ការដេញថ្លៃគម្រោងសាងសង់ផ្លូវបេតុងអាមេមួយខ្សែ ប្រវែង២៥០ម៉ែត្រ ស្ថិតក្នុងភូមិសំបួរ នៃសង្កាត់សំបួរ ក្រុងសៀមរាប ខេត្តសៀមរាប ត្រូវបានប្រកាសបញ្ចប់ការដេញថ្លៃដោយជោគជ័យ នៅថ្ងៃទី១១ ខែធ្នូ ឆ្នាំ២០២៤នេះ ដោយមានការចូលរួមពីមន្ត្រីបច្ចេកទេសខេត្ត មន្រ្តីបច្ចេកទេសក្រុង គណៈកម្មការលទ្ធកម្មសង្កាត់ ក្រុមហ៊ុនម៉ៅការ និងអ្នកពាក់ព័ន្ធជាច្រើនរូប។
លោក ឈ្លឿន ឡា ប្រធានគណៈកម្មការលទ្ធកម្មសង្កាត់សំបួរ ក្រុងសៀមរាប បានឱ្យដឹងថា ចំពោះគម្រោងមូលនិធិសង្កាត់ឆ្នាំ២០២៤ សង្កាត់សំបួរ បានដាក់ដេញថ្លៃគម្រោងសាងសង់ផ្លូវបេតុងអាមេ ១ខ្សែ បន្ថែមទៀត ប្រវែង២៥០ម៉ែត្រ ទទឹង៦ម៉ែត្រ កម្រាស់បេតុង0.១៥ម៉ែត្រ (ដែក៨លី) ស្លាកសញ្ញាកំណត់ល្បឿនចំនួន១ ស្លាកចរាចរចំនួន១ ស្លាកគម្រោងចំនួន១ មានក្រួសធម្មជាតិស្មារផ្លូវទាំងសងខាង និងលូមុខ ០.៨០ម៉ែត្រ ចំនួន២កង់ សម្រាប់ដាក់ការពារឡានធំ។ គម្រោងនេះស្ថិតក្នុងតម្លៃប៉ាន់ស្មាន ១៩១.២២៧.៣៨៣រៀល ដោយមានក្រុមហ៊ុនចំនួន១០ បានដាក់សំណើ។ ជាលទ្ធផលបានទៅលើក្រុមហ៊ុន មុិញ អ៊ា ក្នុងតម្លៃ ៨៩.៦៥០.០០០រៀល។
ជាមួយនឹងការទទួលបានសិទ្ធិនៃការសាងសង់នេះ តំណាងក្រុមហ៊ុនម៉ៅការ បានធ្វើការប្ដេជ្ញាចិត្ត ដោយសន្យាសាងសង់ឱ្យត្រឹមត្រូវ ទាន់ពេលវេលា ស្របទៅតាមគំនូរប្លង់បច្ចេកទេស បទដ្ឋានគតិយុទ្ធនៃការសាងសង់ និងគោរពទៅតាមលក្ខខណ្ឌដែលចែងនៅក្នុងកិច្ចសន្យា៕
អត្ថបទ និងរូបភាព៖ លោក ធន់ ពូថេ
កែសម្រួល៖ លោក អ៊ុន ណារាជ្យ
