យោងតាមរបាយការណ៍ក្រុមការងារឆ្លើយតបជាពហុវិស័យ ចំពោះអំពើហិង្សាទាក់ទងទៅនឹងយេនឌ័រ ស្ថិតក្រោមគណៈកម្មាធិការពិគ្រោះយោបល់កិច្ចការស្រ្ដី និងកុមារខេត្តសៀមរាប ហៅកាត់ថា GBV បានឱ្យដឹងថា គិតត្រឹមត្រីមាសទី៤ ឆ្នាំ២០២៤នេះ ក្រុមការងារជួយអន្ដរាគមន៍ និងដោះស្រាយដល់ស្រ្ដី និងក្មេងស្រីដែលរងគ្រោះដោយអំពើហិង្សាទាក់ទងទៅនឹងយេនឌ័របានចំនួន ២៦៤ករណី និងនៅជាង៣០ករណីទៀតកំពុងបន្តដោះស្រាយ។
របាយការណ៍ដដែល បានឱ្យដឹងទៀតថា ក្នុងចំណោម ២៦៤ករណីខាងនេះ មាននៅស្រុកសូទ្រនិគម ៤២ករណី, ស្រុកស្វាយលើ ៣៩ករណី, ស្រុកពួក ៣៩ករណី, ស្រុកអង្គរជុំ ៣០ករណី, ស្រុកក្រឡាញ់ ២២ករណី, ស្រុកអង្គរធំ ២០ករណី, ស្រុកវ៉ារិន ២០ករណី, ស្រុកប្រាសាទបាគង ១៦ករណី, ស្រុកស្រីស្នំ ១៣ករណី, ក្រុងសៀមរាប ១០ករណី, ស្រុកបន្ទាយស្រី ៨ករណី និងស្រុកជីក្រែង ៥ករណី។ ជាមួយគ្នានោះ ករណីដែលមិនទាន់បានដោះស្រាយមានចំនួន ២២ករណី និងកំពុងបន្ដដោះស្រាយមាន ៣៥ករណី។
ក្នុងកិច្ចប្រជុំប្រចាំត្រីមាសទី៤ របស់ក្រុមការងារ GVB ខេត្តសៀមរាប នៅរសៀលថ្ងៃទី២៦ ខែធ្នូ ឆ្នាំ២០២៤នេះ លោកស្រីក្រង់ ស៊ី ថាវី ប្រធានមន្ទីរកិច្ចការនារីខេត្ដ និងជាប្រធានអង្គប្រជុំ បានជំរុញដល់គ្រប់អ្នកពាក់ព័ន្ធ នៅពេលផ្ញើរបាយការណ៍ឱ្យក្រុមការងារបូកសរុបសូមពិនិត្យឱ្យបានច្បាស់លាស់ ជាពិសេសតារាងលម្អិត ពីព្រោះរបាយការណ៍គឺយើងត្រូវការបូកសរុបជាប្រចាំ។ ជាមួយនោះ ក្រុមការងារ GBV ត្រូវមានកិច្ចសហការល្អជាមួយស្ថាប័ន មន្ទីរអង្គភាពពាក់ព័ន្ធ អាជ្ញាធរមានសមត្ថកិច្ច អាជ្ញាធរមូលដ្ឋាន ក្រុមការងារថ្នាក់ក្រុងស្រុក និងអង្គការដៃគូពាក់ព័ន្ធ ក្នុងការសម្របសម្រួលផ្តល់សេវាឆ្លើយតបដល់ជនរងគ្រោះ ដោយអំពើហិង្សាទាក់ទងនឹងយេនឌ័រ ឱ្យបានទាន់ពេលវេលា។
លោកស្រីបញ្ជាក់ថា តាមរយៈនៃកិច្ចប្រជុំនេះ សូមឱ្យគ្រប់ភាគីពាក់ព័ន្ធទាំងអស់ រួមគ្នាទប់ស្កាត់អំពើហិង្សាដែលពាក់ព័ន្ធនឹងយេនឌ័រ គ្រប់ទម្រង់ដូចជាអំពើហិង្សាក្នុងគ្រួសារ ការរំលោភផ្លូវភេទ និងការជួញដូរស្ត្រី និងកុមារ ជាពិសេសនៅតាមបណ្តាក្រុងស្រុកទាំង១៣ របស់ខេត្តត្រូវរួមគ្នាបង្កើនប្រសិទ្ធភាពការងារ រួមគ្នាដើម្បីលើកកម្ពស់ និងពង្រឹងការផ្ដល់សេវាជាពហុវិស័យ ឆ្លើយតបចំពោះអំពើហិង្សាលើស្ត្រី និងក្មេងស្រី ប្រកបដោយប្រសិទ្ធភាព និងទាន់ពេលវេលា៕
អត្ថបទ និងរូបភាព៖ លោក អោត រត់
កែសម្រួល៖ លោក អ៊ុន ណារាជ្យ
