សាកលវិទ្យាល័យ ឯកទេស នៃកម្ពុជា សាខាខេត្តសៀមរាប បានរៀបចំសន្និសីទ ស៊ី យូ អេស ២០២៤ ស្តីពី ការសិក្សានៅឧត្ដមសិក្សា និងឱកាសការងារ ក្នុងគោលបំណងជួយតម្រង់ទិស ដល់សិស្សានុសិស្សក្នុងការជ្រើសរើសជំនាញ ឯកទេសសិក្សា នៅថ្នាក់ឧត្តមសិក្សាឲ្យបានត្រឹមត្រូវ ការស្វែងយល់អំពីកត្តាជោគជ័យក្នុងការងារ និងមុខរបរ ការយល់ដឹងអំពីលក្ខណសម្បត្តិរបស់បុគ្គលជោគជ័យសម្រាប់ជាជំនួយស្មារតីដល់ សិស្សានុសិស្ស ក្នុងការរៀបចំអនាគតរបស់ខ្លួនឲ្យបានល្អប្រសើរ ព្រមទាំងបង្កើនភាពជាដៃគូ និងពង្រីកកិច្ចសហប្រតិបត្តិការរបស់ សាកលវិទ្យាល័យ ជាមួយស្ថាប័ននានា ដែលមានសក្តានុពលក្នុងការជួយលើកស្ទួយ សេវានិស្សិតរបស់ សាកលវិទ្យាល័យឱ្យកាន់តែប្រសើរឡើង។ ដែលកម្មវិធីនេះបានធ្វើឡើងកាលពីថ្ងៃទី២១ ខែធ្នូ ឆ្នាំ២០២៤ នៅសាកលវិទ្យាល័យ ឯកទេសនៃកម្ពុជា សាខាខេត្តសៀមរាប។
លោក បណ្ឌិត មាស បូរ៉ា បានមានប្រសាសន៍ថា ការធ្វើសន្និសីទថ្ងៃនេះពិតជាមានសារៈសំខាន់ ដែលប្រធានបទថ្ងៃនេះ នឹងប្រាប់គ្រប់ព័ត៌មានទាំងអស់ ជូនដល់ប្អូនៗនិស្សិតទាំងថ្មី ទាំងចាស់អាចគិតយកទៅពិចារណា ដើម្បីរៀបផែនការពីឆ្នាំទី១ ដល់ឆ្នាំទី៤ ធ្វើម៉េចរៀនឱ្យពូកែ បានលទ្ធផលល្អ និងចុងបញ្ចប់ ទទួលបានការងារធ្វើមានប្រាក់បៀវត្សខ្ពស់ ។
ព័ត៌មានជាតិ ថ្មីៗ
លោកបណ្ឌិតបានបញ្ជាក់ថា ក្នុងសន្និសីទនេះ ប្អូនៗនិស្សិតត្រូវដឹង ពីប្រភេទការងារ មានតម្រូវការអ្វីខ្លះ ដែលនឹងត្រូវបកស្រាយដោយវាគ្មិនជំនាញមកពីធនាគារ BIDC និងក្រុមហ៊ុនធានារ៉ាប់រង FWD ដែលប្រាប់អំពីគុណសម្បត្តិ អ្នកដែលអាចមានសមត្ថភាព ក្នុងការបម្រើការងារនៅក្នុងធនាគារ ឬក្នុងស្ថាប័នផ្សេងៗជាច្រើនទៀត ដែលនឹងកំពុងដាក់តាំងបង្ហាញតាមប៊ូតក្នុងកម្មវិធីនេះផងដែរ។
ជាមួយគ្នានេះដែរ សាកលវិទ្យាល័យបានចុះអនុស្សារណៈយោគយល់ជាមួយស្ថាប័ន្តជាច្រើន និងបានបន្តចុះអនុស្សារណៈយោគយល់ជាមួយសាលាជំនាញព័ត៌មានវិទ្យា អេស អាយ ធី អេស និងសាលា ប៊ី ស៊ី ស្គូល ព្រមទាំងបានសហការ ជាមួយធនាគារវិនិយោគ និងអភិវឌ្ឍន៍កម្ពុជា ភីអិលស៊ី (BIDC) និងក្រុមហ៊ុន FWD Life Insurance Cambodia ដើម្បីបង្កលក្ខណៈងាយស្រួល ដល់និស្សិត ចុះកម្មសិក្សា ហាត់ការ រកការងារធ្វើ ជាក់ស្តែងផងដែរ។
សូមបញ្ជាក់ដែរថា សាកលវិទ្យាល័យ ឯកទេស នៃកម្ពុជា សាខាខេត្តសៀមរាប ស្ថិតនៅផ្លូវជាតិលេខ៦ ភូមិគ្រួស សង្កាត់ស្វាយដង្គុំ ក្រុងសៀមរាប ខេត្តសៀមរាប ដែលមានមហាវិទ្យាល័យចំនូន៤ និងឯកទេសសិក្សាចំនួន១៥ ឯកទេស
- មហាវិទ្យាល័យ សិល្បៈ មនុស្សសាស្ត្រ និងភាសា មានឯកទេស អក្សរសាស្ដ្រអង់គ្លេស អក្សរសាស្ដ្រខ្មែរ ប្រវត្ដិវិទ្យា ភូមិវិទ្យា និងឯកទេសវិទ្យាសាស្ត្រអប់រំ។
- មហាវិទ្យាល័យ វិទ្យាសាស្ត្រ និងបច្ចេកវិទ្យា មានឯកទេសវិទ្យាសាស្ដ្រកុំព្យូទ័រ គណិតវិទ្យា រូបវិទ្យា គីមីវិទ្យា និងឯកទេសជីវវិទ្យា។
- មហាវិទ្យាល័យ គ្រប់គ្រងពាណិជ្ជកម្ម និងសេដ្ឋកិច្ច មានឯកទេសគ្រប់គ្រងពាណិជ្ជកម្ម គណនេយ្យ ហិរញ្ញវត្ថុ និងធនាគារ គ្រប់គ្រងសណ្ឋាគារ និងទេសចរណ៍ និងឯកទេស ម៉ាឃីតធីង ។
- មហាវិទ្យាល័យ វិទ្យាសាស្ត្រសង្គម និងនីតិសាស្ត្រ មានឯកទេសនីតិសាធារណៈ។
ដែលបច្ចុប្បន្ននេះការបណ្តុះបណ្តាលកម្រិតបរិញ្ញាបត្ររង បរិញ្ញាបត្រ និងបរិញ្ញាបត្រជាន់ខ្ពស់ មាននិស្សិតកំពុងសិក្សាចំនួន ២៦០០នាក់ នៅក្នុងសាខាខេត្តសៀមរាប ។
អត្ថបទ ៖ហាំ ម៉េងហួត
