នៅថ្ងៃទី២០ ខែធ្នូ ឆ្នាំ២០២៤នេះ រដ្ឋបាលខេត្តសៀមរាប បានបន្តបើកវេទិកាផ្សព្វផ្សាយ និងពិគ្រោះយោបល់របស់ក្រុមប្រឹក្សាខេត្ត អាណត្តិទី៤ ឆ្នាំ២០២៤ គោលដៅទី៨ ស្រុកអង្គរធំ ក្រោមអធិបតីភាព ឯកឧត្តម លី សំរិទ្ធ ប្រធានក្រុមប្រឹក្សាខេត្ត និង លោក លី សារី អភិបាលរងខេត្ត ដោយមានការចូលរួមពី ឯកឧត្តម លោកជំទាវជាសមាជិកក្រុមប្រឹក្សាខេត្ត ថ្នាក់ដឹកនាំមន្ទីរអង្គភាព អាជ្ញាធរមូលដ្ឋាន លោកគ្រូអ្នកគ្រូ សិស្សានុសិស្ស និងប្រជាពលរដ្ឋជាច្រើនរូប។
មានប្រសាសន៍ក្នុងឱកាសនោះ ឯកឧត្តម លី សំរិទ្ធ បានលើកទឹកចិត្តដល់បងប្អូនប្រជាពលរដ្ឋទាំងអស់ លើកឡើងនូវទុក្ខកង្វល់ បញ្ហាប្រឈម និងសំណូមពរដែលជាតម្រូវការរបស់បងប្អូន តាមរយៈការលើកឡើងផ្ទាល់ និងលាយលក្ខអក្សរ ដើម្បីឱ្យក្រុមការងារប្រមូលនូវរាល់មតិយោបល់ បញ្ហាប្រឈម និងសំណូមពរទាំងនោះ មកធ្វើការស្រាយបំភ្លឺប្រកបដោយតម្លាភាព និងឈានទៅរកការដោះស្រាយចំគោលដៅ មានប្រសិទ្ធភាព និងទាន់ពេលវេលា។
សូមជម្រាបថា សម្រាប់វេទិកានាពេលនេះ ក្រុមការងារបានទទួលនូវសំណួរសំណូមពរមួយចំនួនពីបងប្អូនប្រជាពលរដ្ឋ ទាក់ទងនឹងការរស់នៅ និងសាងសង់លំនៅដ្ឋានលើដីតំបន់ឧទ្យានអង្គរ បញ្ហាវិវាទដីធ្លីជាប់ព្រំប្រទល់ តម្លៃកសិផលចុះថោក បញ្ហាហេដ្ឋារចនាសម្ព័ន្ធ ផ្លូវ ទឹក ភ្លើង វិស័យអប់រំ វិស័យសុខាភិបាល និងច្បាប់ចរាចរណ៍ជាដើម។ ជុំវិញសំណួរសំណូមពរទាំងនេះ មន្ត្រីជំនាញ និងអ្នកពាក់ព័ន្ធ បានធ្វើការបកស្រាយ និងឆ្លើយតបជូនដល់បងប្អូនប្រជាពលរដ្ឋ និងនៅសំណួរសំណូមពរដែលមិនទាន់បានបកស្រាយ ក្រុមការងារនឹងយកទៅពិនិត្យពិភាក្សា ក្នុងក្របខណ្ឌក្រុមប្រឹក្សាខេត្ត ហើយនឹងធ្វើការឆ្លើយតបជាលាយលក្ខណ៍អក្សរជូនដល់បងប្អូនតាមរយៈអាជ្ញាធរមូលដ្ឋាននាពេលឆាប់ៗខាងមុខ។
ថ្លែងបិទអង្គវេទិកា ឯកឧត្តមប្រធានក្រុមប្រឹក្សាខេត្ត បានគូសបញ្ជាក់ថា វេទិកានាពេលនេះ ពិតជាមានសារៈសំខាន់ណាស់ ក្នុងការជួយជំរុញដល់ការអនុវត្តមុខងាររបស់អ្នកពាក់ព័ន្ធ រួមនឹងអាជ្ញាធរមូលដ្ឋាន ឱ្យកាន់តែមានប្រសិទ្ធភាព ស្របតាមច្បាប់លិខិតបទដ្ឋានគតិយុត្តិនៅថ្នាក់មូលដ្ឋាន។ ក្នុងនោះការពិនិត្យ និងដោះស្រាយបញ្ហា សំណួរសំណូមពររបស់បងប្អូនប្រជាពលរដ្ឋ នឹងជួយជំរុញដល់ការអភិវឌ្ឍសេដ្ឋកិច្ចសង្គម សំដៅលើកកម្ពស់គុណភាពជីវិត កាត់បន្ថយភាពក្រីក្ររបស់បងប្អូនប្រជាពលរដ្ឋ នៅតាមបណ្ដាក្រុងស្រុក នៃខេត្តសៀមរាបទាំងមូល៕
អត្ថបទ និងរូបភាព៖ លោក ទ្រា ពន្លឺ , មុី សុខារិទ្ធ
កែសម្រួល៖ លោក អ៊ុន ណារាជ្យ
