកបដោយតម្លាភាព និងមានប្រសិទ្ធភាព ស្របតាមច្បាប់លិខិតបទដ្ឋានគតិយុត្តនៅថ្នាក់មូលដ្ឋាន។ ឯកឧត្តមបញ្ជាក់ថា រដ្ឋបាលខេត្តនឹងនាំយកនូវសំណូមពរ និងកង្វល់ទាំងនេះ ដើម្បីធ្វើការពិនិត្យពិចារណា និងដោះស្រាយ សំដៅលើកកម្ពស់គុណភាពជីវិតរបស់បងប្អូនប្រជាពលរដ្ឋ និងឈានទៅរកការកាត់បន្ថយភាពក្រីក្រ ដើម្បីឱ្យវិស័យសេដ្ឋកិច្ច និងសង្គមជាតិមានការរីកចម្រើនទៅមុខៗ។ ឯកឧត្តម ក៏បានស្នើដល់អាជ្ញាធរមូលដ្ឋាន និងមន្ត្រីអង្គភាពជំនាញពាក់ព័ន្ធ ប្រជាពលរដ្ឋ ធ្វើយ៉ាងណារួមគ្នាបង្កើតសហគមន៍កសិករ នៅក្នុងមូលដ្ឋានស្រុកអង្គរជុំ ឱ្យបាននៅពេលខាងមុខ ដើម្បីធ្វើឱ្យតម្លៃកសិផលល្អ៕
អត្ថបទ និងរូបភាព៖ លោក ធន់ ពូថេ
កែសម្រួល៖ លោក អ៊ុន ណារាជ្យ
