នៅព្រឹកថ្ងៃទី២៣ ខែធ្នូ ឆ្នាំ២០២៤នេះ រដ្ឋបាលខេត្តសៀមរាប សហការជាមួយមន្ទីរសង្គមកិច្ច អតីតយុទ្ធជន និងយុវនីតិសម្បទាខេត្ត បានរៀបចំទិវាជនមានពិការភាពកម្ពុជាលើកទី២៦ និងអន្តរជាតិលើកទី៤២ ក្រោមប្រធានបទ “បរិយាបន្នពិការភាពលើគ្រប់វិស័យក្នុងយុគសម័យ បរិវត្តកម្មឌីជីថល” ក្នុងន័យលើកកម្ពស់ការគោរពសិទ្ធិ សេរីភាព លុបបំបាត់ការរើសអើង ជំរុញការអភិវឌ្ឍ និងធ្វើបរិយាបន្នជនមានពិការភាព ក្នុងការងារសេដ្ឋកិច្ចសង្គម វប្បធម៌ នយោបាយ ស្របតាមច្បាប់ស្តីពី កិច្ចការពារ និងលើកកម្ពស់សិទ្ធិជនពិការដែលជាគន្លឹះធានាការលើកកម្ពស់សិទ្ធិសេរីភាព សេចក្ដីថ្លៃថ្នូ និងគ្មានឧបសគ្គ។
លោក នាក់ ណេរ៉ុន អភិបាលរងខេត្ត មានប្រសាសន៍ថា ក្រុមប្រឹក្សាសកម្មភាពជនពិការខេត្ត បានរួមគ្នាអនុវត្តការងារយ៉ាងយកចិត្តទុកដាក់ ធ្វើយ៉ាងណាឱ្យជនមានពិការភាព មានលំនឹងជីវភាពរស់នៅកាន់តែប្រសើរពីមួយថ្ងៃទៅមួយថ្ងៃ ស្របតាមអភិក្រម “មិនទុកឱ្យនរណាម្នាក់នៅដាច់ដោយឡែក” ដោយកន្លងទៅ រាជរដ្ឋាភិបាល ក៏ជារដ្ឋបាលខេត្តសៀមរាប បានដាក់ចេញនូវបទដ្ឋានបច្ចេកទេសហេដ្ឋារចនាសម្ព័ន្ធរូបវន្តបង្កលក្ខណៈ ងាយស្រួលសម្រាប់ជនមានពិការភាព សំដៅជំរុញឱ្យមានការកែលម្អហេដ្ឋារចនាសម្ព័ន្ធរូបវន្តដែលមានស្រាប់ និងគ្រោងសាងសង់ថ្មីឱ្យមានការរៀបចំការបង្កលក្ខណៈងាយស្រួល សម្រាប់ជនមាន ពិការភាព ដូចជា ជម្រាល បង្កាន់ដៃ ជណ្តើរយន្ត ជណ្តើរយោង បង្គន់អនាម័យជាដើម ដែលជនមានពិការភាពអាចប្រើប្រាស់បាន។
លោកបន្ថែមថា ទន្ទឹមនឹងនេះ ក៏មានការចូលរួមការកៀរគរពីគ្រប់តួអង្គសំខាន់ៗទាំងអស់ ដើម្បីធ្វើយ៉ាងណាគាំពារ និងលើកកម្ពស់កម្រិតជីវភាពរស់នៅរបស់ជនពិការ និងលើកទឹកចិត្តពង្រឹងដល់ប្អូនៗឱ្យចេះជួយខ្លួនឯង ដើម្បីមានសមត្ថភាព ចូលបម្រើការងារនៅតាមស្ថាប័ន អង្គការដៃគូអភិវឌ្ឍន៍នានា ដើម្បីកសាងភាពធន់ ដែលបងប្អូនអាចទប់ទល់បាននូវបញ្ហាខ្លះៗ ដោយខ្លួនឯងផងដែរ។ ក្នុងន័យនេះដែរ ក៏សូមឱ្យអ្នកពាក់ព័ន្ធ បន្តគិតគូរជំរុញការផ្ដល់ឱកាសឱ្យជនមានពីការភាព ពិសេសស្ត្រី បានចូលរួមបម្រើការងារក្នុងតួនាទីរដ្ឋបាលឃុំសង្កាត់ និងការដាក់បញ្ចូលតម្រូវការរបស់ជនមានពិការភាព ទៅក្នុងកម្មវិធីិវិនិយោគបីឆ្នាំរំកិលរបស់មន្ទីរអង្គភាព ក្រុងស្រុក ឃុំសង្កាត់ ព្រមទាំងបង្កើនកញ្ចប់ថវិកាសេវាសង្គម ឃុំសង្កាត់ ទៅលើការងារពិការភាព។
លោក គង់ សំអឿន ប្រធានមន្ទីរសង្គម កិច្ចអតីតយុទ្ធជន និងយុវនីតិសម្បទាខេត្ត បានបង្ហាញថា ក្នុងខេត្តសៀមរាប បានទទួលបណ្ណសម្គាល់ជនមានពិការភាពចំនួន ១៦.៤៨២ បណ្ណ និងជនមានពិការភាពបានមកសម្ភាសន៍ និងអ្នកមកធ្វើអត្តសញ្ញាណជនមានពិការភាពបានចំនួន ១៨.៦៣៧នាក់ ស្រី ៩.៤០៩នាក់។ ក្នុងនោះមានកាយសម្បទា ញ្ញាណដឹង សតិបញ្ញា ផ្លូវចិត្ត ពិការភាពផ្សេងៗ និងទិន្នន័យពិការភាពគ្មានប្រភេទពិការចំនួន ៦៧៩នាក់ និងបានទទួលជនមានពិការភាពដែលមកទទួលសេវាស្តារលទ្ធភាពពលកម្មកាយសម្បទា នៅក្នុងមជ្ឈមណ្ឌលស្តារលទ្ធភាពពលកម្មកាយសម្បទាសរុប ២.៥៤៤នាក់។ ក្នុងនោះជនមានពិការភាពចំនួន ២.៤១១នាក់ បានចុះឈ្មោះចូលក្នុងកម្មវិធីជាតិជំនួយសង្គមក្នុងកញ្ចប់គ្រួសារទទួលបានប្រាក់ឧបត្ថម្ភប្រចាំខែ ពីរាជរដ្ឋាភិបាល៕
អត្ថបទ និងរូបភាព៖ លោក ធន់ ពូថេ
កែសម្រួល៖ លោក អ៊ុន ណារាជ្យ
