នៅថ្ងៃទី២៧ ខែធ្នូ ឆ្នាំ២០២៤នេះ អាជ្ញាធរខេត្តសៀមរាប បានបើកកិច្ចប្រជុំគណៈកម្មការចម្រុះលើកកម្ពស់សីលធម៌សង្គម តម្លៃស្ត្រី និងគ្រួសារខ្មែរ ខេត្តសៀមរាប ដឹកនាំកិច្ចប្រជុំដោយ លោកស្រី ម៉មនី រង្សី អភិបាលរងខេត្តសៀមរាប ដោយមានការចូលរួមពីតំណាងមន្ទីរអង្គភាពពាក់ព័ន្ធក្នុងខេត្ត អភិបាលក្រុងស្រុក កងកម្លាំងប្រដាប់អាវុធទាំង៣ និងអ្នកពាក់ព័ន្ធក្នុងខេត្តជាច្រើនរូប។
លោកស្រី ម៉មនី រង្សី មានប្រសាសន៍ថា ការលើកកម្ពស់សីលធម៌សង្គម តម្លៃស្ត្រី និងគ្រួសារខ្មែរ និងការលុបបំបាត់នូវភាពអសកម្មទាំងឡាយក្នុងសង្គម គឺជាការងារអប់រំសង្គម ដែលមានភាពលំបាក ស្មុគស្មាញ ហើយការងារនេះមិនអាចអនុវត្តដោយមន្ទីរ ឬអង្គភាព ស្ថាប័នណាមួយដោយឡែកបានទេ។ ដោយយើងត្រូវការឱ្យមានការចូលរួមដោះស្រាយទាំងអស់គ្នា ទាំងស្ថាប័ននីតិបញ្ញតិ្ត នីតិប្រតិបត្តិ តុលាការ ដៃគូអភិវឌ្ឍន៍ សង្គមស៊ីវិល ផ្នែកឯកជន និងប្រជាជនគ្រប់រូប។
លោកស្រីបន្តថា សម្រាប់កិច្ចប្រជុំនាពេលនេះដែរ គឺដើម្បីពិនិត្យមើលឡើងវិញ លើវឌ្ឍនភាពបញ្ហាប្រឈម និងមេរៀនបទពិសោធ ដែលបានមកពីការអនុវត្តកន្លងមក និងលើកទិសដៅការងារបន្ត ជាពិសេសការត្រួតពិនិត្យបន្ថែមដើម្បីពង្រឹងឡើងវិញនូវតួនាទី ភារកិច្ច រចនាសម្ព័ន្ធ របស់គណៈកម្មការចម្រុះលើកកម្ពស់សីលធម៌សង្គមតម្លៃស្ត្រី និងគ្រួសារខ្មែរ ខេត្តសៀមរាប និងក្រុមការងារពាក់ព័ន្ធលើការអនុវត្តភារកិច្ចការងារដែលបានដាក់ចេញ។
លោកស្រីអភិបាលរងខេត្ត បន្ថែមថា តាមរយៈកិច្ចប្រជុំនាថ្ងៃនេះ យើងនឹងរួមគ្នារិះរកដំណោះស្រាយបញ្ហាប្រឈម និងផ្តល់គំនិតផ្តួចផ្តើមថ្មីៗ ក្នុងការកសាងផែនការសកម្មភាពបន្ត ដើម្បីឱ្យការងារអប់រំពាក់ព័ន្ធនឹងការលើកកម្ពស់សីលធម៌សង្គម តម្លៃស្ត្រី និងគ្រួសារខ្មែរ បានជ្រួតជ្រាបដល់យុវជនដែលជាអនាគតបន្តវេន ចូលរួមអនុវត្តឈានទៅកសាងសង្គមមួយដែលផ្តល់តម្លៃស្ត្រី និងគ្រួសារ៕
អត្ថបទ និងរូបភាព៖ លោក អ៊ុន ណារាជ្យ
