ឆ្លងកាត់រយៈពេល ២ថ្ងៃ ចាប់ពីថ្ងៃទី២៣-២៤ ខែធ្នូ ឆ្នាំ២០២៤នេះ កិច្ចប្រជុំត្រីភាគី កម្ពុជា វៀតណាម ឡាវ ស្តីពីការពង្រឹងកិច្ចសហការក្នុងការគ្រប់គ្រងលំហូរទេសន្តរប្រវេសន៍ឆ្លងកាត់ព្រំដែន ដើម្បីប្រយុទ្ធប្រឆាំងអំពើជួញដូរមនុស្ស ដែលរៀបចំឡើងនៅខេត្តសៀមរាប ត្រូវបានបិទបញ្ចប់ ដោយមន្ត្រីជាន់ខ្ពស់របស់ប្រទេសកម្ពុជា វៀតណាម និងឡាវ បានធ្វើការប្តេជ្ញាចិត្តខ្ពស់នៅក្នុងកិច្ចសហប្រតិបត្តិការបង្ក្រាបបទល្មើសឆ្លងដែន ជាពិសេសបទល្មើសជួញដូរមនុស្ស។
សូមជម្រាបថា កិច្ចប្រជុំរយៈពេល២ថ្ងៃនេះ រៀបចំឡើងដើម្បីសិក្សាអំពីស្ថានភាពនៃភាពងាយរងគ្រោះរបស់ជនទេសន្តរប្រវេសន៍ឆ្លងកាត់ព្រំដែននៃប្រទេសទាំងបី, ពិនិត្យមើលយន្តការឆ្លើយតបរបស់រដ្ឋាភិបាល នៃប្រទេសទាំងបី និងស្វែងរកដំណោះស្រាយរួមត្រីភាគី ដើម្បីបង្កើនប្រសិទ្ធភាពក្នុងការគ្រប់គ្រងព្រំដែន និងពង្រឹងកិច្ចសហប្រតិបត្តិការអន្តរជាតិ និងទីបង្កើតយន្តការត្រីភាគីរួម រៀបចំកិច្ចប្រជុំទៀងទាត់ ដើម្បីធានាការចែករំលែកព័ត៌មាន និងកិច្ចសហការបន្ត។
ព័ត៌មានជាតិ ថ្មីៗ
លោកជំទាវ ជូ ប៊ុនអេង រដ្ឋលេខាធិការក្រសួងមហាផ្ទៃ មានប្រសាសន៍ថា បទល្មើសជួញដូរមនុស្ស រួមទាំងការធ្វើចំណាកស្រុកមិនស្របច្បាប់ ពលកម្មដោយបង្ខំ និងការបង្ខំប្រព្រឹត្តបទល្មើសនៅតែជាបញ្ហាប្រឈមសំខាន់ មានលក្ខណៈស្មុគស្មាញ និងត្រូវការយកចិត្តទុកដាក់បន្ថែមនៅក្នុងតំបន់អាស៊ីអាគ្នេយ៍។ ជាមួយនោះដោយសារឥទ្ធិពលនៃជំងឺរាតត្បាត និងវិបត្តិសេដ្ឋកិច្ច បានធ្វើឱ្យប្រជាពលរដ្ឋទន់ខ្សោយ ដោយមានជីវភាពខ្វះខាត ខ្វះព័ត៌មានគ្រប់គ្រាន់ រួមទាំងមានចំណេះដឹងផ្នែកបច្ចេកវិទ្យា និងភាសាមានកម្រិត ខ្វះការយល់ដឹងពីល្បិចកលនៃជនល្មើស និងហានិភ័យ ក្នុងការជ្រើសរើសការងារដែលអាចទុកចិត្តបាន។ ដូច្នេះបានធ្វើឱ្យកើនឡើងការធ្វើចំណាកស្រុក ស្វែងរកការងារនៅបរទេសប្រថុយប្រថាន។
លោកជំទាវបន្តថា និន្នាការថ្មីៗ បរិវត្តកម្មនៃប្រព័ន្ធបច្ចេកវិទ្យាព័ត៌មាន និងការប្រែប្រួលនៃស្ថិរភាពសេដ្ឋកិច្ច នយោបាយសាកលលោក កិច្ចសហប្រតិបត្តិការ និងការគ្រប់គ្រងព្រំដែនរួមគ្នានៅមានកម្រិត ធ្វើឱ្យជនល្មើសឆ្លៀតឱកាស ក្នុងការឆបោកតាមប្រព័ន្ធអ៊ីនធឺណិត ធ្វើប្រតិបត្តិការឆបោកជ្រើសរើសការងារខុសច្បាប់ និងបង្ខំឱ្យប្រព្រឹត្តបទល្មើស ធ្វើឱ្យមានភាពស្មុគស្មាញបន្ថែមទៀត។ សម្រាប់អាជ្ញាធរមានសមត្ថកិច្ច ដែលបង្កផលប៉ះពាល់ដល់សន្តិសុខជាតិ សន្តិសុខក្នុងតំបន់ និងសាកលលោក ហេតុដូច្នេះទើបប្រទេសទាំងបី ចាំបាច់បង្កើតឱ្យមានកិច្ចប្រជុំដ៏មានសារៈសំខាន់នេះឡើង។ ហើយលោកជំទាវរំពឹងថា ប្រទេសភូមិផងទាំងបីនេះ នឹងខិតខំពង្រឹងកិច្ចសហការ ផ្តល់ព័ត៌មានឱ្យគ្នាទៅវិញទៅមក ដើម្បីសម្រេចបាននូវការប្តេជ្ញាចិត្តដែលធ្វើប្រទេសយើង ប្រជាជនយើងបានរួចផុតអំពីអំពើជួញដូរមនុស្សគ្រប់រូបភាពគ្រប់ទម្រង់៕
អត្ថបទ និងរូបភាព៖ លោក ជា ស្រស់
កែសម្រួល៖ លោក អ៊ុន ណារាជ្យ
