សិស្សានុសិស្សមានជីវភាពខ្វះខាតជិត៦០នាក់ នៅវិទ្យាល័យចំណេះទូទៅ និងបច្ចេកទេសពួក ស្រុកពួក ខេត្ដសៀមរាប កាលពីថ្ងៃទី១៩ ខែធ្នូ ឆ្នាំ២០២៤នេះបានទទួលអំណោយជាសំលៀកបំពាក់ និងកង់ ពីសប្បុរសជនរស់នៅក្នុង និងក្រៅប្រទេស ដើម្បីជាការជួយសម្រួលដល់ការធ្វើដំណើររបស់ប្អូនៗទៅសិក្សារៀនសូត្រ។
លោក អាន លឹមខេង នាយកវិទ្យាល័យចំណេះទូទៅ និងបច្ចេកទេសពួក បានឱ្យដឹងថា វិទ្យាល័យនេះមានសិស្សប្រមាណ ៤.០០០នាក់ ក្នុងនោះពួកគាត់មួយចំនួនមកពីក្រុមគ្រួសារមានជីវភាពលំបាក ហើយគ្មានមធ្យោបាយធ្វើដំណើរមកសិក្សា ទើបថ្នាក់ដឹកនាំសាលាតែងកៀងគរសប្បុរសជនជួយឧបត្ថម្ភដល់ពួកគាត់ជាបន្តបន្ទាប់ជារៀងរាល់ឆ្នាំ។ ជាក់ស្ដែងអំណោយនាពេលនេះ គឺបានមកពីសប្បុរសជនរស់នៅសហរដ្ឋមអាមេរិក មានកង់៤៩គ្រឿង និងសម្លៀកបំពាក់ ៤០កំផ្លេ និងកង់មួយចំនួនទៀតជារបស់សប្បុរសជនរស់នៅក្នុងស្រុក។ លោកក៏សូមថ្លែងអំណរគុណដល់សប្បុរសជនជិតឆ្ងាយ ដែលបានជួយឧបត្ថម្ភដល់វិទ្យាល័យមួយនេះ ដើម្បីជួយសម្រួលដល់សិស្សក្រីក្រ និងមានជីភាពខ្វះខាត និងសូមអំពាវនាវដល់សប្បុរសជន បន្តជួយឧបត្ថម្ភជាសម្ភារៈ ឬមធ្យោបាយធ្វើដំណើរបន្ថែមទៀតដល់សិស្សានុសិស្សមានជីវភាពខ្វះខាត។
ក្នុងនាមអាជ្ញាធរមូលដ្ឋាន លោក ស៊ីន ចាន់ថុល អភិបាលស្រុកពួក បានបញ្ជាក់ថា សប្បុរសជនដែលផ្ដល់អំណោយនេះ ពីមុនពួកគាត់ធ្លាប់រស់នៅស្រុកពួក និងសិក្សារៀនសូត្រនៅវិទ្យាល័យពួកនេះ ហើយធ្លាប់ឆ្លងកាត់ការលំបាកទៅសិក្សារៀនសូត្រនៅសាលា ធ្លាប់ជួបប្រទះនូវវភ្លើងសង្គ្រាម ប៉ុន្ដែក្រោយពេលប្រទេសជាតិមានសុខសន្ដិភាព ទើបមានឱកាសមកលេងស្រុកកំណើតបានផ្ដល់អំណោយដល់សិស្សានុសិស្សនេះ។ អំណោយទាំងនេះ វានឹងអាចជួយឱ្យប្អូនៗមានមធ្យោបាយធ្វើដំណើរទៅមកសាលារៀនទាន់ពេលវេលា និងជួយសម្រួលបន្ទុកដល់គ្រួសារបានមួយចំនួនផងដែរ។
លោកអភិបាលស្រុកបន្តថា ដើម្បីឆ្លើយតបនឹងទឹកចិត្តរបស់ម្ចាស់ជំនួយ សូមឱ្យប្អូនៗទាំងអស់ខិតខំសិក្សារៀនសូត្រ មានចំណេះដឹង មានការងារធ្វើល្អ និងឱ្យក្លាយជាពលរដ្ឋល្អនៅក្នុងសង្គម។ ជាមួយនោះសូមឱ្យប្អូនៗ ត្រូវគិតថានៅក្នុងសាលារៀនមិនថា កូនអ្នកមាន ឬអ្នកក្រនោះទេ គឺអាចទៅសិក្សាយកចំណេះបានដូចគ្នា មានសំលៀកបំពាក់ដូចគ្នា មិនប្រកាន់វណ្ណៈ ពណ៌សម្បុរនោះឡើយ ហើយអាជ្ញាធរស្រុក និងអាជ្ញាធរពាក់ព័ន្ធនឹងបន្ដស្វែងរកជំនួយពីសប្បុរសជនបន្ថែមទៀត ដើម្បីជួយជ្រោមជ្រែកដល់វិទ្យាល័យនេះ៕
អត្ថបទ និងរូបភាព៖ លោក ឈិត សាវី
កែសម្រួល៖ លោក អ៊ុន ណារាជ្យ
