កាលពីរសៀលថ្ងៃទី០២ ខែមករា ឆ្នាំ២០២៥នេះ ក្រុមនិស្សិតស្ម័គ្រចិត្ដ និងសាស្ដ្រាចារ្យមកពីប្រទេសកូរ៉េខាងត្បូង បានជួយសាងសង់អាគារសាលប្រជុំមួយខ្នង និងផ្ដល់សម្ភារៈសិក្សា និងកីឡាមួយចំនួនទៀត ដល់សាលាបឋមសិក្សាភូមិស្ទឹង ក្នុងស្រុកប្រាសាទបាគង ខេត្ដសៀមរាប ក្នុងន័យរឹតចំណងមិត្ដភាពសិស្ស និងនិស្សិតប្រទេសទាំងពីរ កម្ពុជា-កូរ៉េ ឱ្យកាន់តែរឹងមាំថែមទៀត។
លោក ផាក ស៊ូនហ៊ីយុន (Baik Soon Hyun) សាស្ដ្រាចារ្យនៃសាកលវិទ្យាល័យកេម្យុង បានឱ្យដឹងថា អគារដែលផ្ដល់ជូននេះ មានទទឹង១០ម៉ែត្រ និងបណ្ដោយ២០ម៉ែត្រ ដោយប្រើពេលមួយសប្ដាហ៍ ដើម្បីសាងសង់ឡើងសម្រាប់ជួយសម្រួលដល់កិច្ចការងាររបស់លោកគ្រូអ្នកគ្រូ ចំណាយថវិកាប្រមាណ១ម៉ឺនដុល្លារ។ ជាមួយគ្នានេះ ក្រុមនិស្សិតក៏បានជួយលាបថ្នាំជញ្ជាំងសាលារៀន ក្រាលកូរ៉ូឡា ព្រមទាំងផាត់ពណ៌រូបភាពផ្សេងៗ ព្រមទាំងបានសម្ដែងសិល្បៈវប្បធម៌កូរ៉េ ជូនសិស្សានុសិស្សទស្សនាផងដែរ។ ការផ្ដល់នូវអំណោយអគារសាលប្រជុំ ក៏ដូចសម្ភារៈសិក្សានាពេលនេះ គឺដើម្បីបង្ហាញពីការស្រលាញ់រាប់អានគ្នារបស់សិស្ស និងនិស្សិតប្រទេសទាំងពីរ។
លោកបន្ដថា ក្រុមនិស្សិតស្ម័គ្រចិត្ដ បាននាំយកថវិកាពីសាកលវិទ្យាល័យកេម្យុង មកសាងសង់សាលារៀននៅខេត្ដសៀមរាប ចាប់តាំងពីឆ្នាំ២០០៧ ដែលមកដល់ពេលនេះ បានសាងសង់សាលារៀន សាលប្រជុំ ក៏ដូចជាសម្ភារៈសិក្សាជាច្រើន។ លោក និងក្រុមនិស្សិត ក៏នឹងមានគម្រោងជួយផ្ដល់ជំនួយសាលារៀនបន្ដទៀតដល់ខេត្តសៀមរាប ដើម្បីជួយជំរុញការអប់រំដល់កុមារក្នុងខេត្ដសៀមរាប ឱ្យកាន់តែប្រសើរឡើង។
លោក តាន់ វិច្ឆិការង្ស៊ី ប្រធានការិយាល័យអប់រំ យុវជន និងកីឡាស្រុកប្រាសាទបាគង បានបង្ហាញថា ការផ្ដល់អគារសាលប្រជុំនាពេលនេះ បង្ហាញថារដ្ឋាភិបាលប្រទេសកម្ពុជា និងប្រទេសកូរ៉េ កាន់តែជាមិត្ដភាពជិតស្និតយូរអង្វែងថែមទៀត។ លោកក៏បានថ្លែងអំណរគុណដល់សប្បុរសជនប្រទេសកូរ៉េ ចំពោះសមិទ្ធផលនាពេលនេះ ព្រោះថាសាលាបឋមសិក្សានេះនៅខ្វះខាតច្រើនសម្រាប់បម្រើឱ្យធនធនធានមនុស្ស។ លោកក៏សូមអំពាវនាវដល់សាស្ដ្រាចារ្យ និស្សិតនៃប្រទេសកូរ៉េ បន្ដជួយដល់វិស័យអប់រំបន្ថែមទៀត ដើម្បីអភិវឌ្ឍន៍ធនធានមនុស្សឱ្យកាន់តែរីកចម្រើន ដើម្បីឱ្យពួកគាត់មានសមត្ថភាពក្នុងចូលរួមសង្គមជាតិ ព្រមទាំងស្នើឱ្យលោកគ្រូអ្នកគ្រូចូលរួមថែរក្សាសាលប្រជុំនេះឱ្យបានយូរអង្វែង៕
អត្ថបទ និងរូបភាព៖ លោក ឈិត សាវី
កែសម្រួល៖ លោក អ៊ុន ណារាជ្យ
