ដើម្បីចូលរួមបង្កើតនូវភាពសប្បាយរីករាយជូនប្រជាពលរដ្ឋ ដែលរស់នៅក្នុងក្រុងរុនតាឯកតេជោសែន ក៏ដូចជាបណ្ដាស្រុកជិតខាង ក្នុងភូមិសាស្ត្រខេត្តសៀមរាប នាឱកាសបុណ្យណូអែល និងត្រៀមឆ្លងឆ្នាំសកលខាងមុខនេះ ក្រុមហ៊ុន Agent 21 Global នាល្ងាចថ្ងៃទី២៥ ខែធ្នូនេះ បានរៀបចំនូវកម្មវិធីកម្សាន្តសប្បាយ រួមជាមួយទស្សនីយភាពសិល្បៈបុរាណសម័យ ដើម្បីអាចឱ្យប្រជាពលរដ្ឋចូលរួមកម្សាន្តសប្បាយដោយសេរី។
លោកស្រី លី ច័ន្ទ្រលក្ស្មី អគ្គនាយិកា ក្រុមហ៊ុន Agent 21 Global លើកឡើងថា ការបង្កើតឱ្យមានកម្មវិធីកម្សាន្តនេះឡើង ក្នុងគោលបំណងបង្កើនសាមគ្គីភាព និងមិត្តភាពជាមួយប្រជាពលរដ្ឋនៅក្នុងក្រុងដ៏ថ្មីស្រឡាង ជាមួយនឹងការអភិវឌ្ឍយ៉ាងឆាប់រហ័សនេះ។ មួយវិញទៀត លោកស្រី ចង់ផ្ដល់ស្នាមញញឹមដល់កុមារនៅទីនេះ ក៏ដូចជាភាពក្លាហានដល់ពួកគេតាមរយៈការបង្ហាញសមត្ថភាពក្នុងកម្មវិធីនេះផងដែរ។
ក្នុងនាម ក្រុមហ៊ុន Agent 21 Global ដែលជាក្រុមហ៊ុនអភិវឌ្ឍលំនៅឋាន ក្នុងក្រុងរុនតាឯកតេជោសែននេះ លោកស្រី ចង់ឃើញកុមារតូច និងយុវជនយើងទាំងអស់គ្នា បានសិក្សាតាំងពីថ្នាក់ដំបូង រហូតដល់ថ្នាក់បញ្ចប់គ្រប់ៗគ្នា និងសុំអំពាវនាវ ដល់មាតិបិតាជំរុញកូនៗឱ្យទៅសាលា ជាពិសេសសូមកុំយកកូនៗទៅតាម នៅពេលចំណាកស្រុក ព្រោះមានតែការសិក្សានេះទេ ដែលជាស្ពានជួយពួកគាត់ទៅថ្ងៃអនាគត ហើយពួកគាត់ទាំងអស់គ្នាសុទ្ធសឹងជាទំពាំងស្នងឬស្សីដ៏សំខាន់ក្នុងចូលរួមអភិវឌ្ឍសង្គមជាតិនាថ្ងៃអនាគត។
អញ្ជើញជាអធិបតីក្នុងកម្មវិធីនេះ លោក លី សារី អភិបាលរងខេត្តសៀមរាប បានបង្ហាញការគាំទ្រ ដល់ក្រុមហ៊ុន Agent 21 Global ដែលបានរៀបចំកម្មវិធីដ៏សប្បាយរីករាយ និងមានអត្ថន័យនាថ្ងៃនេះឡើង។ ក្រោមចក្ខុវិស័យដ៏វែងឆ្ងាយរបស់ម្ដេចតេជោ ហ៊ុន សែន និងសម្ដេចធិបតី ហ៊ុន ម៉ាណែក ក្រុងទី២របស់ខេត្តសៀមរាប ទទួលបានអភិវឌ្ឍដ៏ឆាប់រហ័ស និងនៅតែអភិវឌ្ឍជាបន្តបន្ទាប់។ ជាការពិតណាស់ការអភិវឌ្ឍនេះ ចាំបាច់ត្រូវមានការចូលរួមពីបងប្អូនប្រជាពលរដ្ឋនៅទីនេះផ្ទាល់ និងអ្នកពាក់ព័ន្ធដទៃទៀតផងដែរ។ ជាក់ស្ដែង ក្រុមហ៊ុន Agent 21 Global តែងតែបានចូលរួមជាមួយអាជ្ញាធរខេត្ត ក្នុងការអភិវឌ្ឍក្រុងថ្មីរបស់យើងឱ្យកាន់តែមានភាពរស់រវើក និងសប្បាយរីករាយក្នុងមូលដ្ឋានផ្ទាល់។
ជាមួយគ្នានោះ លោកអភិបាលរងខេត្តក៏សូមថ្លែងអំណរគុណ និងកោតសរសើរ ដល់ក្រុមហ៊ុន Agent 21 Global និងលោកស្រីនាយិកា ដែលបានចូលរួមលើកកម្ពស់ភាពអង់អាចរបស់កុមារ និងយុវជន ជាពិសេសបានគិតគូរខ្ពស់ដល់វិស័យអប់រំក្នុងមូលដ្ឋាន តាមរយៈការឧបត្ថម្ភ និងគាំទ្រដល់ក្មួយៗសិល្បករ សិល្បការីនី និងបានផ្ដល់ជាអាហារូបករណ៍ដល់សិស្សទទួលបាននិទ្ទេស A (អេ) កន្លងមក។
អត្ថបទ និងរូបភាព៖ លោក អ៊ុន ណារាជ្យ
