ថ្លែងក្នុងវេទិកាផ្សព្វផ្សាយ និងពិគ្រោះយោបល់របស់ក្រុមប្រឹក្សាខេត្តសៀមរាប សម្រាប់គោលដៅទី៩ ស្រុកជីក្រែង នៅថ្ងៃទី២៣ ខែធ្នូ ឆ្នាំ២០២៤ ឯកឧត្តម លី សំរិទ្ធ ប្រធានក្រុមប្រឹក្សាខេត្ត បានជំរុញឱ្យអាជ្ញាធរមូលដ្ឋាន និងមន្ត្រីពាក់ព័ន្ធត្រូវពិនិត្យតាមដាន និងដោះស្រាយរាល់តម្រូវការប្រជាពលរដ្ឋឱ្យទាល់ពេលវេលាដោយឈរលើស្មារតីសាមគ្គី និងឯកភាព ស្របតាមច្បាប់គតិយុត្តនៅមូលដ្ឋាន ពិសេសកម្មវិធីនយោបាយយុទ្ធសាស្ត្របញ្ចកោណ ដំណាក់កាលទី១ របស់រាជរដ្ឋាភិបាលកម្ពុជា សំដៅកសាងមូលដ្ឋានគ្រឹះឆ្ពោះទៅសម្រេចបាននូវចក្ខុវិស័យឆ្នាំ២០៥០ កម្ពុជាក្លាយជាប្រទេសមានចំណូលខ្ពស់។
សូមជម្រាបថា វេទិកានាពេលនេះដែរ ក្រុមការងារទទួលបានសំណួរ និងសំណូមពរចំនួន២៨ ក្នុងនោះផ្ទាល់មាត់ចំនួន១៥ និងជាលាយលក្ខណ៍អក្សរចំនួន១៣ ដូចជាការជួសជុលផ្លូវ ការស្តារស្ទឹង អាងទឹក សេវាសុខាភិបាល បញ្ហាដីតំបន់៣ បឹងទន្លេសាបជាដើម។ ក្នុងនោះសំណួរសំណូមពរចំនួន១៥ ត្រូវបានមន្ត្រីជំនាញ និងអ្នកពាក់ព័ន្ធបានស្រាយបំភ្លឺ ចំពោះសំណួរសំណូមពរចំនួន១៣ ក្រុមប្រឹក្សាខេត្តនឹងប្រមូលយក ទៅពិនិត្យ ពិភាក្សាក្នុងក្របខណ្ឌក្រុមប្រឹក្សាខេត្ត ហើយនឹងធ្វើការឆ្លើយតបក្នុងពេលឆាប់ៗ។
ព័ត៌មានជាតិ ថ្មីៗ
លោក ង៉ូវ សេងកាក់ អភិបាលរងខេត្ត បានថ្លែងនូវការកោតសរសើរ ចំពោះប្រជាពលរដ្ឋក្នុងស្រុកជីក្រែង ដែលបានលើកឡើងនូវសំណើ និងសំណួរសំណូមពរយ៉ាងផុសផុលក្នុងអង្គវេទិកានាថ្ងៃនេះ ដែលសបញ្ជាក់ឱ្យឃើញថា ប្រជាពលរដ្ឋមានជំនឿទុកចិត្តជាមួយរដ្ឋបាលគ្រប់ជាន់ថ្នាក់ ក្នុងការដោះស្រាយនូវរាល់បញ្ហាប្រឈមរបស់បងប្អូន នឹងជួយជំរុញដល់ការអនុវត្តមុខងារគ្រប់ស្ថាប័នពាក់ព័ន្ធ រួមនឹងអាជ្ញាធរមូលដ្ឋាន ឱ្យការដោះស្រាយប្រកបដោយតម្លាភាព និងមានប្រសិទ្ធភាព ស្របតាមច្បាប់លិខិតបទដ្ឋានគតិយុត្តនៅថ្នាក់មូលដ្ឋាន។
ថ្លែងបិទអង្គវេទិកា ឯកឧត្តម លី សំរិទ្ធ ប្រធានក្រុមប្រឹក្សាខេត្ត មានប្រសាសន៍ថា៖ វេទិកាផ្សព្វផ្សាយនិងពិគ្រោះយោបល់នេះ ពិតជាមានសារៈសំខាន់ណាស់ ព្រោះជាយន្តការក្នុងការពង្រឹងនីតិរដ្ឋ និងអភិបាលកិច្ចល្អនៅមូលដ្ឋាន ព្រមទាំងជាយន្តការមួយជួយជំរុញឱ្យការអភិវឌ្ឍតាមបែបលទ្ធិប្រជាធិបតេយ្យនៅថ្នាក់ក្រោមជាតិកាន់តែទៅមុខឥតឈប់ឈរ និងកាន់តែចាក់ឬសយ៉ាងជ្រៅទៅក្នុងសហគមន៍មូលដ្ឋាន។ ឯកឧត្តម ក៏បានជំរុញដល់អាជ្ញាធរពាក់ព័ន្ធ ត្រូវពិនិត្យ តាមដាន និងដោះស្រាយរាល់សំណើ និងសំណូមពររបស់ប្រជាពលរដ្ឋ ដែលជាបញ្ហាប្រឈមចាំបាច់ ប្រកបដោយការយកចិត្តទុកដាក់ខ្ពស់ ពិសេសត្រូវមានឥរិយាបថទន់ភ្លន់ ម៉ឺងម៉ាត់ ដោយត្រូវចងចាំថា មន្ត្រីរាជការគឺជាអ្នកបម្រើដ៏ស្មោះត្រង់របស់ប្រជាពលរដ្ឋ៕
អត្ថបទ និងរូបភាព៖ លោក យូ វង្ស ,មុី សុខារិទ្ធ
កែសម្រួល៖ លោក អ៊ុន ណារាជ្យ
