នៅរសៀលថ្ងៃទី២៥ ខែធ្នូ ឆ្នាំ២០២៤នេះ គណៈកម្មការគ្រប់គ្រង និងអភិវឌ្ឍន៍ទេសចរណ៍សៀមរាប-អង្គរ (គ.អ.ទ.ស) និងអាជ្ញាធរខេត្តសៀមរាប បានរៀបចំកិច្ចប្រជុំស្ដីពីគម្រោងអភិវឌ្ឍន៍សង្កាត់ទេសចរណ៍គំរូ ក្នុងក្រុងសៀមរាប នៅចំណុចផ្សារចាស់ វត្តរាជបូណ៌ និង វត្តព្រះព្រហ្មរ័ត្ន ដែលកិច្ចប្រជុំនេះ ដឹកនាំដោយ ឯកឧត្តម អាំង សុវណ្ណរ័ត្ន អនុប្រធានលេខាធិការដ្ឋាន គ.អ.ទ.ស និង លោក ង៉ូវ សេងកាក់ អភិបាលរងខេត្ត ដោយមានការចូលរួមពីថ្នាក់ដឹកនាំមន្ទីរអង្គភាពក្នុងខេត្ត អាជ្ញាធរក្រុង និងអ្នកពាក់ព័ន្ធជាច្រើនរូប។
ឯកឧត្តម អាំង សុវណ្ណរ័ត្ន មានប្រសាសន៍ថា គម្រោងអភិវឌ្ឍន៍សង្កាត់ទេសចរណ៍គំរូ ក្នុងក្រុងសៀមរាប មានទីតាំងស្របតាមមាត់ស្ទឹងសៀមរាប ដោយបានកំណត់គោលដៅទាក់ទាញធំៗចំនួន៣ គឺផ្សារចាស់ វត្តរាជបូណ៌ និងវត្តព្រះព្រហ្មរ័ត្ន ដែលជាគោលដៅទេសចរថ្មី ដើម្បីជាការទាក់ទាញភ្ញៀវទេសចរ ជំរុញការស្នាក់នៅខេត្តសៀមរាប ឱ្យបានកាន់តែយូរជាងមុន។ ជាមួយគ្នានេះ ដើម្បីធានាបាននូវប្រសិទ្ធភាពការងារនៃការរៀបចំគម្រោងនេះ ពិតណាស់ត្រូវមានការសហការពីអាជ្ញាធរពាក់ព័ន្ធ ដើម្បីផ្ដល់ព័ត៌មាន និងទិន្នន័យផ្សេងៗ និងចុះពិនិត្យទីតាំងជាក់ស្ដែង ដើម្បីបង្កភាពងាយស្រួលក្នុងការដោះស្រាយបញ្ហាប្រឈមនានា។
ព័ត៌មានជាតិ ថ្មីៗ
ក្នុងនាមអាជ្ញាធរខេត្ត លោក ង៉ូវ សេងកាក់ អភិបាលរងខេត្ត បានបង្ហាញការសាទរ ចំពោះគម្រោងមួយនេះ ដែលជាគម្រោងថ្មីមួយទៀត សម្រាប់ខេត្តសៀមរាប ក្នុងការបង្កើតតំបន់ទេសចរណ៍កែច្នៃបន្ថែម ដើម្បីទាក់ទាញភ្ញៀវទេសចរមកកម្សាន្ត និងបន្តការស្នាក់បានកាន់តែយូរជាងមុន។ កិច្ចការនេះ ជាកិច្ចការរួមដែលរដ្ឋបាលខេត្ត ក្រុង មន្ទីរអង្គភាពពាក់ព័ន្ធ និងគណៈកម្មការគ្រប់គ្រង និងអភិវឌ្ឍន៍ទេសចរណ៍សៀមរាប-អង្គរ ក្នុងការសម្របសម្រួល ប្រមូលទិន្នន័យជាក់ស្ដែង សិក្សាផលប៉ះពាល់បឋម និងអត្ថប្រយោជន៍គម្រោងមួយនេះ។
សូមបញ្ជាក់ថា បើតាមផែនការ គម្រោងនេះនឹងអនុវត្តនៅក្នុងឆ្នាំ២០២៥-២០២៦ ដើម្បីពង្រឹង និងលើកកម្ពស់សេវាកម្មទេសចរណ៍ លើកកម្ពស់ជីវភាពប្រជាជនក្នុងមូលដ្ឋាន ចូលរួមកាត់បន្ថយភាពក្រីក្រ និងចង់ប្រែក្លាយតំបន់សង្កាត់ទេសចរណ៍គំរូ ជាគោលដៅទេសចរណ៍ដ៏ទាក់ទាញប្រកបដោយគុណភាព សម្រាប់ភ្ញៀវទេសចរមកកម្សាន្តគ្រប់រដូវកាល៕
អត្ថបទ និងរូបភាព៖ លោក ហាំ ម៉េងហួត
កែសម្រួល៖ លោក អ៊ុន ណារាជ្យ
