ថ្លែងនៅក្នុងពិធីបើកព្រឹត្តិការណ៍បុណ្យបង្ហើរខ្លែងឯកខ្មែរ និងខ្លែងសេរី នៅខាងក្នុងបរិវេណអាកាសយានដ្ឋានអន្តរជាតិសៀមរាបចាស់នៅរសៀល ថ្ងៃទី២៧ ខែធ្នូ ឆ្នាំ២០២៤ លោក លី សារី អភិបាលរង នៃគណៈអភិបាលខេត្តសៀមរាប មានប្រសាសន៍ថា៖ការបង្ហើរខ្លែងខ្មែរ មិនគ្រាន់តែបង្កបរិយាកាសឱ្យប្រជាពលរដ្ឋ សាធារណជន ទស្សនាប្រកបដោយសេចក្ដីសប្បាយរីករាយប៉ុណ្ណោះទេ ប៉ុន្តែវាជាការផ្ទេរនូវចំណេះដឹងខាងទំនៀមទម្លាប់ប្រពៃណី ដល់យុវជនជំនាន់ក្រោយឱ្យបានស្គាល់ យល់ដឹង និងចូលរួមប្រតិបត្តិ ថែរក្សាការពារ លើកស្ទួយអត្តសញ្ញាណជាតិ តម្លៃវប្បធម៌អរូបី ព្រមទាំងចូលរួមយ៉ាងសកម្មក្នុងការសិក្សាស្រាវជ្រាវ ចងក្រងរក្សាទុកនូវឯកសារបេតិកភណ្ឌវប្បធម៌នេះ ឱ្យបានស្ថិតស្ថេរគង់វង្ស។
លោក លី សារី បន្តថា៖ព្រឹត្តិការណ៍បុណ្យបង្ហើរខ្លែងឯកខ្មែរ និងខ្លែងសេរី នាឱកាសនេះ ក៏បានចូលរួមចំណែកយ៉ាងសំខាន់ ក្នុងការទាក់ទាញកំណើនភ្ញៀវទេសចរជាតិ និងអន្តរជាតិ ឱ្យមកទស្សនាខេត្តសៀមរាបកាន់តែច្រើនឡើង ស្របតាមយុទ្ធនាការ «ទស្សនាសៀមរាប ឆ្នាំ២០២៤»ផងដែរ។ ទន្ទឹមនឹងនេះ សម្រាប់ឆ្នាំ២០២៥ ខាងមុខ ដើម្បីបន្តរក្សាកំណើន និងទាក់ទាញភ្ញៀវទេសចរណ៍ និងថែរក្សាបាននូវប្រពៃណីទំនៀមទម្លាប់ជាតិយើង។ ហេតុនេះសូមអំពាវនាវដល់ថ្នាក់ដឹកនាំមន្ទីរ អង្គភាព រដ្ឋបាលក្រុង ស្រុក វិស័យឯកជន បងប្អូនប្រជាពលរដ្ឋ ភ្ញៀវទេសចរជាតិ និងអន្តរជាតិទាំងអស់ មេត្តាបន្តគាំទ្រឱ្យបានផុលផុស ដើម្បីបន្តការរៀបចំនូវកម្មវិធី និងព្រឹត្តិការណ៍នានា ក្នុងខេត្តសៀមរាបយើងនៅឆ្នាំបន្តបន្ទាប់ទៀត។
ជាមួយគ្នានេះដែរ លោក មួន សុភាព ប្រធានមន្ទីរវប្បធម៌ និងវិចិត្រសិល្បៈខេត្តសៀមរាប បានលើកឡើងថា ការបង្ហើរខ្លែង បានកើតមានឡើងនៅក្នុងប្រពៃណីរបស់ខ្មែរ រាប់ពាន់ឆ្នាំមកហើយ ប៉ុន្តែមួយរយៈកាលកន្លងមកនេះ ខ្លែងខ្មែរ ជាពិសេសខ្លែងឯកនេះ ស្ទើរតែបាត់បង់ដោយសារតែពលរដ្ឋយើងមួយចំនួនមានជំនឿថា ខ្លែងជាវត្ថុអពមង្គល ដែលតាមការពិតខ្លែងនេះដូនតាខ្មែរបង្កើតមកជាវត្ថុតំណាងឲ្យសុភមង្គល។
លោកមួង សុភាព បន្តថា ដោយសារតែជំនឿរមិនសមហេតុផលនេះ ទើបថ្នាក់ដឹកនាំស្ថាប័នជាតិបានគិតគូរយកចិត្តទុកដាក់រៀបចំឲ្យមានព្រឹត្តិការណ៍នានាដែលទាក់ទងនឹងខ្លែងនេះ ក្នុងនោះក្រសួងវប្បធម៌ និងវិចិត្រសិល្បៈ ក៏មានបំណងយកខ្លែងឯករបស់ខ្មែរនេះ ចុះក្នុងបញ្ជីសម្បត្តិបេតិកភណ្ឌពិភពលោកផងដែរ។ លោកបញ្ជាក់ថា ដោយសារហេតុនេះទើបក្រសួងវប្បធម៌ និងវិចិត្រសិល្បៈ ខិតខំបំផុសចលនាបង្ហើរខ្លែងនេះ ព្រោះការចូលជាសម្បត្តិបេតិកភណ្ឌពិភពលោកនេះ យើងអាចអភិរក្ស និងផ្សព្វផ្សាយអំពីខ្លែងយើងបានទូលំទូលាយ។
សូមជំរាបថា៖ព្រឹត្តិការណ៍បង្ហើរខ្លែងនេះ មានខ្លែងឯក ខ្លែងសេរី និងខ្លែងតូចៗ សរុបចំនួនប្រមាណ ៥០០ខ្លែង ។ព្រឹត្តិការណ៍នេះមានរយៈពេលបីថ្ងៃចាប់ពីថ្ងៃទី២៧ ដល់ថ្ងៃទី២៩ ខែធ្នូ ឆ្នាំ២០២៤ ក៏មានបងប្អូនអ្នកស្រឡាញ់និងលេងខ្លែងមកពីបណ្ដាលខេត្តផ្សេងៗ ចូលរួមផងដែរ។ និងមានពីរលក្ខ័ខណ្ឌគណៈកម្មការមេប្រយោគនៃការបង្ហើរខ្លែងនឹងវាយតម្លៃផ្តល់ពិន្ទុទៅដល់ខ្លែងសេរីគឺទីមួយទៅលើបច្ចេកទេសបង្ហើរ មានភាពសំកាំងល្អទាំងពេលកំពុងហោះនិងពេលដាក់ចុះមកវិញមិនរេដាំក្បាលចុះ និងអ្នកបង្ហោះត្រូវតាមទិសខ្យល់ និងទីពីរ វាយតម្លៃទៅលើផ្នែកវិចិត្រកម្ម មានទ្រង់ទ្រាយ សោភ័ណភាព។ ចំណែកខ្លែងឯក មានបីលក្ខ័ណ្ឌ ទីមួយបច្ចេកទេសបង្ហើរ សោភ័ណភាពទាំងស្លាបនិងកន្ទុយ ដងខ្លួននិងឯក មានទម្រង់សមសួន ទីពីរមានភាពរចនាផ្នែកវិចិត្រកម្ម និងទីបីសម្លេងឯកដែលមានភាពរងំរណ្តំ អន្ទងសោតិន្ទ្រីយរម្មណ៍អ្នកស្តាប់ឱ្យលន្លង់លន្លោចទៅបាន សម្លេងឯកពិរោះរងំទៅបានលុះណាតែយប់ស្ងាត់និងនៅទីជនបទ តែដោយសារ ស្ថានភាពការបង្ហើរពេលនេះ ស្ថិតនៅតំបន់ក្នុងក្រុងគេមិនអាចវាយតម្លៃសម្លេងឯកបានសុក្រិតឡើយ៕
អត្ថបទ និងរូបភាព: សហការីពីមន្ទីរព័ត៌មានខេត្តសៀមរាប
កែសម្រួល: លោកហាំ ម៉េងហួត
