ឆ្លងកាត់ការប្រកួតរយៈពេល៣ថ្ងៃ ចាប់ពីថ្ងៃទី២៧ ដល់២៩ ខែធ្នូ ឆ្នាំ២០២៤ ព្រឹត្តិការណ៍ប្រកួតបង្ហើរខ្លែងឯកខ្មែរ និងខ្លែងសេរី ខេត្តសៀមរាប ឆ្នាំ២០២៤ ត្រូវបានបិទបញ្ចប់ជោគជ័យ ដោយមានអ្នកចូលរួមជាច្រើនកុះករ ខណៈជ័យលាភីខ្លែងឯកមន្ទីរអង្គភាព រដ្ឋបាលក្រុងស្រុក លេខ១ បានទៅលើខ្លែងជ័យឯកកណ្តាលវេហាស៍ របស់មន្ទីរវប្បធម៌ និងវិចិត្រសិល្បៈខេត្តកណ្តាល, ខ្លែងឯកផ្នែកឯកជនលេខ១ បានទៅលើខ្លែងផែនសិល្បៈ និងកីឡា របស់ក្រុមការងារយុវជនផែនសិល្បៈ និងកីឡា នៃយុវជនគណបក្សខេត្តសៀមរាប និងជ័យលាភីខ្លែងសេរីផ្នែកឯកជនលេខ១ បានទៅលើខ្លែងនាគរាជក្បាល៥ មកពីខេត្តកណ្ដាល។
ថ្លែងបិទព្រឹត្តិការណ៍នេះ លោក លី សារី អភិបាលរងខេត្ត បានថ្លែងអំណរគុណ និងការកោតសរសើរ គ្រប់ភាគីចូលរួមទាំងអស់ដែលបានលះបង់ពេលវេលាកម្លាំងកាយចិត្ត និងធនធានចូលរួមប្រកួតប្រកបដោយភាពសប្បាយរីករាយ ក្នុងការរៀបចំនូវព្រឹត្តិការណ៍នេះ ដែលជាលើកទី១ សម្រាប់ខេត្តសៀមរាប។ ព្រឹត្តិការណ៍នេះដែរ វាក៏បានក្លាយជាកម្មវិធីថ្មីមួយ ស្របទៅនឹងយុទ្ធនាការ “ទស្សនាខេត្តសៀមរាប ឆ្នាំ២០២៤” ដែលបានដាក់ចេញដោយប្រមុខរាជរដ្ឋាភិបាលកម្ពុជា។
លោកអភិបាលរងខេត្ត មានប្រសាសន៍ថា ពិតណាស់ការរៀបចំពិធីបុណ្យបង្ហើរ ខ្លែងឯកខ្មែរ និងខ្លែងឯកសេរីលើកទី១ ខេត្តសៀមរាប ឆ្នាំ២០២៤នេះ គឺជាព្រឹត្តិការណ៍វប្បធម៌ជាតិ ដែលមានលក្ខណៈជាប្រវត្តិសាស្រ្ត និងមានចរិកជាបេតិកភណ្ឌរបស់ជាតិ មានតម្លៃសម្រាប់ទ្រទ្រង់ព្រលឹង និងអត្តសញ្ញាណរបស់ជាតិ តាមរយៈការលើកកម្ពស់តម្លៃវប្បធម៌សង្គមកម្ពុជា។ ឧត្តមភាព នៃវប្បធម៌ និងការផ្សព្វផ្សាយព្រឹត្តិការណ៍នេះ នឹងបង្កើននូវភាពទាក់ទាញថ្មីថែមទៀតដល់ភ្ញៀវទេសជាតិ អន្តរជាតិចូលមកទស្សនាខេត្តសៀមរាប និងសិក្សាឈ្វេងយល់អំពីកម្ពុជាកាន់តែច្រើនទៀត ក្នុងឆ្នាំបន្តបន្ទាប់ខាងមុខ។
សាធារណជនដែលបានចូលរួមក្នុងព្រឹត្តិការណ៍នេះ បានបង្ហាញក្ដីរីករាយ និងពេញចិត្តចំពោះការរៀបចំព្រឹត្តិការណ៍នេះឡើង ដែលមិនធ្លាប់មានកន្លងមកនៅខេត្តសៀមរាប។ ពួកគាត់ក៏បានសំណូមពរដល់អ្នកពាក់ព័ន្ធ បន្តរៀបចំព្រឹត្តិការណ៍នេះបន្តទៀតនៅឆ្នាំក្រោយៗ ព្រោះវាជាព្រឹត្តិការណ៍សំខាន់ក្នុងការជួយជំរុញដល់យុវជនជំនាន់ក្រោយឱ្យបានស្គាល់ពីវប្បធម៌របស់ដូនតាខ្មែរយើងដែលមានតាំងពីបុរាណកាលមក។ ជាពិសេសវាក៏ជាការផ្សព្វផ្សាយដល់អ្នកទេសចរ និងទេសចរបរទេស បានស្គាល់ពីកម្ពុជាយើងកាន់តែច្រើនផងដែរ៕
អត្ថបទ និងរូបភាព៖ លោក យូ វង្ស, ហេង វន្នី
កែសម្រួល៖ លោក អ៊ុន ណារាជ្យ
