នៅថ្ងៃទី២៤ ខែធ្នូ ឆ្នាំ២០២៤នេះ អាជ្ញាធរខេត្តសៀមរាប បានបន្តបើកវេទិកាផ្សព្វផ្សាយ និងពិគ្រោះយោបល់របស់ក្រុមប្រឹក្សាខេត្ត អាណត្តិទី៤ ឆ្នាំ២០២៤ សម្រាប់គោលដៅទី១០ ស្រុកសូទ្រនិគម ក្រោមការដឹកនាំរបស់ ឯកឧត្តម តោ គឹមស៊ាន សមាជិកក្រុមប្រឹក្សាខេត្ត និង លោកស្រី ម៉ននី រង្សី អភិបាលរងខេត្តដោយមានការចូលរួមពី ឯកឧត្តមលោក ជំទាវសមាជិកក្រុមប្រឹក្សាខេត្ត ថ្នាក់ដឹកនាំមន្ទីរអង្គភាព អាជ្ញាធរមូលដ្ឋាន លោកគ្រូអ្នកគ្រូ សិស្សានុសិស្ស និងប្រជាពលរដ្ឋជាច្រើនរូប។
ឯកឧត្តម តោ គឹមស៊ាន មានប្រសាសន៍ថា វេទិកាផ្សព្វផ្សាយ និងពិគ្រោះយោបល់នាពេលនេះ ធ្វើឡើងក្នុងគោលបំណងផ្ដល់ព័ត៌មានជូនប្រជាពលរដ្ឋអំពីសមិទ្ធផល ដែលក្រុមប្រឹក្សាសម្រេចបានកន្លងមក និងបញ្ហាប្រឈមដែលត្រូវដោះស្រាយបន្ត ទទួលសំណួរ និងសំណូមពររបស់ប្រជាពលរដ្ឋ ដែលជាបញ្ហាជីវភាពប្រចាំថ្ងៃ និងក្ដីកង្វល់នានា ដើម្បីធ្វើការឆ្លើយតប និងដោះស្រាយជូន បង្កើនភាពជិតស្និតរវាងប្រជាពលរដ្ឋ និងអាជ្ញាធរ ដើម្បីឱ្យការផ្ដល់សេវាសាធារណ:នានា ជូនពលរដ្ឋក្នុងមូលដ្ឋានកាន់តែមានភាពល្អប្រសើរ។ ក្នុងន័យនេះ បងប្អូនអាចលើកនូវទុក្ខកង្វល់ បញ្ហាប្រឈម និងសំណូមពររបស់បងប្អូន ដោយផ្ទាល់ និងសរសេរជាក្រដាស ដើម្បីឱ្យក្រុមការងារប្រមូលមកធ្វើការស្រាយបំភ្លឺ ឈានទៅរកដំណោះស្រាយចំគោលដៅ មានប្រសិទ្ធភាព និងទាន់ពេលវេលា។
សូមជម្រាបថា សម្រាប់វេទិកាផ្សព្វផ្សាយនាពេលនេះដែរ ក្រុមការងារបានទទួលសំណួរសំណូមពរមួយចំនួន ជុំវិញបញ្ហាផ្លូវ បញ្ហាទំនាស់ដីធ្លី ការស្តារប្រឡាយទឹក បញ្ហាការចុះបញ្ជីដីធ្លីដែលមានទំនាស់ បញ្ហាប្រជាពលរដ្ឋធ្វើស្រែចូលក្នុងដីតំបន់៣ បឹងទន្លេសាប។ ចំពោះសំណួរសំណូមពរទាំងអស់ មន្ត្រីជំនាញ និងអ្នកពាក់ព័ន្ធ បានធ្វើការស្រាយបំភ្លឺ និងឆ្លើយតប ជូនដល់បងប្អូនប្រជាពលរដ្ឋ ហើយចំពោះបញ្ហាដែលមិនទាន់បានបកស្រាយ ក្រុមការងារនឹងទទួលយកទៅពិនិត្យពិភាក្សា ក្នុងក្របខណ្ឌក្រុមប្រឹក្សាខេត្ត ហើយនឹងធ្វើការឆ្លើយតបជាលាយលក្ខណ៍អក្សរជូនដល់ម្ចាស់សំណួរសំណូមពរ តាមរយៈក្រុមប្រឹក្សាស្រុក ភូមិឃុំ នាពេលឆាប់ៗខាងមុខ។
ព័ត៌មានជាតិ ថ្មីៗ
លោកស្រី ម៉ននី រង្សី អភិបាលរងខេត្ត បានថ្លែងនូវការកោតសរសើរ ចំពោះប្រជាពលរដ្ឋក្នុងស្រុកសូទ្រនិគម ដែលបានលើកឡើងនូវសំណើ និងសំណួរសំណូមពរយ៉ាងផុសផុលក្នុងអង្គវេទិកានាថ្ងៃនេះ ដែលសបញ្ជាក់ឱ្យឃើញថា ប្រជាពលរដ្ឋមានជំនឿទុកចិត្តជាមួយរដ្ឋបាលគ្រប់ជាន់ថ្នាក់ ក្នុងការដោះស្រាយនូវរាល់បញ្ហាប្រឈមរបស់បងប្អូន នឹងជួយជំរុញដល់ការអនុវត្តមុខងារគ្រប់ស្ថាប័នពាក់ព័ន្ធ រួមនឹងអាជ្ញាធរមូលដ្ឋាន ឱ្យការដោះស្រាយប្រកបដោយតម្លាភាព និងមានប្រសិទ្ធភាព ស្របតាមច្បាប់លិខិតបទដ្ឋានគតិយុត្តនៅថ្នាក់មូលដ្ឋាន។
ថ្លែងបិទអង្គវេទិកា ឯកឧត្តម តោ គឹមស៊ាន បានគូសបញ្ជាក់ថា វេទិកានាពេលនេះ ពិតជាមានសារៈសំខាន់ណាស់ ក្នុងការជួយជំរុញដល់ការអនុវត្តមុខងាររបស់អ្នកពាក់ព័ន្ធ រួមនឹងអាជ្ញាធរមូលដ្ឋាន ឱ្យកាន់តែមានប្រសិទ្ធភាព ស្របតាមច្បាប់លិខិតបទដ្ឋានគតិយុត្តនៅថ្នាក់មូលដ្ឋាន។ ក្នុងនោះការពិនិត្យ និងដោះស្រាយបញ្ហា សំណួរសំណូមពររបស់បងប្អូនប្រជាពលរដ្ឋ នឹងជួយជំរុញដល់ការអភិវឌ្ឍសេដ្ឋកិច្ចសង្គម សំដៅលើកកម្ពស់គុណភាពជីវិត កាត់បន្ថយភាពក្រីក្ររបស់បងប្អូនប្រជាពលរដ្ឋ នៅតាមបណ្ដាក្រុងស្រុក នៃខេត្តសៀមរាបទាំងមូលផងដែរ៕
អត្ថបទ និងរូបភាព៖ លោក ទ្រា ពន្លឺ, មុី សុខារិទ្ធ
កែសម្រួល៖ លោក អ៊ុន ណារាជ្យ
