នៅព្រឹកថ្ងៃទី២០ ខែធ្នូ ឆ្នាំ២០២៤នេះ មន្ទីរផែនការខេត្តសៀមរាប បានបើកកិច្ចប្រជុំស្ដីពីវឌ្ឍនភាពការងារ និងផ្សព្វផ្សាយទិន្នន័យអត្តសញ្ញាណកម្មគ្រួសារក្រីក្រ ក្នុងខេត្តសៀមរាប ឆ្នាំ២០២៤ ដើម្បីធ្វើការផ្សព្វផ្សាយ និងពង្រឹងបន្ថែមទៅដល់គ្រប់អ្នកពាក់ព័ន្ធ ជុំវិញការងារកំណត់អត្តសញ្ញាណកម្មគ្រួសារក្រីក្រនៅទូទាំងខេត្ត ដោយកិច្ចប្រជុំនេះដឹកនាំដោយ លោក ហាក់ សុធារ៉ា ប្រធានមន្ទីរផែនការខេត្ត និងមានការចូលរួមពីសំណាក់តំណាងមន្ទីរអង្គភាពពាក់ព័ន្ធ និងអាជ្ញាធរក្រុងស្រុកជាច្រើនរូប។
លោក ហាក់ សុធារ៉ា មានប្រសាសន៍ថា កិច្ចប្រជុំនាថ្ងៃនេះ គឺដើម្បីធ្វើការផ្សព្វផ្សាយទៅតាមបណ្ដាស្រុក និងអង្គភាពពាក់ព័ន្ធ ឱ្យដឹងពីសមិទ្ធផលនៃការអនុវត្តកម្មវិធីអត្តសញ្ញាណកម្មដែលបានអនុវត្តកន្លងមក និងជំរុញបន្ថែមទៅលើការកំណត់អត្តសញ្ញាណគ្រួសារក្រីក្រ និងគ្រួសារងាយរងហានិភ័យ ក្នុងការចុះសម្ភាសន៍គ្រួសារប្រជាពលរដ្ឋដែលអស់លទ្ធភាព ស្របទៅតាមនីតិវិធី លក្ខណៈវិនិច្ឆ័យ ដែលជាសូចនាករសម្រាប់ការដាក់ពិន្ទុ កំណត់ប្រភេទគ្រួសារក្រីក្រឱ្យបានត្រឹមត្រូវ។
លោក ហាក់ សុធារ៉ា បន្តថា អត្តសញ្ញាណកម្មគ្រួសារក្រីក្ររបស់ក្រសួងផែនការ ត្រូវបានយកទៅប្រើប្រាស់ក្នុងកម្មវិធីជំនួយសង្គមដោយការឆ្លើយតបទៅនិងគ្រោះអាសន្ន កម្មវិធីឧបត្ថម្ភសាច់ប្រាក់ជូនគ្រួសារងាយរងហានិភ័យ ,កម្មវិធីឧបត្ថម្ភសាច់ប្រាក់ជូនស្ត្រីមានផ្ទៃពោះ និងកុមារក្រីក្រអាយុក្រោម២ឆ្នាំ , ការទទួលបានសេវាសុខភាពសាធារណៈមិនបង់ថ្លៃពីមូលនិធិសមធម៌សុខាភិបាល, ការផ្តល់អាហារនៅតាមសាលារៀន, ការបណ្តុះបណ្តាលវិជ្ជាជីវៈ និងកម្មវិធីកញ្ចប់គ្រួសារនាពេលអនាគត។
លោកប្រធានមន្ទីរបន្ថែមថា កិច្ចប្រជុំនេះដែរ មន្ត្រីជំនាញនឹងធ្វើការផ្សព្វផ្សាយអំពីការអនុវត្តនីតិវិធី អត្តសញ្ញាណកម្ម គ្រួសារក្រីក្រថ្មី ដល់បណ្តាមន្ទីរ អង្គភាពជុំវិញខេត្ត និងអ្នកផ្តល់សេវា ជាពិសេសអាជ្ញាធរមូលដ្ឋាន ដើម្បីជំរុញការផ្សព្វផ្សាយបន្តដល់ប្រជាពលរដ្ឋឱ្យបានយល់ដឹងទូលំទូលាយ ពីការកំណត់អត្តសញ្ញាណកម្ម គ្រួសារក្រីក្រ និងកំណត់គ្រួសារងាយរងហានិភ័យ ផ្សព្វផ្សាយអំពីការប្រើប្រាស់ប្រព័ន្ធទិន្នន័យ អត្តសញ្ញាណកម្ម គ្រួសារក្រីក្រថ្មី និងការប្រើប្រាស់កម្មវិធីសាធារណៈ (Public IDPoor App)។
បើតាមរបាយការណ៍ រយៈពេល១០ខែ ឆ្នាំ២០២៤ ក្នុងខេត្តសៀមរាប បានកំណត់អត្តសញ្ញាណកម្មគ្រួសារក្រ១ និងក្រ២ ចំនួន៦៣.៥៣៥គ្រួសារ ដោយមានគ្រួសារស្ម័គ្រចិត្តរុះរើចេញពីតំបន់រមណីយដ្ឋានអង្គរ ទៅតំបន់អភិវឌ្ឍន៍រុនតាឯក និងពាក់ស្នែង ៩.៩២២គ្រួសារ។ ជាមួយនោះ គ្រួសាររងហានិភ័យមានចំនួន ៣៨.៣៦៦គ្រួសារ ដោយទទួលបានការគាំពារពីរាជរដ្ឋាភិបាល។ ក្រៅពីនោះ ថ្មីៗនេះខេត្តបានទទួលពាក្យស្នើសុំ និងបានវាយតម្លៃផ្តល់បណ្ណជូនបុគ្គលបម្រើសេវាកម្សាន្តសេដ្ឋកិច្ចក្រៅប្រព័ន្ធបាន ៤៤៩បណ្ណ ដែលនឹងបន្តអនុវត្តបន្ថែមនៅក្នុងឆ្នាំ២០២៤៕
អត្ថបទ និងរូបភាព៖ លោក ធន់ ពូថេ
កែសម្រួល៖ លោក អ៊ុន ណារាជ្យ
