នៅរសៀលថ្ងៃទី១៩ ខែធ្នូ ឆ្នាំ២០២៤នេះ គណៈកម្មាធិការប្រយុទ្ធប្រឆាំងអំពើជួញដូរមនុស្សខេត្តសៀមរាប ហៅកាត់ថា គ.ខ.ប.ជ បានរៀបចំទិវាជាតិប្រយុទ្ធប្រឆាំងអំពើជួញដូរមនុស្ស ១២ធ្នូ ២០២៤ ក្នុងគោលបំណងផ្សព្វផ្សាយឱ្យប្រជាពលរដ្ឋបានយល់ដឹងឱ្យបានទូលំទូលាយអំពីអំពើជួញដូរមនុស្ស កលល្បិចផ្សេងៗរបស់ជនល្មើស ដែលពិធីនេះប្រព្រឹត្តិទៅក្រោមអធិបតីភាព លោកជំទាវ ជូ ប៊ុនអេង រដ្ឋលេខាធិការក្រសួងមហាផ្ទៃ និងជាអនុប្រធានអចិន្ត្រៃយ៍នៃគណៈកម្មាធិការជាតិប្រយុទ្ធប្រឆាំងអំពើជួញដូរមនុស្ស (គ.ប.ជ) ដោយមានការចូលរួមពី លោកស្រី ម៉ននី រង្សី អភិបាលរងខេត្ត និងជាអនុប្រធានអចិន្ត្រៃយ៍ គ.ខ.ប.ជ និងអ្នកពាក់ព័ន្ធជាច្រើនអង្គនាក់ចូលរួមផងដែរ។
លោកស្រី ម៉ននី រង្សី បានបញ្ជាក់ថា ក្នុងខេត្តសៀមរាប រយៈពេល១០ខែ ឆ្នាំ២០២៤នេះ កម្លាំងនគរបាលយុត្តិធម៌ បានធ្វើការបង្ក្រាបបទល្មើសពាក់ព័ន្ធនឹងច្បាប់ស្តីពីការបង្ក្រាបអំពើជួញដូរមនុស្ស និងអំពើធ្វើអាជីវកម្មផ្លូវភេទ បានចំនួន១៤ករណី ដោយបានធ្វើការឃាត់ខ្លួនជនសង្ស័យ ២២នាក់ ស្រី៣នាក់។ ជាមួយនោះស្ថាប័នតុលាការ និងអយ្យការអមសាលាដំបូងខេត្ត បានចំណាត់ការលើរឿងក្តីពាក់ព័ន្ធនឹងច្បាប់ ស្តីពីការបង្ក្រាបអំពើជួញដូរមនុស្ស និងអំពើធ្វើអាជីវកម្មផ្លូវភេទបានយ៉ាងសកម្ម និងបានពន្លឿនទៅតាមនីតិវិធី។
ថ្លែងក្នុងឱកាសនោះ លោកជំទាវ ជូ ប៊ុនអេង អនុប្រធានអចិន្ត្រៃយ៍ គ.ប.ជ មានប្រសាសន៍ថា ការជួបជុំនេះជាការបង្ហាញនូវស្មារតីសាមគ្គីភាព និងការយកចិត្តទុកដាក់ ចំពោះការងារប្រឆាំងការជួញដូរមនុស្ស សកម្មភាពនៃបទល្មើសឧក្រិដ្ឋ ដែលបានធ្វើឱ្យប៉ះពាល់យ៉ាងខ្លាំងដល់ដំណើរការអភិវឌ្ឍ រីកចម្រើន សេចក្តីថ្លៃថ្នូររបស់មនុស្សជាតិ និងកិត្តិយសរបស់កម្ពុជា។ រាជរដ្ឋាភិបាលកម្ពុជា បានប្តេជ្ញាចិត្តខ្ពស់ ប្រឆាំងដាច់ខាតរាល់ការប៉ុនប៉ងបង្កវិនាសកម្មនៅកម្ពុជា តាមគ្រប់រូបភាព ជាពិសេសប្រឆាំងដាច់ខាតអំពើជួញដូរមនុស្សគ្រប់ទម្រង់ និងគ្រប់មធ្យោបាយក្នុងយុគសម័យឌីជីថល។
លោកជំទាវបន្តថា បញ្ហាទាំងនេះ មិនមែនបញ្ហាសម្រាប់កម្ពុជានោះឡើយ គឺបានជះឥទ្ធិពលនៅក្នុងតំបន់ និងពិភពលោក និងនៅតាមបណ្តាប្រទេសដែលមានស្ថានភាពសេដ្ឋកិច្ចទាប។ ជាមួយគ្នានេះការពារសុវត្ថិភាព និងសេចក្តីសុខក្សេមក្សាន្តរបស់ប្រជាជនកម្ពុជា និងមនុស្សជាតិទូទៅ រាជរដ្ឋាភិបាលកម្ពុជា ដៃគូពាក់ព័ន្ធជាតិ និងអន្តរជាតិ ក៏បានរួមគ្នាខិតខំប្រឹងប្រែងដោយប្រយុទ្ធប្រឆាំងដាច់ខាតអំពើជួញដូរមនុស្សគ្រប់ទម្រង់។ លោកជំទាវបានជំរុញ ដល់គ្រប់អ្នកពាក់ព័ន្ធ ប្រព័ន្ធផ្សព្វផ្សាយជាតិ និងអន្តរជាតិ ចូលរួមសហការក្នុងការផ្សព្វផ្សាយព័ត៌មានពិតពីកម្ពុជា និងជាមធ្យោបាយក្នុងការបង្ការទប់ស្កាត់ ឈានទៅលុបបំបាត់អំពើជួញដូរមនុស្ស ដើម្បីលើកកម្ពស់កិត្យានុភាពជាតិកម្ពុជាឱ្យកាន់តែរុងរឿង៕
អត្ថបទ និងរូបភាព៖ លោក ម៉ី សុខារិទ្ធ
កែសម្រួល៖ លោក អ៊ុន ណារាជ្យ
