រដ្ឋបាលខេត្ដសៀមរាប បានធ្វើការរៀបចំវេទិកាផ្សព្វផ្សាយ និងពិគ្រោះយោបល់របស់ក្រុមប្រឹក្សា អាណត្តិទី៤ ឆ្នាំ២០២៤ គោលដៅទី៤ ស្រុកស្វាយលើ ដឹកនាំដោយ ឯកឧត្តម លី សំរិទ្ឋ ប្រធានក្រុមប្រឹក្សាខេត្ត និងលោក លី សារី អភិបាលរងខេត្ត តំណាងដ៍ខ្ពង់ខ្ពស់ឯកឧត្តម ប្រាក់ សោភ័ណ អភិបាលនៃគណៈអភិបាលខេត្តសៀមរាប ដោយមានវត្តមានអញ្ជើញចូលរួម ពីឯកឧត្តម លោកជំទាវ សមាជិក សមាជិកាក្រុមប្រឹក្សាខេត្ត លោក លោកស្រី ថ្នាក់ដឹកនាំមន្ទីរ-អង្គភាពនានាជុំវិញខេត្ត ប្រជាពលរដ្ឋ និងអាជ្ញាធរមូលដ្ឋាន សិស្សានុសិស្ស ព្រះសង្ឃប្រមាណជាង៣០០អង្គ/នាក់ ដែលរៀបចំឡើង នៅថ្ងៃទី១៦ ខែធ្នូ ឆ្នាំ២០២៤ ក្នុងបរិវេណវត្តរហាល ឃុំតាសៀម ស្រុកស្វាយលើ។ វេទិការនេះ មានគោលបំណងបង្ហាញឱ្យប្រជាពលរដ្ឋដឹងអំពីសមិទ្ធផលដែលក្រុមប្រឹក្សាខេត្ត ក៍ដូចជារដ្ឋបាលខេត្ត សម្រេចបាននាពេលកន្លងមក ជាពិសេសពិភាក្សាពិគ្រោះយោបល់ និងស្ដាប់ការលើកឡើង និងសំណូមពរពីបញ្ហាប្រឈមមួយចំនួនរបស់ប្រជាពលរដ្ឋដើម្បីដោះស្រាយឱ្យមានភាពល្អប្រសើរ។
ឯកឧត្ដម លី សំរិទ្ធ ប្រធានប្រធានក្រុមប្រឹក្សា ខេត្ដសៀមរាប មានប្រសាសន៍បើកវេទិកានេះថា វេទិកាផ្សព្វផ្សាយ និងពិគ្រោះយោបល់របស់ក្រុមប្រឹក្សាខេត្ត ជាព្រឹត្តិការណ៍ដ៏មានសារៈសំខាន់ប្រចាំឆ្នាំស្របតាមច្បាប់ ស្តីពីការគ្រប់គ្រងរដ្ឋបាលរាជធានី ខេត្ត ក្រុង ស្រុក ខណ្ឌ ដែលបានផ្តល់ឱកាសជូនបងប្អូនប្រជាពលរដ្ឋ និងអ្នកពាក់ព័ន្ធទាំងអស់ ចូលរួមស្វែងយល់ពីស្ថានភាពទូទៅ នៃការអភិវឌ្ឍខេត្ត ក្រុង ស្រុក ឃុំ សង្កាត់ និងបញ្ហាប្រឈមនានា ព្រមទាំងបើកឱកាសជូនបងប្អូនប្រជាពលរដ្ឋ អ្នកពាក់ព័ន្ធ ទាំងអស់ ក្នុងការបញ្ចេញមតិរបស់ខ្លួន ដែលពាក់ព័ន្ធនឹងក្តីកង្វល់ សំណូមពរ តម្រូវការជាក់ស្តែងក្នុងមូលដ្ឋាន ដែលវាគ្មិន ជាប្រធាន ឬតំណាងមន្ទីរ-អង្គភាពនានា ក្នុងខេត្តនឹងធ្វើការ បកស្រាយបំភ្លឺនូវសំណួរ-សំណូមពរ ដែលបងប្អូនប្រជាពលរដ្ឋបានលើកឡើង។
ឯកឧត្ដមបន្ដថា ការអភិវឌ្ឍប្រទេសជាតិ ការអភិវឌ្ឍមូលដ្ឋាន មានលទ្ធផលវិជ្ជមាន ទៅបានដរាបណាមានការចូលរួមជាធនធានថវិកា ការថែទាំ និងមតិយោបល់ពីប្រជាពលរដ្ឋ អង្គការសង្គមស៊ីវិល ផ្នែកឯកជន អ្នកពាក់ព័ន្ធផ្សេងៗទៀត និងត្រូវដឹងឱ្យបានច្បាស់អំពីតម្រូវការរបស់ពួកគាត់ ទើបយើងអាច ធ្វើការអភិវឌ្ឍបានចំទិសដៅ និងស្របតាមតម្រូវការរបស់ពួកគាត់។
ទន្ទឹមនឹងនេះ ការស្វែងយល់ពីតម្រូវការ ដែលទទួលបានលទ្ធផលល្អប្រសើរលុះត្រាតែអាជ្ញាធរមានសមត្ថកិច្ចពាក់ព័ន្ឋចុះទៅផ្ទាល់ជាមួយប្រជាពលរដ្ឋ ដើម្បីរកដំណោះស្រាយឱ្យបានសមស្របទាន់ពេលវេលា និងត្រូវរាយការណ៍ពីបញ្ហាប្រឈមនានា ដែលមិនអាចដោះស្រាយបានក្នុងដែនសមត្ថកិច្ចរបស់ខ្លួនជូនថ្នាក់លើ ដើម្បីជួយដោះស្រាយបញ្ហាជូនដល់ ប្រជាពលរដ្ឋក្នុងមូលដ្ឋាន។ ជាមួយគ្នានេះ ប្រជាពលរដ្ឋក៏មានតួនាទីសំខាន់ផងដែរ ក្នុងការចូលរួមជាមួយអាជ្ញាធរមូលដ្ឋាន តាមរយៈការរាយការណ៍ពីបញ្ហាប្រឈមនានា ដែលបានជួបប្រទះ និងមិនអាចដោះស្រាយបានក្នុងមូលដ្ឋានរបស់ខ្លួន។
អង្គវេទិកាទទួលបានសំណួរ និងសំណូមពរផ្ទាល់មាត់ពីបងប្អូនប្រជាពលរដ្ឋនិងអាជ្ញាធរដែនដី ពាក់ព័ន្ឋទៅនឹងបញ្ហាហេដ្ឋារចនាសម្ព័ន្ធ ទឹកភ្លើងផ្លូវ វិស័យអប់រំ កសិកម្ម ជាដើម។ វេទិកាក៍មានវាគ្មិនបានធ្វើការបកស្រាយបំភ្លឺឆ្លើយតបទៅនឹងសំណួរ កង្វល់របស់បងប្អូនប្រជាពលរដ្ឋជាបន្តបន្ទាប់។ ដោយឡែក សំណួរសំណូមពរជាលាយលក្ខ័អក្សរចំនួន៤នៅមិនទាន់បានឆ្លើយបំភ្លឺ ក្រុមប្រឹក្សាខេត្ត នឹងប្រមូលយកសំណួរ និងសំណូមពរទាំងនេះ ទៅពិនិត្យ ពិភាក្សាក្នុងក្របខណ្ឌក្រុមប្រឹក្សាខេត្តហើយនឹងធ្វើការឆ្លើយតប និងជម្រាបជូនដំណឹងជាលាយលក្ខណ៍អក្សរ ដល់ម្ចាស់សំណួរ បងប្អូនប្រជាពលរដ្ឋ តាមកាលវេលាសមគួរតាមរយៈ មេឃុំ ចៅសង្កាត់ ក្រុមប្រឹក្សាឃុំ សង្កាត់ តាមលំដ្ឋានដែលប្រជាពលរដ្ឋ។
ក្រោយពីពិភាក្សាពិគ្រោះយោបល់ អស់រយៈពេលមួយព្រឹក ឯកឧត្តម លី សំរិទ្ឋ ប្រធានក្រុមប្រឹក្សាខេត្ត មានប្រសាសន៍ថា វេទិកានេះ នឹងជួយជម្រុញដល់ការអនុវត្តមុខងារគ្រប់ស្ថាប័នពាក់ព័ន្ធ រួមនឹងអាជ្ញាធរមូលដ្ឋានឲ្យការដោះស្រាយគ្នាប្រកបដោយតម្លាភាព និងមានប្រសិទ្ធភាព ស្របតាមច្បាប់លិខិតបទដ្ឋានគតិយុត្តនៅថ្នាក់មូលដ្ឋាន។ ឯកឧត្តមបញ្ជាក់ថា៖ រដ្ឋបាលខេត្តនឹងនាំយកនូវសំណូមពរនិងកង្វល់ទាំងនេះដើម្បីធ្វើការពិនិត្យ ពិចារណា និងដោះស្រាយសំដៅលើកកម្ពស់គុណភាពជីវិតរបស់បងប្អូនប្រជាពលរដ្ឋ និងឈានទៅរកការកាត់បន្ថយភាពក្រីក្រ ដើម្បីឱ្យវិស័យសេដ្ឋកិច្ច និងសង្គមជាតិមានការរីកចម្រើនទៅមុខបន្ថែមទៀត។
អត្ថបទ និងរូបភាព ៖ លោក ឈិត សាវី
កែសម្រួល៖ លោក ហាំ ម៉េងហួត
