នៅរសៀល ថ្ងៃទី៥ ខែធ្នូ ឆ្នាំ២០២៤ ឯកឧត្តម ឧត្តមសេនីយ៍ឯក ឆាយ គឹមខឿន អគ្គស្នងការរងនគរបាលជាតិ និងលោក ង៉ូវ សេងកាក់ អភិបាលរងខេត្តសៀមរាប។អញ្ជើញជាអធិបតី ពិធីបិទសន្និបាតបូកសរុបសភាពការណ៍ និងលទ្ធផលកិច្ចប្រតិបត្តិការ ឆ្នាំ២០២៤ និងដាក់ចេញទិសដៅការងារ ឆ្នាំ២០២៥ របស់ស្នងការដ្ឋាននគរបាលខេត្តសៀមរាប និងមានការអញ្ជើញចូលរួមពី ប្រតិភូអមដំណើរ នៃអគ្គស្នងការដ្ឋាននគរបាលជាតិ តំណាងប្រធានមន្ទីរ អង្គភាពពាក់ព័ន្ធ លោក-លោកស្រី ស្នងការ ស្នងការរង លោកនាយការិយាល័យទាំង៣៣ លោកអធិការនគរបាលក្រុង-ស្រុកទាំង១៣ លោកនាយប៉ុស្តិ៍នគរបាលរដ្ឋបាលទាំង១០០ និងលោកនាយប៉ុស្តិ៍ការពារទាំង៦ នៃការិយាល័យនគរបាលការពារបេតិកភណ្ឌផងដែរ ។
ព័ត៌មានជាតិ ថ្មីៗ
លោកឧត្តមសេនីយ៍ទោ ហួត សុធី ស្នងការនគរបាលខេត្ត បានរាយការណ៍ ជូនឯកឧត្តមគណៈអធិបតី និងអង្គពិធីទាំងមូល អំពីសភាពការណ៍ និងលទ្ធផលកិច្ចប្រតិបត្តិការ ឆ្នាំ២០២៤ ដោយពាក់ព័ន្ធនិងបទល្មើសមានការថយចុះ ហើយធ្វើការបង្ក្រាបបាន១០០% និងដាក់ចេញទិសដៅការងារ ឆ្នាំ២០២៥ របស់ស្នងការដ្ឋាននគរបាលខេត្តសៀមរាប ។
ឧត្ដមសេនីយ៍ទោ ហួត សុធី បន្តថាថ្វីត្បិតតែបែបនេះស្ថានភាពសន្តិសុខមានភាពល្អប្រសើរយ៉ាងនេះក្ដី ប៉ុន្តែក្នុងនាមស្នងការនគរបាលខេត្ត នៅតែបន្តអនុវត្តយុទ្ធសាស្ត្រនានាដែលរាជរដ្ឋាភិបាលដាក់ចេញ និងបានចាត់តាំងកងកម្លាំងការពារ ធានារាល់សន្តិសុខ សណ្ដាប់សាធារណៈ និងសុវត្តិភាពសង្គម បង្ការទប់ស្កាត់នូវរាល់បាតុភាពផ្សេងៗ ដែលអាចកើតឡើងជាយថាហេតុ ព្រមទាំងកសាងផែនការយុទ្ធសាស្ត្របន្ថែមទៀត ដើម្បីធានាការរក្សាបាននូវសន្តិសុខសុវត្ថិភាពក្នុងខេត្តបន្ថែមទៀត។
ជាមួយគ្នានេះដែរ លោក ង៉ូវ សេងកាក់ អភិបាលរងខេត្តសៀមរាប លើកឡើងថាស្នងការដ្ឋាននគរបាលខេត្តសៀមរាប បានការចូលរួមចំណែកយ៉ាងសកម្មជាមួយអាជ្ញាធរដែនដី សមត្ថកិច្ច គ្រប់ជាន់ថ្នាក់ ប្រជាពលរដ្ឋគ្រប់មជ្ឈដ្ឋាន ក្នុងការថែរក្សាសន្តិសុខ សុវត្ថិភាព សណ្ដាប់ធ្នាប់សាធារណៈ ជូនបងប្អូនប្រជាពលរដ្ឋ ភ្ញៀវទេសចរជាតិ-អន្តរជាតិ អ្នកបណ្តាក់ទុនវិនិយោគ លើវិស័យទេសចរណ៍ អ្នកសិក្សាស្រាវជ្រាវ គណៈប្រតិភូជាន់ខ្ពស់បណ្តាប្រទេសជាមិត្ត និងការប្រារព្ធពិធីបុណ្យខ្នាតជាតិ និងអន្តរជាតិ ពិធីបុណ្យខ្នាតអន្តរជាតិធំៗ ជាច្រើនក្នុងខេត្ត ប្រព្រឹត្តទៅប្រកបដោយជោគជ័យ ជាពិសេសថ្មីៗនេះមាន ទិវារត់ប្រណាំងអន្តរជាតិ ពាក់កណ្ដាលម៉ារ៉ាតុងអង្គរវត្ត លើកទី២៩ នៅមុខប្រាសាទអង្គរវត្ត និងកិច្ចប្រជុំកំពូលសៀមរាប-អង្គរ ស្តីពីពិភពលោកមួយដែលគ្មានមីន នៃអនុសញ្ញាអូតាវ៉ា ដែលអនុវត្ត និងគ្រប់គ្រងស្ថានភាពសន្តិសុខ សុវត្ថិភាព សណ្តាប់ធ្នាប់បានល្អប្រសើរ។
ក្នុងឱកាសនោះដែលឯកឧត្តម ឧត្តមសេនីយ៍ឯក ឆាយ គឹមខឿន អគ្គស្នងការរងនគរបាលជាតិ បានមានប្រសាសន៍លើកសរសើរ ដល់ស្នងការដ្ឋាននគរបាលខេត្តសៀមរាប ដែលបានខិតខំប្រឹងប្រែងក្នុងការថែរក្សាសន្តិសុខ សុវត្ថិភាព សណ្ដាប់ធ្នាប់សាធារណៈ ជូនបងប្អូនប្រជាពលរដ្ឋ បានយ៉ាងល្អប្រសើរនាពេលកន្លងមក និងវាយតំលៃ ចំពោះលទ្ធផលកិច្ចប្រតិបត្តិការ របស់ស្នងការដ្ឋាននគរបាលខេត្តសៀមរាប និងផ្តល់អនុសាសន៍ ណែនាំបន្ថែមទៀត ក្នុងកិច្ចការងារពាក់ព័ន្ធបទល្មើសព្រហ្មទណ្ឌ បទល្មើសគ្រឿងញៀន បទល្មើសជួញដូរមនុស្ស និងអាជីវកម្មផ្លូវភេទ បទល្មើសបច្ចេកវិទ្យា សកម្មភាពក្មេងទំនើង បទល្មើសល្បែងស៊ីសង បញ្ហាគ្រោះថ្នាក់ចរាចរណ៍ និងកិច្ចការងារសំខាន់ជាច្រើនទៀត៕
អត្ថបទ និងរូបភាព៖ លោក ធន់ ពូថេ
កែសម្រួល៖ លោក ហាំ ម៉េងហួត
