យោងតាមសេចក្ដីប្រកាសព័ត៌មានរបស់គ្រឹះស្ថានអង្គរ បានឱ្យដឹងថា រយៈពេល១២ខែ ឆ្នាំ២០២៤ គ្រឹះស្ថានអង្គររកចំណូលបានចំនួន ៤៧.៨២៦.៩៨១ដុល្លារអាមេរិក ពីការលក់សំបុត្រជូនភ្ញៀវទេសចរបរទេសចូលទស្សនាតំបន់រមណីដ្ឋានអង្គរ ខណៈចំណូលបានពីការចូលទស្សនាតំបន់ចុងឃ្នៀសបានចំនួន ៧៩៤.៣៤៨ដុល្លារអាមេរិក។
សេចក្ដីប្រកាសព័ត៌មានដដែលបញ្ជាក់ថា ក្នុងរយៈពេល១២ខែនេះ មានភ្ញៀវទេសចរទិញសំបុត្រចូលទស្សនារមណីយដ្ឋានអង្គរចំនួន ១.០២៣.៦៨៨នាក់ កើនឡើងជាង ២៨ភាគរយ ធៀបទៅនឹងរយៈពេលដូចគ្នាឆ្នាំ២០២៣ និងទទួលបានប្រាក់ចំណូលចំនួន ៤៧.៨២៦.៩៨១ដុល្លារអាមេរិក កើនឡើងជាង ២៨ភាគរយ បើធៀបទៅនឹងរយៈពេលដូចគ្នាកាលពីឆ្នាំ២០២៣កន្លងទៅ។
ក្នុងនោះសម្រាប់រយៈពេល១ខែ ខែធ្នូ ឆ្នាំ២០២៤វិញ មានភ្ញៀវទេសចរអន្ដរជាតិទិញសំបុត្រចូលទស្សនាតំបន់រមណីយដ្ឋានអង្គរចំនួន ១.០២៣.៦៨៨នាក់ កើនឡើងជិត ៣០ភាគរយ បើធៀបនឹងឆ្នាំ២០២៣ និងរកចំណូលបានចំនួន ៥.៩១៨.១៤៨ដុល្លារអាមេរិក កើនឡើងជាង ២៧ភាគរយ ធៀបនឹងរយៈពេលដូចគ្នាកាលពីឆ្នាំ២០២៣។
ដោយឡែក ចំពោះការលក់សំបុត្រជូនភ្ញៀវចូលទស្សនាតំបន់កំពង់ផែចុងឃ្នៀស រយៈពេល១២ខែនេះ មានចំនួន ២៨.៨៧១ទូក រកចំណូលបានចំនួន ៧៩៤.៣៤៨ដុល្លារអាមេរិក៕
អត្ថបទ និងរូបភាព៖ លោក អ៊ុន ណារាជ្យ
