នៅព្រឹកថ្ងៃទី១៩ ខែធ្នូ ឆ្នាំ២០២៤នេះ ក្រសួងកិច្ចការនារី បានរៀបចំសិក្ខាសាលាបិទគម្រោង “ការបង្កើតភាពអង់អាចផ្នែកសេដ្ឋកិច្ចដល់ស្ត្រីក្នុងយុគសម័យឌីជីថល” នៅខេត្តសៀមរាប ក្រោមអធិបតីភាព លោកជំទាវ គឹម ស៊ីផាត់ រដ្ឋលេខាធិការប្រចាំការក្រសួងកិច្ចការនារី ដោយមានការចូលរួមពី លោកស្រី ម៉ននី រង្សី អភិបាលរងខេត្ត តំណាងស្ថានទូតចិន និងក្រសួងការបរទេស និងសហប្រតិបត្តិការអន្តរជាតិ ក្រុមការងារអនុវត្តគម្រោង សិក្ខាកាមមកពីប្រទេសថៃ និងវៀតណាម និងអ្នកពាក់ព័ន្ធជាច្រើនរូបទៀត។
លោកស្រីម៉ននី រង្សី អភិបាលរងខេត្ត មានប្រសាសន៍ថា ក្រសួងកិច្ចការនារី ការរៀបចំសិក្ខាសាលានេះ គឺដោយទទួលបានមូលនិធិពិសេស ពីកិច្ចសហប្រតិបត្តិការមេគង្គ-ឡានឆាង សម្របសម្រួលដោយក្រសួងការបរទេស និងគាំទ្រដោយភាគីចិន។ គម្រោងសាកល្បងនេះដែលរួមមាន៖ កម្ពុជា វៀតណាម និងថៃ ពាក់ព័ន្ធនឹងការបង្កើនភាពអង់អាចផ្នែកសេដ្ឋកិច្ចដល់ស្ត្រីក្នុងយុគសម័យឌីជីថល ក្នុងន័យជំរុញឱ្យស្ត្រីទទួលបានចំណេះ និងជំនាញឌីជីថល និងអាចទាញប្រយោជន៍ពីការប្រើប្រាស់ឌីជីថល ប្រកបដោយភាពទាន់សម័យ ឆ្លាតវៃ ការទទួលខុសត្រូវខ្ពស់ក្នុងការប្រកបមុខរបរសម្រាប់ជីវភាពប្រចាំថ្ងៃរបស់ខ្លួនបាន។ ចំពោះសិក្ខាសាលាបិទគម្រោងនាថ្ងៃនេះដែរ គឺជាសក្ខីភាពដែលបានបង្ហាញពីវឌ្ឍនភាពនៃកិច្ចសហការយ៉ាងល្អ រវាងភាគីអនុវត្តគម្រោងទាំងអស់ ក្នុងការរួមចំណែកយ៉ាងសកម្មក្នុងការពង្រឹងភាពអង់អាចផ្នែកសេដ្ឋកិច្ចដល់ស្ត្រីក្នុងយុគសម័យឌីជីថល។
ក្នុងឱកាសនោះដែរ លោកជំទាវ គឹម ស៊ីផាត់ មានប្រសាសន៍ថា រាជរដ្ឋាភិបាល នីតិកាលទី៧ ក្រោមការដឹកនាំរបស់សម្តេចធិបតី ហ៊ុន ម៉ាណែត នាយករដ្ឋមន្ត្រី បានបន្តកំណត់ការលើកកម្ពស់សមភាពយេនឌ័រ និងការបង្កើនភាពអង់អាចរបស់ស្ត្រីនៅគ្រប់វិស័យ ជាអាទិភាពក្នុងរបៀបវារៈគោលនយោបាយ និងយុទ្ធសាស្ត្របញ្ចកោណដំណាក់កាលទី១ ដើម្បីកំណើនការងារ សមធម៌ ប្រសិទ្ធភាព និងចីរភាព ក្នុងការកសាងមូលដ្ឋានគ្រឹះឆ្ពោះទៅសម្រេចចក្ខុវិស័យកម្ពុជាឆ្នាំ ២០៥០ តាមរយៈការពង្រឹងភាពជាពលរដ្ឋក្នុងសង្គមដែលមានអារ្យធម៌ខ្ពស់ ប្រកបដោយសីលធម៌ សមធម៌ និងបរិយាបន្ន ដែលក្នុងនោះស្ត្រី គឺជាស្នូល។ អ្វីដែលសំខាន់គឺផ្តោតទៅលើការបង្កើនការវិនិយោគលើយេនឌ័រ និងការបង្កើនភាពអង់អាចដល់ស្ត្រី និងក្មេងស្រី នៅក្នុងវិស័យសេដ្ឋកិច្ច, អប់រំ, សុខភាព និងការដឹកនាំសាធារណៈ ដើម្បីទាញយកអត្ថប្រយោជន៍ពីភាគលាភយេនឌ័រ។
លោកជំទាវ រដ្ឋលេខាធិការប្រចាំការ មានប្រសាសន៍បន្តថា ស្រ្តីបាននិងកំពុងចូលរួមយ៉ាងសកម្ម ក្នុងការលើកកម្ពស់ស្ថានភាពជីវភាពគ្រួសារ និងកំណើនសេដ្ឋកិច្ចគ្រួសារ និងជាតិ ដែលទាំងនេះសបញ្ជាក់ថា ការអភិវឌ្ឍសេដ្ឋកិច្ចស្រ្តី ជាពិសេសការកសាងភាពសហគ្រិនសម្រាប់ស្ត្រី ក្នុងបរិវត្តកម្មឌីជីថល គឺជាកាលានុវត្ត ភាពនៃការវិនិយោគដ៏ឆ្លាតវៃ ហេតុនេះដូច្នេះហើយគម្រោងសាកល្បង ស្តីពីការបង្កើនភាពអង់អាចផ្នែកសេដ្ឋកិច្ចក្នុងយុគសម័យឌីជីថលនៅក្នុងប្រទេសទាំងបី ពិតជាមានសារៈសំខាន់ និងចាំបាច់នៅក្នុងបរិកានេះ។ សិក្ខាសាលាបិទគម្រោងនេះដែរ ក៏ជាឱកាសមួយដើម្បីចែករំលែកបទពិសោធទៅវិញទៅមក និងពិភាក្សាអំពីបញ្ហាប្រឈម ការកសាងយុទ្ធសាស្ត្របន្ថែមទៀត ក្នុងកិច្ចអភិវឌ្ឍជាតិ និងសង្គម ជាពិសេសក្នុងក្របខ័ណ្ឌរួមនៃកិច្ចសហការប្រតិបត្តិការមេគង្គ-ឡានឆាង៕
អត្ថបទ និងរូបភាព៖ លោក ទ្រា ពន្លឺ, ជា ស្រស់
កែសម្រួល៖ លោក អ៊ុន ណារាជ្យ
