ថ្លែងក្នុងកិច្ចប្រជុំសាមញ្ញលើកទី៧ របស់ក្រុមប្រឹក្សាខេត្តសៀមរាប អាណត្តិទី៤ ដោយមានការចូលរួមពី លោក នាក់ ណេរ៉ុន អភិបាលរងខេត្ត រួមនឹងថ្នាក់ដឹកនាំខេត្ត និងមន្ត្រីរាជការក្នុងខេត្ត នៅថ្ងៃទី០៩ ខែធ្នូ ឆ្នាំ២០២៤នេះ ប្រធានក្រុមប្រឹក្សាខេត្ត ឯកឧត្តម លី សំរិទ្ធ បានជំរុញដល់មន្ត្រីជំនាញពាក់ព័ន្ធ និងអាជ្ញាធរមូលដ្ឋាន ត្រូវមានការទទួលខុសត្រូវក្នុងការការដោះស្រាយវិវាទទាំងឡាយដែលកើតមានក្នុងដែនសមត្ថកិច្ចរបស់ខ្លួន ដើម្បីកុំឱ្យមានភាពស្មុគស្មាញដល់ថ្នាក់លើ។
ឯកឧត្តម លី សំរិទ្ធ មានប្រសាសន៍ថា សម្រាប់កិច្ចប្រជុំនាពេលនេះ គឺដើម្បីធ្វើការត្រួតពិនិត្យ ពិភាក្សា និងធ្វើការកែសម្រួលខ្លឹមសារ និងអក្ខរាវិរុទ្ធ បានយ៉ាងល្អិតល្អន់បំផុត។ ក្នុងកិច្ចប្រជុំនេះដែរ សមាជិកសមាជិកាបានអនុម័តលើកំណត់ហេតុកិច្ចប្រជុំសាមញ្ញលើកទី៦ និងធ្វើការពិនិត្យ ពិភាក្សា និងការអនុម័តលើសេចក្តីព្រាងរបាយការណ៍ប្រចាំខែវិច្ឆិកា ឆ្នាំ២០២៤នៃការអនុវត្តរបស់រដ្ឋបាលខេត្ត។ សមាជិកនៃកិច្ចប្រជុំ ក៏បានលើកឡើងពីបញ្ហាការផ្តល់នូវបណ្ណសមធម៌ និងសូមឱ្យអាជ្ញាធរក្រុងស្រុក ពិនិត្យមើលករណីលើការចាក់ដីនៅដីចំណីផ្លូវមិនបានដាក់លូ ព្រមទាំងបញ្ហាករណីកុមាររស់នៅជាមួយម្តាយក្នុងពន្ធនាគារ និង បញ្ហាព្រះសង្ឃនិមន្តបិណ្ឌបាត្រនៅក្នុងផ្សារ និងធ្វើការរៃអង្គៀសបច្ច័យជាដើម។
ឆ្លងកាត់ការប្រជុំពិនិត្យ ពិភាក្សារួចមក ឯកឧត្តម លី សំរិទ្ធ បានធ្វើការក្រើនរំលឹកដល់សមាជិកសមាជិកាក្រុមប្រឹក្សាខេត្តទាំងអស់ ដែលជាតួអង្គនីតិបញ្ញត្តិ និង នីតិប្រតិបត្តិ ត្រូវគោរពឱ្យបាននូវរាល់ផែនការដែលបានលើកឡើងរបស់រដ្ឋបាលខេត្ត។ ជាមួយនោះ សូមឱ្យអាជ្ញាធរក្រុងស្រុក ត្រូវតែខិតខំយកចិត្តទុកដាក់ ក្នុងការអនុវត្តឱ្យបានខ្ជាប់ខ្ជួននូវរាល់ផែនការសកម្មភាព នៃយុទ្ធសាស្ត្របញ្ចកោណដំណាក់កាលទី១ របស់រាជរដ្ឋាភិបាលកម្ពុជា ដែលមានបាវចនាចំនួន៥ និង មានអាទិភាពគន្លឹះចំនួន៥ រួមមាន៖ មនុស្ស ផ្លូវ ទឹក ភ្លើង និងបច្ចេកវិទ្យា ដែលត្រូវបានឆ្លុះបញ្ចាំងជាចម្បង តាមរយៈបញ្ចកោណយុទ្ធសាស្ត្រ នៅក្នុងរចនាសម្ព័ន្ធនៃយុទ្ធសាស្ត្រទាំងមូល ក្នុងការបន្តអនុវត្តនូវកម្មវិធីកែទម្រង់សំខាន់ៗ លើគ្រប់វិស័យ ក្នុងគោលដៅបម្រើឧត្តមប្រយោជន៍ជាតិ និងឆ្លើយតបទៅនឹងសំណូមពរនិងសេចក្តីត្រូវការរបស់ប្រជាជន ក៏ដូចទិសដៅរបស់រដ្ឋបាលខេត្តផងដែរ៕
អត្ថបទ និងរូបភាព៖ រដ្ឋបាលខេត្តសៀមរាប
កែសម្រួល៖ លោក អ៊ុន ណារាជ្យ
