គិតត្រឹមថ្ងៃទី២០ ខែវិច្ឆិកា ឆ្នាំ២០២៤ ឡដុតសំណល់វេជ្ជសាស្ត្រចំនួន ០២ នៅក្នុងមន្ទីរពេទ្យបង្អែកខេត្តសៀមរាប ត្រូវបញ្ឈប់ការប្រើប្រាស់ជាផ្លូវការ ដោយជំនួសមកវិញ នូវការប្រើប្រាស់សេវារបស់ក្រុមហ៊ុនជំនាញក្នុងការប្រមូល និងប្រព្រឹត្តកម្មសំណល់វេជ្ជសាស្ត្រ ក្រៅពីបរិវេណមន្ទីរពេទ្យ។
តាមការបញ្ជាក់របស់ ឱសថការី សាន សាវុធ អ្នកគ្រប់គ្រងសំណល់វេជ្ជសាស្ត្រ នៃមន្ទីរពេទ្យបង្អែកខេត្តសៀមរាប បង្ហាញថា នាពេលកន្លងមក ថ្នាក់ដឹកនាំមន្ទីសុខាភិបាល នៃរដ្ឋបាលខេត្ត និងមន្ទីរពេទ្យបង្អែកខេត្ត បានយកចិត្តទុកដាក់ខ្ពស់ និងខិតខំរកដំណោះស្រាយ ដើម្បីធ្វើយ៉ាងណា ធ្វើឱ្យបរិស្ថាននៅក្នុងបរិវេណ និងជុំវិញមន្ទីរពេទ្យ ផ្ដល់បាននូវសុខុមាលភាពជូនអ្នកជំងឺ និងប្រជាពលរដ្ឋ។ ដោយមានការគាំទ្រ និងអនុញ្ញាតដោយក្រសួងសុខាភិបាល និងក្រសួងបរិស្ថាន មន្ទីរពេទ្យ បានសម្រេចចុះកិច្ចសន្យាជាមួយក្រុមហ៊ុនប្រមូលសំណល់វេជ្ជសាស្ត្រ ដែលផ្ដល់ទំនុកចិត្តដល់មន្ទីរពេទ្យមានលទ្ធភាពបញ្ឈប់ការប្រើប្រាស់ឡដុតសំណល់វេជ្ជសាស្ត្រទាំងស្រុងប្រមាណជាង ០១ខែកន្លងមក។
ព័ត៌មានជាតិ ថ្មីៗ
គួរជម្រាបដែរថា ក្រៅពីការចុះកិច្ចសន្យាជាមួយក្រុមហ៊ុនឯកជន មន្ទីរពេទ្យបង្អែកខេត្តសៀមរាប ក៏ទទួលម៉ាស៊ីន ស្ទេរីវែល ដែលជាជំនួយរបស់អង្គការ Unicef តាមរយៈក្រសួងសុខាភិបាល ក្នុងការត្រៀមធ្វើប្រព្រឹត្តិកម្មសំណល់វេជ្ជសាស្រ្ត ក្នុងករណីក្រុមហ៊ុនមានការអាក់ខាន ក្នុងការប្រមូលសំណល់វេជ្ជសាស្រ្តរបស់មន្ទីរពេទ្យក្នុងកម្រិតតិចតួច ប៉ុន្តែបច្ចុប្បន្នមន្ទីរពេទ្យ មិនទាន់មានការប្រើប្រាស់ឧបករណ៍នេះឡើយ។
អត្ថបទ និងរូបភាព : លោក ធន់ ពូថេ
