អធិការនគរបាលស្រុកពួក ខេត្តសៀមរាប អះអាងថា ការប្លន់នៅស្រុកពួកម្សិលមិញនេះ មានជនរងគ្រោះម្នាក់រងបួសចំក្បាល ខូចខាតរថយន្តបន្តិចបន្តួច និងពុំមានបាត់បង់ទ្រព្យរបស់ជនរងគ្រោះឡើយ ចំណែកឯជនសង្ស័យត្រូវសមត្ថកិច្ចប្រមាញ់ចាប់បានទាំងអស់។
នៅថ្ងៃទី១៥ ខែសីហា ឆ្នាំ២០១៨ បន្ទាប់ពីបង្ក្រាបជនសង្ស័យប្រដាប់អាវុធជនជាតិចិន ៣នាក់ ពាក់ព័ន្ធនឹងករណីប្លន់ នៅស្រុកពួក ខេត្តសៀមរាបរួចមក លោកវរសេនីយ៍ឯក ទេព ពុំសែន អធិការនគរបាលស្រុកពួក ខេត្តសៀមរាប បានឲ្យទូរទស្សន៍ជាតិខេត្តសៀមរាប ដឹងថា កាលពីវេលាម៉ោងប្រមាណ៧ល្ងាច ថ្ងៃទី១៤ ខែសីហា ឆ្នាំ២០១៨ ខណៈដែលក្រុមគ្រួសារជនរងគ្រោះឈ្មោះ តៅ សុភា ភេទស្រី អាយុ៤៤ឆ្នាំ មានទីលំនៅក្នុងភូមិអូរតាប្រាក់ ឃុំពួក ស្រុកពួក ខេត្តសៀមរាប បានធ្វើដំណើរត្រឡប់ពីប្រកបរបរ ប្តូរ និងវេរលុយ នៅឯក្រុងសៀមរាប ខេត្តសៀមរាប លុះមកដល់មុខផ្ទះឈ្មោះ តៅ សុភា បានចុះពីរថយន្ត ដើម្បីបើករបងផ្ទះ ស្រាប់តែជនសង្ស័យ ទាំងបីនាក់ បានពាក់ម៉ាសជិត ដើរចេញពីកម្ពតព្រៃផ្នែកខាងកើតអែបផ្លូវ សំដៅមកឡានគាត់ ភ្លាមនោះមានម្នាក់ស្ទុះមកវាយលើគាត់ ដោយវត្ថុរឹងចំក្បាល បណ្តាលឲ្យគាត់រងរបួស ហើយគាត់បានតដៃនឹងជនសង្ស័យវិញ ព្រមទាំងបានស្រែករកអ្នកជិតខាងជួយ ចំណែកជនសង្ស័យម្នាក់ទៀត បានវាយបំបែកកញ្ចក់ឡានបែកផ្នែកខាងស្តាំ បំណងរកទ្រព្យសម្បត្តិមានតម្លៃ។ ភ្លាមៗនោះ ជនសង្ស័យទាំងនោះ បានរត់គេចខ្លួនទៅទិសខាងកើតឆ្លងស្ទឹងបាត់ទៅ។
លោកអធិការបន្តថា ក្រោយទទួលបានសេចក្តីរាយការណ៍ កម្លាំងសមត្ថកិច្ចបានចុះដល់កន្លែងកើតហេតុ ត្រួតពិនិត្យឃើញឡានរបស់ជនរងគ្រោះមានបែកកញ្ចក់ខាងស្តាំ នៅដីជិតរបងផ្ទះជនរងគ្រោះឃើញមានវត្ថុតាង គ្រាប់កាំភ្លើង១គ្រាប់ , បង់កាំភ្លើង១ មាន៨គ្រាប់ ចំណែកឯនៅចំរ៉ាក់មាត់ស្ទឹងខាងកើត ដែលជនសង្ស័យរត់គេចខ្លួន សមត្ថកិច្ចឃើញមាន ដំបងទីបដែក១មូល ប្រវែង៧៩ស.ម។ ក្នុងការរុករកតាមចាប់ក្រុមជនសង្ស័យក្នុងមូលដ្ឋាននោះ សមត្ថកិច្ច បានឃើញមានគ្រាប់កាំភ្លើង១គ្រាប់ទៀត នៅផ្លូវបេតុងក្នុងភូមិប្រយុទ្ធ ឃុំពួក ស្រុកពួក ដែលស្ថិតនៅទិសខាងកើតកន្លែងកើតហេតុប្រហែល១៥០ម៉ែត្រ បន្ទាប់មកទៀតសមត្ថកិច្ច បានរកឃើញមានឡាន១គ្រឿង ម៉ាកស្តារិច សេរីឆ្នាំ២០០៤ ពណ៌ទឹកប្រាក់ គ្មានស្លាកលេខ ហើយក្នុងឡាននោះ មានដាក់ម៉ូតូ១គ្រឿង ម៉ាកហុងដាឌ្រីម ពណ៌ខ្មៅ គ្មានស្លាកលេខ សេរីឆ្នាំ២០១៦ ទុកចោលនៅមុខខ្លោងទ្វារសាលាបឋមសឹក្សាទៀបាញ់គំរូ ភូមិប្រយុទ្ធ ឃុំពួក ស្រុកពួក ដោយចាក់សោរជាប់។ លុះដល់ម៉ោង០៤ទៀបភ្លឺថ្ងៃទី១៥ខែសីហាឆ្នាំ២០១៨ ទើបកំលាំងសមត្ថកិច្ច ឃាត់បានជនសង្ស័យទាំង ៣នាក់នេះ។
លោកទេព ពុំសែន បញ្ជាក់ថា បន្ទាប់ពីចាប់ឃាត់ខ្លួន កម្លាំងនគរបាលស្រុកពួកបានសហការជាមួយកម្លាំងផែនអន្តោប្រវេសន៍ ការិល័យកណ្តាលព្រហ្មទណ្ឌនៃស្នងការដ្ឋាននគរបាលខេត្តសៀមរាប ដើម្បីបន្តនីតិវិធី ៕
អត្ថបទ និង រូបថត ៖ លោក ជា ស្រស់
កែសម្រួលអត្ថបទ ៖ លោក សេង ផល្លី
