នៅថ្ងៃទី២០ ខែធ្នូ ឆ្នាំ២០២៤នេះ អង្គការទស្សនពិភពលោកអន្ដរជាតិ បានរៀបចំវេទិកាលើកទី២ លើការរៀនសូត្រ និងឆ្លុះបញ្ចាំងថ្នាក់ខេត្ត ដើម្បីការអប់រំរបស់កុមារនៅបឋមសិក្សាក្នុងខេត្តសៀមរាប ដើម្បីពិភាក្សា ចែករំលែកបទពិសោធល្អៗដែលបានអនុវត្តពាក់ព័ន្ធនៃការរៀនសូត្ររបស់កុមារ ជាពិសេសកុមារបាត់បង់ឱកាសនៅក្នុងកម្រិតបឋមសិក្សា នៅក្នុងមូលដ្ឋានខេត្ដសៀមរាប។
លោក ឈន តុលា ប្រធានតំបន់ប្រតិបត្ដិ ប្រចាំខេត្ដសៀមរាប មានប្រសាសន៍ថា វេទិកាថ្ងៃនេះជាវេទិកាមួយដែលផ្តោតលើការអប់រំរបស់កុមារដែលរៀបចំដោយគម្រោងអប់រំក្នុងស្រុក និងគម្រោងដៃគូរួមគ្នាផ្តល់ឱកាសអប់រំដល់កុមារបាត់បង់ឱកាសនៅកម្ពុជា។ គម្រោងអប់រំដែលអង្គការទស្សនៈពិភពលោកកំពុងអនុវត្តនេះ គឺជាកត្តាលីករមួយដែលជួយជំរុញដល់ការសម្រេចបាននៅគោលដៅប្រកបដោយចីរភាពទី៤ ឆ្នាំ២០៣០ របស់ក្រសួងអប់រំ ការអប់រំមានគុណភាព សមធម៌ និងបរិយាបន្ន និងការសិក្សាពេញមួយជីវិត និងដើរស្របតាមយុទ្ធសាស្ត្របញ្ចកោណដំណាក់កាលទី១ របស់រាជរដ្ឋាភិបាល ដែលរួមបញ្ចូល ការអភិវឌ្ឍមូលធនមនុស្ស ជាអាទិភាព១ ក្នុងចំណោមអាទិភាពទាំងប្រាំ។
លោក ឈន តុលា បន្តថា ការអភិវឌ្ឍធនធានមនុស្សប្រាកដណាស់ត្រូវការចាប់ផ្តើមពីកុមារតូច ជាពិសេសនៅកម្រិតមត្តេយ្យ និងបឋមសិក្សាដែលជាចំណុចចាប់ផ្តើម។ នៅខេត្តសៀមរាប បច្ចុប្បន្នមានស្រុកគោលដៅចំនួន៥ គឺស្រុកជីក្រែង ស្រុកសូទ្រនិគម ស្រុកពួក ស្រុកក្រឡាញ់ និងស្រុកវ៉ារិន។ ជាមួយគ្នានោះ នៅខេត្តសៀមរាប គម្រោងអប់រំបានអនុវត្តទៅលើសាលាបឋមសិក្សាចំនួន ១២៦កន្លែង ដែលមានកុមារសរុបចំនួន ៣៦.០៣៨នាក់។ គម្រោងអប់រំទាំង ៥ស្រុក បានសហការជាមួយគម្រោង “ដៃគូរួមគ្នាផ្តល់ឱកាសដល់កុមារបាត់បង់ឱកាសនៅកម្ពុជា ដែលហៅកាត់ថា CCOSC” អនុវត្តគម្រោងអប់រំ ដោយផ្តោតលើសកម្មភាពសំខាន់ៗដូចជា៖ ការបណ្តុះបណ្តាលគ្រូទៅលើកញ្ចប់អំណានថ្នាក់ទី១និងទី២ និងកម្មវិធីកុមារអានបានល្អថ្នាក់ទី៣ និងប្រឹក្សាគរុកោសល្យ ព្រមទាំងវិន័យបែបវិជ្ជមាន និងការគ្រប់គ្រងថ្នាក់រៀនប្រកបដោយប្រសិទ្ធភាពជាដើម។
លោកបន្ថែមថា ក្រោមការយកចិត្តទុកដាក់របស់រដ្ឋាភិបាលកម្ពុជា ជាពិសេសក្រសួងអប់រំ ការអប់រំរបស់កុមារមានភាពល្អប្រសើរគួរអោយកត់សម្គាល់ក្នុងរយៈពេលប៉ុន្មានឆ្នាំនេះចុងក្រោយនេះនៅគ្រប់ភូមិសិក្សា។ ក៏ប៉ុន្តែក៏មានបញ្ហាប្រឈមនិងក្តីបារម្ភមួយចំនួនដែលនៅតែបន្តប្រឈមដល់ការអប់រំរបស់កុមារជាពិសេសកុមារងាយរងគ្រោះ ឬកុមារបាត់បង់ឱកាស ដូចជាការបោះបង់ការសិក្សា ការរៀនយឺត កុមារមិនចេះអាន កុមារទទួលរងនៅអំពើហិង្សា ការមិនចូលរួមរបស់អាណាព្យាបាលចំពោះការសិក្សារៀនសូត្ររបស់កូនជាដើម។ ដោយឡែកនៅក្នុងខេត្តសៀមរាប ពិសេសក្នុងស្រុកគោលដៅទាំង៥ ការអប់រំរបស់កុមារមានការីកចម្រើនជាលំដាប់តាមរយៈកិច្ចខិតខំប្រឹងប្រែងរបស់មន្ទីរអប់រំ ការិយាល័យអប់រំ សហគមន៍ អង្គការក្រៅរដ្ឋាភិបាល និងអ្នកពាក់ព័ន្ធ។
លោក វ៉េង គឹមហេង ប្រធានការិយាល័យបឋមសិក្សា នៃមន្ទីរអប់រំយុវជន និងកីឡាខេត្ដសៀមរាប មានប្រសាសន៍ថា វេទិកានេះមានសារៈសំខាន់សិក្ខាកាមបានដឹងអំពីលទ្ធផលនៃការសិក្សាររបស់កុមារ បទពិសោធនៃការអនុវត្តល្អៗរបស់លោកគ្រូ អ្នកគ្រូ អាណាព្យាបាល និងអង្គការដៃគូចំពោះការជួយគាំទ្រការសិក្សារៀនសូត្ររបស់កុមារជាពិសេស កុមារងាយរងគ្រោះ ឬកុមារបាត់បង់ឱកាសនៅក្នុងខេត្តសៀមរាប ក៏ដូចជាសមិទ្ធផលនៃការអនុវត្ត ផែនការសកម្មភាព ដែលបានលើកឡើងកាលពីវេទិការៀនសូត្រ កាលពីឆ្នាំមុន។ ជាមួយគ្នានេះ ក៏ផ្តល់ឱកាសដល់អ្នកពាក់ព័ន្ធនានាបានជជែកគ្នាអំពីបញ្ហាប្រឈមដែលធ្វើឱ្យរាំងស្ទះដល់ការ សិក្សារៀនសូត្ររបស់កុមារ ឬក៏អាចធ្វើឱ្យកុមារបាត់បង់ឱកាសក្នុងការរៀនសូត្រ និងផែនការបន្តដើម្បីធ្វើយ៉ាងណាឱ្យកុមារគ្រប់រូបមានឱកាសបានចូលរៀន និងទទួលបានគុណភាពអប់រំប្រកបដោយសមធម៌ និងបរិយាបន្ន។
លោកចាត់ទុកវេទិកានេះជាការចូលរួមចំណែកមួយផ្នែកដើម្បីជួយលើកស្ទួយគុណភាពនៃការអប់រំ នៅក្នុងខេត្តសៀមរាបដើម្បីឆ្ពោះទៅសម្រេចបាន “គោលដៅអភិវឌ្ឍប្រកបដោយចីរភាពទី៤ ឆ្នាំ២០៣០” របស់ក្រសួងអប់រំយុវជន និងកីឡា។ លោកថា សិក្ខាកាមបានចែករំលែកបទពិសោធនៃការអនុវត្តល្អៗ និងការរៀនសូត្រផ្សេងៗ ពាក់ព័ន្ធនិង លទ្ធផលនៃការរៀនសូត្ររបស់កុមារ ជាពិសេសកុមារបាត់បង់ឱកាសនៅក្នុងកំរិត បឋមសិក្សា នៅក្នុងមូលដ្ឋានខេត្តសៀមរាប។ ស្វែងរកការគាំទ្រពីសំណាក់អាជ្ញាធរ និងអ្នកពាក់ព័ន្ធក្នុងការឆ្លើយតបនឹងបញ្ហា ប្រឈមចំពោះគុណភាពនៃការសិក្សារបស់កុមារងាយរងគ្រោះ និងកុមារបាត់បង់ឱកាសសិក្សា៕
អត្ថបទ និងរូបភាព៖ លោក ឈិត សាវី
កែសម្រួល៖ លោក អ៊ុន ណារាជ្យ
