រយៈពេល២ថ្ងៃ គឺនៅថ្ងៃទី២៥-២៦ ខែធ្នូ ឆ្នាំ២០២៤នេះ គណៈកម្មការគ្រប់គ្រង និងអភិវឌ្ឍន៍ទេសចរណ៍សៀមរាប-អង្គរ (គ.អ.ទ.ស) ដឹកនាំដោយ ឯកឧត្តម អាំង សុវណ្ណរ័ត្ន អនុប្រធានលេខាធិការដ្ឋាននៃ គ.អ.ទ.ស ដោយមានការចូលរួមពីអាជ្ញាធរខេត្ត និងមន្ទីរអង្គភាពពាក់ព័ន្ធ បានចុះសិក្សាស្វែងយល់ប្រមូលទិន្នន័យពីសក្ដានុពលនៃគម្រោងអភិវឌ្ឍន៍សង្កាត់ទេសចរណ៍គំរូ ស្របតាមមាត់ស្ទឹងសៀមរាប ដោយកំណត់គោលដៅទាក់ទាញធំៗចំនួន៥ គឺវត្តរាជបូណ៌ វត្តព្រះព្រហ្មរ័ត្ន វត្តដំណាក់ ផ្សារចាស់ និងតំបន់ផាប់ស្ទ្រីត ក្រុងសៀមរាប ដើម្បីឈានទៅការរៀបចំជាវត្តទេសចរណ៍គំរូ និងគោលដៅមានសក្តានុពលទាក់ទាញទេសចរណ៍។
ឯកឧត្តម អាំង សុវណ្ណរ័ត្ន បានបញ្ជាក់ថា គម្រោងរៀបចំអភិវឌ្ឍន៍សង្កាត់ទេសចរណ៍គំរូ ផ្សារភ្ជាប់ជាមួយវត្តអារាម គឺជាសូចនាកររបស់រាជរដ្ឋាភិបាល ក៏ដូចជាក្រសួងទេសចរណ៍ សំដៅពង្រឹងឱ្យមានការចូលរួមទាំងអស់គ្នា ជួយជ្រោមជ្រែងវិស័យទេសចរណ៍នៅកម្ពុជា ជាពិសេសនៅខេត្តសៀមរាប ឱ្យមានស្ថិរភាព និងនិរន្តរភាព តាមរយៈការរៀបចំ ចងឯកសារក្រងផ្សព្វផ្សាយនូវសាវតា ប្រវត្តិ និងចំណុចពិសេសៗរបស់ទីអារាមដែលមានវ័យចំណាស់ៗ និងគោលដៅទេសចរណ៍សំខាន់ៗក្នុងក្រុង ដើម្បីបង្ហាញដល់ភ្ញៀវឱ្យពួកគាត់ទទួលបាននូវព័ត៌មានពិត និងពេញលេញ ស្របជាមួយនឹងបដិសណ្ឋារកិច្ចកក់ក្ដៅ ទីតាំងមានអនាម័យ បរិស្ថានល្អ ភ្ញៀវទទួលបាននូវផាសុកភាព សុវត្ថិភាព និងតម្លៃសមរម្យ។
ឯកឧត្តម អាំង សុវណ្ណរ័ត្ន ក៏បានលើកទឹកចិត្ត និងជំរុញដល់គោលដៅវត្តអារាម ដែលមានវ័យចំណាស់ និងមានសក្តានុពលនៅតំបន់ប្រមូលផ្តុំទេសចរណ៍ ក្នុងសង្កាត់ទាំង២ នៃក្រុងសៀមរាប សូមសហការចងក្រងសាវតា ប្រវត្តិ និងរចនាបទស្ថាបត្យកម្មសំណង់ នៃវត្តមួយៗឱ្យបានច្បាស់លាស់ និងវិធានសុជីវធម៌ ទាំងភាសាជាតិ និងអន្តរជាតិ បិទនៅលើបញ្ជរគោលដៅទស្សនា និងគួរបង្កើតឱ្យមានមគ្គុទេសប្រចាំវត្ត សម្រាប់បរិយាយប្រវត្តិរឿងរ៉ាវនៃទីអារាមនោះទៅកាន់ភ្ញៀវដែលមកទស្សនា ដើម្បីពួកគាត់បានស្វែងយល់ និងស្គាល់ពីវប្បធម៌ ប្រពៃណី ទំនៀមទម្លាប់ និងជីវភាពប្រចាំថ្ងៃរបស់យើង នៅតាមសហគមន៍វត្តអារាម។
ឯកឧត្តមបន្ថែមថា គម្រោងរៀបចំអភិវឌ្ឍន៍សង្កាត់ទេសចរណ៍គំរូ នៅក្រុងសៀមរាប គឺជាចក្ខុវិស័យស្តារ និងលើកស្ទួយវិស័យទេសចរណ៍ខេត្តសៀមរាប ឱ្យបានល្អប្រសើរ ជំរុញការទាក់ទាញភ្ញៀវទេសចរអន្តរជាតិ និងក្នុងស្រុក ឱ្យទៅលំហែកម្សាន្តយ៉ាងច្រើនកុះករនៅខេត្តសៀមរាប បង្កើនការរីកលូតលាស់អាជីវកម្មទេសចរណ៍ និងធ្វើឱ្យប្រជាពលរដ្ឋនៅក្នុងខេត្តនេះ និងតំបន់ជុំវិញទទួលបានផលពីការរីកចម្រើននៃវិស័យទេសចរណ៍បន្ថែមទៀត៕
អត្ថបទ និងរូបភាព៖ លោក យូ វង្ស
កែសម្រួល៖ លោក អ៊ុន ណារាជ្យ
