នៅព្រឹកថ្ងៃទី១៨ ខែធ្នូ ឆ្នាំ២០២៤នេះ អាជ្ញាធរខេត្តសៀមរាប បានបន្តបើកវេទិកាផ្សព្វផ្សាយ និងពិគ្រោះយោបល់របស់ក្រុមប្រឹក្សាខេត្ត អាណត្តិទី៤ សម្រាប់គោលដៅទី៦ នៅស្រុកវ៉ារិន ខេត្តសៀមរាប ដើម្បីបង្ហាញពីសមិទ្ធផលដែលក្រុមប្រឹក្សា និងរដ្ឋបាលខេត្តសម្រេចបានកន្លងមក និងដើម្បីទទួល និងដោះស្រាយនូវសំណួរសំណូមពរប្រជាពលរដ្ឋ ក្រោមការដឹកនាំរបស់ ឯកឧត្តម តោ គឹមស៊ាន សមាជិកក្រុមប្រឹក្សាខេត្ត និង លោក សុខ ថុល អភិបាលរងខេត្ត ដោយមានចូលរួមពីសំណាក់ ឯកឧត្តម លោកជំទាវសមាជិកក្រុមប្រឹក្សាខេត្ត ថ្នាក់ដឹកនាំមន្ទីរអង្គភាព អាជ្ញាធរមូលដ្ឋាន និងប្រជាពលរដ្ឋជាច្រើនរូប។
ឯកឧត្តម តោ គឹមស៊ាន មានប្រសាសន៍ថា វេទិកានាពេលនេះ គឺផ្តល់ឱកាសជូនប្រជាពលរដ្ឋ និងអ្នកពាក់ព័ន្ធ បានស្វែងយល់ពីស្ថានភាពទូទៅនៃការអភិវឌ្ឍក្នុងខេត្តសៀមរាបទាំងមូល និងប្រមូលនូវរាល់បញ្ហាប្រឈមនានា ជាពិសេសជាឱកាសសម្រាប់បងប្អូនក្នុងការបញ្ចេញមតិ ពាក់ព័ន្ធនឹងក្តីកង្វល់ តម្រូវការជាក់ស្តែងក្នុងមូលដ្ឋានរបស់បងប្អូន។ ឯកឧត្តមបន្តថា រាល់ការអភិវឌ្ឍលើគ្រប់វិស័យ ពិតណាស់មានលទ្ធផលវិជ្ជមានទៅបាន ដរាបណាមានការចូលរួមជាធនធានថវិកា ការថែទាំ និងមតិយោបល់ពីប្រជាពលរដ្ឋ អង្គការសង្គមស៊ីវិល វិស័យឯកជន និងអ្នកពាក់ព័ន្ធផ្សេងៗទៀត ដែលយើងគ្រប់គ្នាត្រូវដឹងឱ្យបានច្បាស់អំពីតម្រូវការរបស់ពួកគាត់ ទើបយើងអាចធ្វើការអភិវឌ្ឍបានចំទិសដៅ និងស្របតាមតម្រូវការរបស់ពួកគាត់។
សូមជម្រាបថា វេទិកានាពេលនេះដែរ ក្រុមការងារទទួលបាននូវសំណួរសំណូមពរពីបងប្អូនប្រជាពលរដ្ឋចំនួន ១៧សំណួរសំណូមពរ ដោយផ្ទាល់មាត់ចំនួន១១ និងជាលាយលក្ខណ៍អក្សរចំនួន៦ ពាក់ព័ន្ធនឹងបញ្ហាហេដ្ឋារចនាសម្ព័ន្ធ និងទំនាស់ដីធ្លីដែលមិនទាន់បានដោះស្រាយ។ ក្នុងនោះសំណួរ និងសំណូមពរផ្ទាល់មាត់ចំនួន១១ ត្រូវបានមន្ត្រីជំនាញពាក់ព័ន្ធបានធ្វើការស្រាយបំភ្លឺភ្លាមៗ។ ចំពោះសំណួរសំណូមពរជាលាយលក្ខណ៍អក្សរចំនួន៦ នៅមិនទាន់បានឆ្លើយបំភ្លឺ ក្រុមប្រឹក្សាខេត្ត នឹងប្រមូលយកទៅពិនិត្យ ពិភាក្សាក្នុងក្របខណ្ឌក្រុមប្រឹក្សាខេត្ត ហើយនឹងធ្វើការឆ្លើយតប និងជម្រាបជូនដំណឹងជាលាយលក្ខណ៍អក្សរដល់ម្ចាស់សំណួរក្នុងពេលឆាប់ៗខាងមុខ។
ក្នុងឱកាសនោះ លោក សុខ ថុល អភិបាលរងខេត្ត បានថ្លែងនូវការកោតសរសើរ ចំពោះប្រជាពលរដ្ឋក្នុងស្រុកវ៉ារិន ដែលបានលើកឡើងនូវសំណើ និងសំណួរសំណូមពរយ៉ាងផុសផុលក្នុងអង្គវេទិកានាថ្ងៃនេះ ដែលសបញ្ជាក់ឱ្យឃើញថា ប្រជាពលរដ្ឋមានជំនឿទុកចិត្តជាមួយរដ្ឋបាលគ្រប់ជាន់ថ្នាក់ ក្នុងការដោះស្រាយនូវរាល់បញ្ហាប្រឈមរបស់បងប្អូន នឹងជួយជំរុញដល់ការអនុវត្តមុខងារគ្រប់ស្ថាប័នពាក់ព័ន្ធ រួមនឹងអាជ្ញាធរមូលដ្ឋាន ឱ្យការដោះស្រាយប្រកបដោយតម្លាភាព និងមានប្រសិទ្ធភាព ស្របតាមច្បាប់លិខិតបទដ្ឋានគតិយុត្តនៅថ្នាក់មូលដ្ឋាន។
ថ្លែងបិទអង្គវេទិកា ឯកឧត្តម តោ គឹមស៊ាន បានជំរុញដល់អាជ្ញាធរពាក់ព័ន្ធ ត្រូវពិនិត្យ តាមដាន និងដោះស្រាយរាល់សំណើ និងសំណូមពររបស់ប្រជាពលរដ្ឋ ដែលជាបញ្ហាប្រឈមចាំបាច់ ប្រកបដោយការយកចិត្តទុកដាក់ខ្ពស់ ពិសេសត្រូវមានឥរិយាបថទន់ភ្លន់ ម៉ឺងម៉ាត់ ដោយត្រូវចងចាំថា មន្ត្រីរាជការគឺជាអ្នកបម្រើដ៏ស្មោះត្រង់របស់ប្រជាពលរដ្ឋ៕
អត្ថបទ និងរូបភាព៖ លោក ធន់ ពូថេ
កែសម្រួល៖ លោក អ៊ុន ណារាជ្យ
