នៅថ្ងៃទី០២ ខែមករា ឆ្នាំ២០២៥នេះ សិស្សានុសិស្សនៃសិស្សានុសិស្សសាលាបឋមសិក្សាប្រាសាទគោកចក ក្រុងសៀមរាប ទទួលការអប់រំសីលធម៌តាមបែបព្រះពុទ្ធសាសនា ពីព្រះចៅអធិការវត្តប្រាសាទគោកចក តាមរយៈការបណ្តុះសុជីវធម៌ គុណធម៌ ចរិយាធម៌ ព្រោះពួកគាត់ជាធនធានមនុស្សជំនាន់ក្រោយ ជាទំពាំងស្នងឬស្សី ជាសសរទ្រូងរបស់ប្រទេសជាតិនាពេលអនាគត។
ព្រះគ្រូវិចិត្រវង្សា ហែម គឹមសាន ញាតិធម្មោ ព្រះគ្រូចៅអធិការវត្ត មានថេរដីកាថា កម្មវិធីអប់រំសីលធម៌ដល់សិស្សានុសិស្សនេះ ធ្វើឡើងតបតាមការស្នើសុំពីគណៈគ្រប់គ្រងសាលា ដើម្បីជួយបណ្តុះឆន្ទៈដល់កុមារឱ្យពួកគាត់ចេះស្រឡាញ់ និងប្រព្រឹត្តិតែអំពើល្អ រស់នៅក្នុងគុណធម៌ មានសុជីវធម៌ សីលធម៌ជាមួយនឹងឥរិយាបទស្រគត់ស្រគំ។ បន្ថែមពីនេះក៏ជាចំណែកជួយផ្តល់ចំណេះដឹង ស្គាល់បាប បុណ្យ គុណ ទោស ចេះគោរពប្រតិបត្តិព្រះសង្ឃ ថ្នាក់ដឹកនាំ ម្តាយឪពុក ចាស់ព្រឹទ្ធាចារ្យ លោកគ្រូអ្នកគ្រូ ស្របតាមទំនៀមទម្លាប់ខ្មែរតាំងពីបុរាណកាល។
ព្រះចៅអធិការ បានកត់សម្គាល់ឃើញថា ពេលបច្ចុប្បន្ននេះ ការធ្លាក់ចុះនៃតម្លៃសីលធម៌ គុណធម៌ បានកំពុងធ្វើឱ្យសិស្សមួយភាគធំក្លាយជាក្មេងទំនើង សេពគ្រឿងញៀន គេចពីសាលារៀន និងបង្កភាពអណាធិបតេយ្យនៅតាមទីសាធារណៈ ជាហេតុធ្វើឱ្យប៉ះពាល់ដល់សន្តិសុខសណ្ដាប់សង្គម និងបង្កការភ័យខ្លាចដល់ប្រជាពលរដ្ឋ។ ហេតុនេះស្នើគណៈគ្រប់គ្រងសាលា និងលោកគ្រូអ្នកគ្រូ រួមនឹងអាណាព្យាបាល ជួយតាមដានពិនិត្យអាកប្បកិរិយា ឥរិយាបទរបស់កូន បើមានសកម្មភាពមិនប្រក្រតីណាមួយ សូមជូនរាយការណ៍ទៅកាន់អាជ្ញាធរមូលដ្ឋាន ដើម្បីរួមគ្នាទប់ស្កាត់ និងជួយអប់រំណែនាំបានទាន់ពេលវេលា។
សូមជម្រាបថា សម្រាប់ឆ្នាំ២០២៥នេះ កម្មវិធីអប់រំសីលធម៌សង្គមតាមបែបព្រះពុទ្ធសាសនា នឹងបន្តចុះអប់រំដល់សិស្សានុសិស្សនៅសាលាចំនួន២ ក្នុងសង្កាត់គោកចក គឺសាលាបឋមសិក្សាប្រាសាទគោកចក និងសាលាបឋមសិក្សាមុខនាគ ក្នុងក្រុងសៀមរាប៕
អត្ថបទ និងរូបភាព៖ លោក ទ្រា ពន្លឺ
កែសម្រួល៖ លោក អ៊ុន ណារាជ្យ
