អាជ្ញាធរខេត្ដសៀមរាបឆ្នាំនេះបានរៀបចំសោភ័ណភាព យ៉ាងស្រស់បំព្រង និងមានកម្មវិធីកម្សាន្តសប្បាយៗជាច្រើទៀតដើម្បីអបអរសាទរឆ្លងឆ្នំាសកល ឆ្នាំថ្មី២០២៤ឈានចូល២០២៥ ជាពិសេសរដ្ឋបាលខេត្តបានបំពាក់ឧបករណ៍បាញ់ទឹក និងភ្លើងលោតតាមចង្វាក់ភ្លេង ដែលអាចបាញ់ទឹកបានកម្ពស់ប្រមាណ៨០ម៉ែត្រ និងបំពាក់ភ្លើងចំម្រុះពណ៌លម្អដោយក្បូរក្បាច់ស្រស់ស្អាតតាមបណ្តាផ្លូវសំខាន់ៗក្នុងក្រុងសៀមរាប ដូចជាសួនច្បារមុខព្រះរាជដំណាក់ និងនៅតំបន់កំសាន្តផប់ស្ទ្រីត និងមានការរាប់ថយក្រោយ ជាមួយការអុជកាំជ្រួចដើម្បីអបអរសាទរឆ្លងឆ្នំាសកលឆ្នាំថ្មី២០២៥ផងដែរ។
លើសពីនេះរដ្ឋបាលខេត្តក្រោមការដឹកនាំរបស់ឯកឧត្តម ប្រាក់ សោភ័ណ អភិបាល នៃគណៈអភិបាលខេត្តសៀមរាបបានណែនាំដល់ អង្គភាពមន្ទីរពាក់ព័ន្ធរៀបចំកម្មវិធីផ្ទាំងទស្សនីយភាពរបាំប្រពៃណីខ្មែរមួយចំនួនដូចជា ការសម្តែងល្ខោនខោល របាំក្រមា របាំរំដួលបុប្ផាអង្គរ និងកម្មវិធីរាំលេង កម្សាន្តសប្បាយ និងបញ្ជ្រាបសារយល់ដឹងទាក់ទងនឹងគ្រឿងស្រវឹង គ្រឿងញៀន គ្រោះថ្នាក់ចរាចរណ៍ និងបញ្ហាក្មេងទំនើង ព្រមទាំងបានអំពាវនាវដល់ភ្ញៀវ និងអ្នកមកទស្សនាកម្សាន្តក្នុងខេត្តសៀមរាប សូមថែរក្សា សម្អាតអនាម័យ បរិស្ថានជាពិសេសកុំបោះចោលសំរាមក្នុងស្ទឹងព្រោះស្ទឹងសៀមរាបជាបេះដូងរបស់ខេត្តទេសចណ៍មួយនេះ ។
បើតាមមន្ទីរទេសចរណ៍ខេត្តបង្ហាញថា៖ស្ថានភាពទេសចរ និងបងប្អូនប្រជាពលរដ្ឋ ដើរកម្សាន្តនៅខេត្តសៀមរាបពីថ្ងៃទី៣០ និង៣១ ខែធ្នូ ឆ្នាំ២០២៤ មានចំនួនប្រមាណ ៣៣៣,៦៦០នាក់ កើនឡើងប្រមាណ ៩.៧៣%បើប្រៀបធៀបនឹងឆ្នាំ២០២៣ ចំនួនប្រមាណ៣០៤,០៦៤នាក់ ក្នុងនោះ ទេសចរជាតិ និងបងប្អូនប្រជាពលរដ្ឋក្នុងខេត្ត មានចំនួនប្រមាណ៣២៣,៤០០នាក់ មានការកើនឡើងប្រមាណ៩.៦៣% បើប្រៀបធៀបនឹងរយៈពេលដូចគ្នាឆ្នាំ២០២៣ ចំនួនប្រមាណ ២៩៥,០០០ នាក់។ ភ្ញៀវទេសចរអន្តរជាតិ មានចំនួន ១០,២៦០ នាក់ មានការកើនឡើង ១៣.២០% បើប្រៀបធៀបនឹងរយៈពេលដូចគ្នាឆ្នាំ២០២៣ ចំនួន ៩,០៦៤ នាក់។
ឯកឧត្តម ប្រាក់ សោភ័ណ អភិបាលខេត្តសៀមរាប បានបង្ហាញមនោសញ្ចេតនាតាមរយៈបណ្តាញសង្គមផ្ទាល់ខ្លួន ដោយថ្លែងអំណរគុណ និងកោតសរសើរដល់ ថ្នាក់ដឹកនាំ អង្គភាពមន្ទីរស្ថាប័ននានាជុំវិញខេត្តថាបានសហការស្អិតរមួតអស់ពីកម្លាំងកាយចិត្តបំពេញការងារភារកិច្ចអស់រយៈពេលពេញមួយឆ្នាំ២០២៤ធ្វើឲ្យកម្មវិធីខេត្ត កម្មវិធីថ្នាក់ជាតិ ទទួលភ្ញៀវគ្រប់ជាន់ថ្នាក់ ទទួលបានជោគជ័យ។
ក្នុងសំណេរឯកឧត្តមអភិបាលខេត្តសៀមរាបបញ្ជាក់ថា៖ ខ្ញុំក៏សូមអបអរសាទរដែលមួយឆ្នាំនេះយើងបានបំរើខេត្តដ៏ល្អមួយនេះអស់ពីកំលាំងកាយ កំលាំងចិត្ត ធ្វើអោយកម្មវិធីខេត្ត កម្មវិធីថ្នាក់ជាតិ ទទួលភ្ញៀវគ្រប់ជាន់ថ្នាក់ទទួលបានជោគជ័យ ។
អត្ថបទ៖ លោក យូ វង្ស
រូបភាព៖ សហការីមន្ទីរព័ត៌មាន
កែសម្រួល៖ លោក ហាំ ម៉េងហួត
