ក្នុងឱកាសចម្រើនជន្មាយុ របស់ឯកឧត្តម សៀង ណាំ អ្នកតំណាងរាស្រ្តមណ្ឌលសៀមរាប នៅព្រឹកថ្ងៃទី១៦ ខែធ្នូ ឆ្នាំ ២០២៤ ឯកឧត្តម និងលោកជំទាវ បានអញ្ជើញសាកសួរសុខទុក្ខ និងចែកអំណោយជូនដល់បងប្អូនប្រជាពលរដ្ឋដែលមានជីវភាពលំបាកក្រ០១ និងក្រ០២ ចំនួន២៥០គ្រួសារ នៅសង្កាត់ស្រង៉ែ ក្រុងសៀមរាប ខេត្តសៀមរាប ។
ពិធីជួបសំណេះសំណាលនាពេលនេះ ឯកឧត្តម សៀង ណាំ មានប្រសាសន៍ថា៖ ក្នុងជីវិតយើងម្នាក់ៗរមែងជួបនូវ ទុក្ខលំបាក និងសេចក្តីសុខ ចៀសរួចទេ គ្រាន់តែទំហំទុក្ខ និងសុខនោះវាខុសគ្នា ហេតុនេះដើម្បីជម្នះរាល់ការលំបាកបាន យើងម្នាក់ៗ ត្រូវខំប្រឹងព្យាយាម ធ្វើស្រែចម្ការ ដាំដុះ ប្រកបរបរផ្សេងៗកុំទំនេរដៃ។
ឯកឧត្តម សៀង ណាំ បានអំពាវនាវដល់បងប្អូនប្រជាពលរដ្ឋទាំងអស់យកចិត្តទុកដាក់ឱ្យអស់ពីលទ្ឋភាពលើកទឹកចិត្ត និងជំរុញកូនចៅចូលរៀន និងឱ្យរៀនសូត្រឱ្យបានខ្ពស់ ដើម្បីអនាគតពួកគាត់មានភាពរុងរឿង មានចំណេះដឹង និងសមត្ថភាពពេញលេញ ងាយស្រួលរកការងារធ្វើ ក្លាយជាធនធានមនុស្សដ៏មានសក្តានុពល សម្រាប់រួមចំណែកអភិវឌ្ឍសេដ្ឋកិច្ចគ្រួសារក៏ដូចជាសង្គមជាតិយើង។
ឯកឧត្តម ក៏បន្តថា ត្រូវតែតាមដាន និងអប់រំទូន្មានកូនចៅរបស់យើងឱ្យចៀសឆ្ងាយពីគ្រឿងញៀន និងអំពើអបាយមុខគ្រប់ប្រភេទ សូមយកចិត្តទុកដាក់លើការថែទាំសុខភាព អនាម័យក្នុងការរស់នៅ និងត្រូវគោរពច្បាប់ចរាចរណ៍ទាំងអស់គ្នាគ្រប់ពេលធ្វើដំណើរតាមដងផ្លូវ។
លោក ស ធានី អភិបាលរងក្រុងសៀមរាបបានមានប្រសាសន៍ថ្លែងអំណរគុណចំពោះទឹកចិត្តដ៏សប្បុរសធម៌របស់អ្នកតំណាងរាស្ត្រមណ្ឌលសៀមរាប និងលោកជំទាវដែលជានិច្ចកាលបានយកចិត្តទុកដាក់ និងគិតគូរពីសុខទុក្ខ និងការលំបាករបស់គ្រួសារខ្វះខាតនៅតាមមូលដ្ឋាន នេះជាសកម្មភាពមនុស្សធម៌ជួយចែករំលែក ដល់អ្នកកំពុងមានតម្រូវការចាំបាច់ក្នុងជីវភាពប្រចាំថ្ងៃពិតប្រាកដមែន ដែលក្នុងមួយគ្រួសារទទួលបានអង្ករ២០គីឡូក្រាម ថវិកា១ម៉ឺនរៀល និងសារុង០១៕
អត្ថបទ និងរូបភាព ៖ លោក យូ វង្ស
កែសម្រួល៖ លោក ហាំ ម៉េងហួត
