ថ្លែងនៅក្នុងឱកាសដាំដើមក្រឡាញ់ចំនួន២៥ដើមនៅព្រំប្រទល់ស្រុកពួក និងស្រុកក្រឡាញ់នាព្រឹកថ្ងៃទី១១ ខែមករា ឆ្នាំ២០២៥ ឯកឧត្តម ជា ច័ន្ទបរិបូរណ៍ ប្រធានក្រុមការងាររាជរដ្ឋាភិបាលចុះមូលដ្ឋានស្រុកក្រឡាញ់ខេត្តសៀមរាប បានជំរុញលើកទឹកចិត្តដល់ថ្នាក់ដឹកនាំរដ្ឋបាលស្រុកក្រឡាញ់ និងអាជ្ញាធរមូលដ្ឋានទាំងអស់ឱ្យបន្តខិតខំបំពេញតួនាទីភារកិច្ចបម្រើសេវាជូនប្រជាពលរដ្ឋប្រកបដោយតម្លាភាព លឿនរហ័ស និងគណនេយ្យភាព ដោយឈរលើស្មារតីសាមគ្គីភាព និងសហការស្អិតរមួត ពោលគឺមានសាមគ្គី និងយុត្តិធម៌ ទើបការងារទទួលបានប្រសិទ្ឋភាពនិងប្រសិទ្ឋផល។
ឯកឧត្តម ក៏បានជំរុញតាមរយៈអាជ្ញាធរមូលដ្ឋានរួមគ្នាលើកទឹកចិត្ត ដល់ប្រជាពលរដ្ឋក្នុងមូលដ្ឋានសហគមន៍ បង្កើតឱកាសនាំចូលនូវនឹងកន្លែង នូវការដាំដំណាំបន្លែបង្ការ ក្បែរផ្ទះ និងចិញ្ចឹមសត្វដើម្បីផ្គត់ផ្គង់ជីវភាពប្រចាំថ្ងៃក្នុងគ្រួសារ និងឈានជាបណ្តើរៗនាំចេញទៅកាន់ទីផ្សារក្នុងមូលដ្ឋាន ឬទីផ្សារក្នុងស្រុក សំដៅពង្រឹងលំនឹងសេដ្ឋកិច្ចនិងជីវភាពគ្រួសារ។
ជាមួយគ្នានោះ ឯកឧត្តម ជា ច័ន្ទបរិបូរណ៍ បានណែនាំដល់រដ្ឋបាលស្រុក្រឡាញ់ត្រូវនាំគ្នាបំផុស និងជំរុញប្រជាពលរដ្ឋ និងអង្គភាពស្ថាប័នគ្រប់ផ្នែកគ្រប់វិស័យ ឱ្យនាំគ្នាដាំកូនឈើនៅតាមដងផ្លូវ ទីសាធារណៈ ទីអារាម សាលារៀន ជាពិសេសលើកទឹកចិត្តឱ្យមានការដាំឈើប្រភេទក្រឡាញ់នៅតាមព្រំប្រទល់ស្រុកជាប់នឹងស្រុកក្រឡាញ់ដើម្បីទុកជានិមិត្ត ឬតំណាងឈ្មោះនៃស្រុកក្រឡាញ់។
ព័ត៌មានជាតិ ថ្មីៗ
លោកសុខណារ៉េត អភិបាលស្រុកក្រឡាញ់ បានឱ្យដឹងថា៖សម្រាប់ឆ្នាំ២០២៥នេះ រដ្ឋបាលស្រុកនឹងស្នើសុំដល់អង្គភាពមន្ទីរពាក់ពន្ឋ័ផ្តល់នូវ កូនឈើចម្រុះដើម្បីយកមកដាំនៅតាមដងផ្លូវសំខាន់ៗក្នុងស្រុកដែលឆ្នាំនេះគ្រោងនឹងដាំឱ្យបាន២៥០០០ដើម ខណៈដែលឆ្នាំ២០២៣ និង២០២៤ដាំបានជាង១ម៉ឺនដើមគិតទាំងព្រៃលិចទឹកផងដែរ។
ក្នុងនាមក្រុមប្រឹក្សាស្រុក គណ:អភិបាលស្រុក លោក សុខ ណារ៉េត បានថ្លែងអំណរសាទរចំពោះឯកឧត្តម ជា ច័ន្ទបរិបូរណ៍ ត្រូវបានរាជរដ្ឋាភិបាលកម្ពុជាតែងតាំងជាឯកអគ្គរាជទូតវិសាមញ្ញ និងពេញសមត្ថភាពនៃព្រះរាជាណាចក្រកម្ពុជាប្រចាំសាធារណ:រដ្ឋប៊ុលហ្គារី ប្រទេសរ៉ូម៉ានី សាធារណរដ្ឋក្រិក និងសាធារណរដ្ឋស៊ីប។ លោក សុខ ណារ៉េត ក៏បានរម្លឹកនូវអនុស្សាវរីយ៍រយ:ពេលជាង១០ឆ្នាំកន្លង ក្នុងនាមជាប្រធានក្រុមការងាររាជរដ្ឋាភិបាលចុះជួយមូលដ្ឋានស្រុកក្រឡាញ់ ឯកឧត្តម ជា ច័ន្ទបរិបូរណ៍បានជួយសម្របសម្រួលនិងណែនាំឲ្យរដ្ឋបាលស្រុកអនុវត្តឲ្យបានល្អជាប្រចាំលើការផ្តល់សេវាសាធារណៈដែលជាតម្រូវការចាំបាច់របស់ប្រជាពលរដ្ឋ និងបានផ្តល់អនុសាសន៍និងយោបល់គន្លឹះល្អសម្រាប់រដ្ឋបាលស្រុកយកទៅអនុវត្តទទួលបានប្រសិទ្ឋផលល្អ៕
អត្ថបទ និងរូបភាព ៖ លោក យូ វង្ស
