ក្រសួងកិច្ចការនារី ក្រោមការគាំទ្រមូលនិធិពិសេសនៃកិច្ចសហប្រតិបត្តិការមេគង្គ-ឡានឆាង បានរៀបចំសិក្ខាសាលាបិទគម្រោងស្តីពី “ការបញ្ជ្រាប់យេនឌ័រក្នុងសកម្មភាពអាកាសធាតុ ពង្រឹងសមត្ថភាពបន្សុំា និងភាពធន់របស់ស្ត្រីក្រីក្រនៅតាមជនបទ តាមរយៈការលើកកម្ពស់ជីវភាពរស់នៅ និងទទួលបានទឹកស្អាតប្រើប្រាស់” ដើម្បីពិនិត្យការងារក្នុងការអនុវត្តគម្រោងដែលអនុវត្តបានកន្លងមក ដែលសិក្ខាសាលានេះមានរយៈពេល២ថ្ងៃ ចាប់ពីថ្ងៃទី២៣-២៤ ខែធ្នូ ឆ្នាំ២០២៤ ក្រោមអធិបតីភាព លោកជំទាវ ស៊ីវណ្ណ បទុម រដ្ឋលេខាធិការក្រសួងកិច្ចការនារី និងចូលរួមពី លោក ឌី រ៉ាដូ អភិបាលរងខេត្តសៀមរាប និងប្រធានការិយាល័យកុងស៊ុលចិនប្រចាំខេត្តសៀមរាប ប្រទេសជាដៃគូ និងអ្នកពាក់ព័ន្ធជាច្រើនរូប។
លោក ឌី រ៉ាដូ អភិបាលរងខេត្ត មានប្រសាសន៍ថា សិក្ខាសាលាបិទគម្រោងនាថ្ងៃនេះ គឺជាសក្ខីភាពដែលបានបង្ហាញពីវឌ្ឍនភាពនៃកិច្ចសហការយ៉ាងល្អ រវាងភាគីអនុវត្តគម្រោង និងអ្នកពាក់ព័ន្ធទាំងអស់ ក្នុងការរួមចំណែកយ៉ាងសកម្ម ក្នុងបុព្វហេតុធ្វើឱ្យប្រសើរឡើងនូវភាពធន់ និងសមត្ថភាពបន្សុំារបស់ស្ត្រីក្រីក្រនៅក្នុងតំបន់គោលដៅរបស់គម្រោង តាមរយៈការលើកកម្ពស់ជីវភាពរស់នៅរបស់ពួកគាត់ និងការទទួលបានទឹកស្អាត និងអនាម័យ។ លោកក៏សូមវាយតម្លៃខ្ពស់ ចំពោះកិច្ចសហការយ៉ាងល្អរបស់ក្រសួងការបរទេស និងសហប្រតិបត្តិការអន្តរជាតិ ដែលខិតខំប្រឹងប្រែងរួមចំណែកក្នុងការងារមួយនេះ រហូតទទួលបានភាព ជោគជ័យយ៉ាងត្រចះត្រចង់នាពេលនេះ។
លោក លូ ឈីជី (Lu QiZhi) ប្រធានការិយាល័យកុងស៊ុលចិនប្រចាំខេត្តសៀមរាប បានលើកឡើងថា កិច្ចខិតខំប្រឹងប្រែងរបស់អ្នកពាក់ព័ន្ធទាំងអស់ គឺពិតជាមានសារៈសំខាន់ណាស់ ក្នុងការជំរុញភាពជោគជ័យនៃការអនុវត្តគម្រោងមួយនេះ។ ជាក់ស្ដែងសិក្ខាសាលាបិទគម្រោងនាពេលនេះ ជាសក្ខីភាពដែលបានបង្ហាញពីវឌ្ឍនភាពនៃកិច្ចសហការយ៉ាងល្អរវាងភាគីអនុវត្តគម្រោង និងអ្នកពាក់ព័ន្ធទាំងអស់ ដែលអនុវត្តសាកល្បងនៅខេត្តស្ទឹងត្រែង និងខេត្តកំពត។ ហើយលោកទន្ទឹងរង់ចាំកិច្ចសហការបន្តរបស់យើង ក្នុងបេសកកម្មបញ្ជ្រាបយេនឌ័រក្នុង សកម្មភាពអាកាសធាតុ៖ ការពង្រឹងសមត្ថភាពបន្ស៊ាំ នឹងភាពធន់របស់ស្ត្រីក្រីក្រនៅតាមជនបទ តាមរយៈការលើកកម្ពស់ជីវភាពរស់នៅ និងការទទួលបានទឹកស្អាតប្រើប្រាស់ បន្តទៀតនាពេលអនាគត។
លោកជំទាវ ស៊ីវណ្ណ បុទុម រដ្ឋលេខាធិការក្រសួងកិច្ចការនារី មានប្រសាសន៍ថា តាមរបាយការណ៍ចេញផ្សាយខែមិថុនា ឆ្នាំ២០២៤ របស់ធនាគារពិភពលោក ស្តីពីការបង្កើនភាពអង់អាចដល់ស្ត្រីសម្រាប់ភាពធន់នឹងអាកាសធាតុនៅកម្ពុជា បានបង្ហាញថា ប្រទេសកម្ពុជាទទួលបានកំណើនសេដ្ឋកិច្ចគួរឱ្យកត់សម្គាល់ និងបានលើកកម្ពស់កម្រិតជីវភាពរស់នៅក្នុងរយៈពេល ២ទសវត្សរ៍ចុងក្រោយនេះ ហើយសមភាពយេនឌ័រក៏មានភាពប្រសើរឡើងផងដែរ ជាពិសេសផ្អែកលើលទ្ធផលនៃកើនឡើងនៃមូលធនមនុស្សជាស្ត្រី និងក្មេងស្រីនៅក្នុងវិស័យអប់រំ។
លោកជំទាវ បន្តថា ទោះជាយ៉ាងណាក៏ដោយ ផលប៉ះពាល់នៃការប្រែប្រួលអាកាសធាតុ អាចធ្វើឱ្យកំណើនសេដ្ឋកិច្ចដែលរកបានយ៉ាងលំបាក រួមទាំងស្ត្រីធ្លាក់ទៅក្នុងហានិភ័យ។ ស្ត្រីនៅក្នុងសហគមន៍ដែលមានប្រាក់ចំណូលទាប និងក្រុមងាយរងគ្រោះផ្សេងទៀត ត្រូវបានរងផលប៉ះពាល់មិនសមាមាត្រ ដោយសារតែកត្តាសង្គម និងសេដ្ឋកិច្ចដែលបង្កើនភាពងាយរងគ្រោះរបស់ពួកគេកាន់តែខ្លាំង ដែលការណ៍នេះ ត្រូវជំរុញឱ្យគ្រប់ភាគីធ្វើការរួមគ្នាលើចក្ខុវិស័យរួម នៃការរួមបញ្ចូលយេនឌ័រ ដោយផ្តោតលើការពង្រឹងសមត្ថភាពបន្ស៊ាំ និង ភាពធន់របស់ស្ត្រីនៅតាមជនបទ៕
អត្ថបទ និងរូបភាព៖ លោក អ៊ុន ណារាជ្យ , ជា ស្រស់
