អ្នកជំនាញកសិកម្ម ទទួលស្គាល់ដោយរដ្ឋាភិបាលចិន បង្ហាញពីបច្ចេកទេសដាំស្រូវថ្មី ដល់កសិករខ្មែរ នៅភូមិធម្មជាតិរុនតាឯក ឃុំរុនតាឯក ស្រុកបន្ទាយស្រី ខេត្តសៀមរាប ដើម្បីឲ្យប្រជាកសិករ ទទួលបានផលស្រូវច្រើន ខុសពីការធ្វើស្រែតាមទម្លាប់ធម្មតា ដែលអាចទទួលផលក្នុងមួយហិកតាពី៥តោន ទៅ៦តោន។
កាលពីថ្ងៃទី១៤ ខែសីហាឆ្នាំ២០១៨នេះ ប្រជាពលរដ្ឋជិត១០០នាក់ ដែលពួកគាត់ជាកសិករនៅភូមិធម្មជាតិរុនតាឯក បានទទួលបច្ចេកទេសថ្មី អំពីការស្ទូង និងថែទាំស្រូវ ដោយអ្នកជំនាញកសិកម្ម មកពីក្រុមហ៊ុនForword របស់ប្រទេសចិនលោក អ៊ឹង តុងអៀង អនុប្រធានគម្រោងអភិវឌ្ឍន៍ភូមិធម្មជាតិរុនតាឯក នៃអាជ្ញាធរជាតិអប្សរា បានអោយដឹងថា អ្នកជំនាញកសិកម្ម ដែលទទួលស្គាល់ដោយរដ្ឋាភិបាលចិននេះ បានទទួលការអនុញ្ញាត ពីអាជ្ញាធរជាតិអប្សរា លើការជ្រើសរើពូជ របៀបស្ទូងស្រូវ ការប្រើម៉ាស៊ីនស្ទូងស្រូវបែបទំនើប និងការថែទាំស្រូវតាមបច្ចេកទំនើប ដើម្បីឲ្យប្រជាកសិករ ទទួលបានទិន្នផលខ្ពស់។កសិករមួយរូបនៅភូមិធម្មជាតិរុនតាឯក ស្រុកបន្ទាយស្រី អ្នកស្រី សួត សាលី បាននិយាយថា អ្នកស្រីបានអោយដឹងថា អ្នកស្រីនឹងយកទៅអនុវត្ដតាមការបង្រៀនធ្វើស្រូវបច្ចេកទេសថ្មីពីជនជាតិចិននេះ ព្រោះការធ្វើស្រែដោយប្រើម៉ាស៊ីនបែបនេះ វាធ្វើឲ្យចំណេញពេលវេលា និងកំលាំងពលកម្ម។ អ្នកស្រីបានបន្ដថា ថ្វីត្បិតការធ្វើស្រែដោយគ្រឿងម៉ាស៊ីននេះងាយស្រួល ប៉ុន្ដែវាត្រូវការចំណាយដើមទន់ច្រើន ដូចជាទិញម៉ាស៊ីនស្ទូងជាដើម។
នេះជាលើកទីមួយហើយ ដែលក្រុមហ៊ុនចិនបង្រៀនវិធីសាស្ដ្រធ្វើស្រែតាមបច្ចេកទេសថ្មី នៅតំបន់ភូមិធម្មជាតិរុនតាឯកនេះ ហើយអ្នកជំនាញកសិកម្មប្រទេសចិន បានអះអាងថា ប្រសិនបើប្រជាកសិករអនុវត្ដតាមបច្ចេកទេសនេះត្រឹមត្រូវ ពួកគាត់នឹងទទួលផលស្រូវក្នុងមួយហិកតាពី៥តោន ទៅ៦តោន៕
អត្ថបទ និង រូបថត ៖ លោក គឿន វេត
កែសម្រួលអត្ថបទ ៖ លោក សេង ផល្លី
