នៅព្រឹកថ្ងៃទី១០ ខែធ្នូ ឆ្នាំ២០២៤នេះ គណៈកម្មាធិការប្រយុទ្ធប្រឆាំងអំពើជួញដូរមនុស្សខេត្តសៀមរាប ហៅកាត់ថា គ.ខ.ប.ជ បានរៀបចំកិច្ចប្រជុំប្រចាំខែវិច្ឆិកា ឆ្នាំ២០២៤របស់ខ្លួន ដើម្បីធ្វើការពិនិត្យលើលទ្ធផលការងារដែលក្រុមការងារអនុវត្តបានកន្លងមក និងដាក់ចេញនូវផែនការបន្ត ក្រោមការដឹកនាំដោយ លោកស្រី ម៉ននី រង្សី អភិបាលរងខេត្ត និងជាអនុប្រធានអចិន្រ្តៃយ៍ គ.ជ.ខ.ជ ដោយមានការចូលរួមពីអ្នកពាក់ព័ន្ធជាច្រើនរូប។
យោងតាមរបាយការណ៍របស់ គ.ខ.ប.ជ សម្រាប់ខែវិច្ឆិកា ឆ្នាំ២០២៤នេះ មានករណីអំពើហិង្សាក្នុងគ្រួសារកើតឡើង ៦ករណី, ការរំលោភបំពានផ្លូវភេទ ៥ករណី។ ជាមួយនោះក្រុមការងារបានធ្វើការផ្សព្វផ្សាយលើកកម្ពស់ការយល់ដឹងអំពីច្បាប់ ស្ដីពីការបង្ក្រាបប្រយុទ្ធប្រឆាំងអំពើជួញដូរមនុស្ស អំពើធ្វើអាជីវកម្មផ្លូវភេទ និងច្បាប់ពាក់ព័ន្ធនានាតាមរយៈវិទ្យុ និងទូរទស្សន៍បានជាង ១.២០០លើក, ចែកខិតបណ្ណព័ត៌មានពីជំនាញបណ្ដុះបណ្ដាល់វិជ្ជាជីវៈ ការចំណាកស្រុក និងផលប៉ះពាល់គ្រឿងញៀនបានជិត ១ម៉ឺនបណ្ណ, ផលិតស្ពតអប់រំអំពីគ្រឿងញៀន និងការទប់ស្កាត់អំពើហិង្សាក្នុងគ្រួសារបានជាង ៧.៥០០លើក និងផ្សព្វផ្សាយច្បាប់ ស្ដីពីការបង្ក្រាបអំពើជួញដូរមនុស្ស និងអំពើធ្វើអាជីវកម្មផ្លូវភេទ ការធ្វើចំណាកស្រុក និងការរំលោភបំពាននានាបានជាង ១ម៉ឺនលើកផងដែរ។
មានប្រសាសន៍ក្នុងឱកាសនោះ លោកស្រី ម៉ននី រង្សី បានថ្លែងនូវការកោតសរសើរ និងវាយតម្លៃខ្ពស់ ចំពោះលទ្ធផលការងារដែលអនុវត្តបានកន្លងមក សម្រាប់ឆ្នាំ២០២៤នេះ ករណីមួយចំនួនធំមានការថយចុះគួរឱ្យកត់សម្គាល់ធៀបនឹងឆ្នាំ២០២៣ បើទោះបីករណីខ្លះមានការកើនឡើងក៏ដោយ។ លទ្ធផលនេះដែរ កើតឡើងបានដោយសារយើងមានកិច្ចសហការល្អជាមួយគ្រប់បណ្តាជំនាញ និងអ្នកពាក់ព័ន្ធ លើការបង្ការ បង្រ្កាប និងទប់ស្កាត់រាល់សកម្មភាពរបស់ជនល្មើស។
លោកស្រីសង្ឃឹមជឿជាក់ថា ឆ្លងកាត់អង្គប្រជុំនេះ ចំពោះចំណុចខ្វះខាតតិចតួចដែលយើងបានរកឃើញ ក្រុមការងារនឹងអនុវត្តបានដោយជោគជ័យ និងទទួលបានបទពិសោធល្អៗ យកទៅរៀបចំកិច្ចប្រជុំ និងអនុវត្តតាមផែនការ, តាមដាន និងត្រួតពិនិត្យឃ្លាំមើលជាប្រចាំរាល់បទល្មើសជួញដូរមនុស្ស ការធ្វើអាជីវកម្មផ្លូវភេទ អំពើហិង្សាទាក់ទងនឹងយេនឌ័រ ក្មេងទំនើង អ្នកប្រើប្រាស់គ្រឿងញៀនជាដើម។ ជាមួយនោះ សូមឱ្យក្រុមការងារពាក់ព័ន្ធ ត្រូវបង្កើនកិច្ចសហការគ្នា ក្នុងការពិគ្រោះពិភាក្សា ផ្លាស់ប្តូរយោបល់គ្នា ដើម្បីឱ្យក្លាយជាយន្តការមានលក្ខណៈប្រព័ន្ធ ប្រកបដោយសង្គតិភាព ដើម្បីឱ្យសម្រេចបានគោលដៅ ឆ្លើយតបទៅតាមផែនការសកម្មភាពនានាដែលបានដាក់ចេញ៕
អត្ថបទ និងរូបភាព៖ លោក ហេង វន្នី
កែសម្រួល៖ លោក អ៊ុន ណារាជ្យ
