នៅព្រឹកថ្ងៃទី១៣ ខែមករា ឆ្នាំ២០២៥នេះ រដ្ឋបាលខេត្ដសៀមរាប បានបើកកិច្ចប្រជុំវិសាមញ្ញក្រុមប្រឹក្សាខេត្តសៀមរាប អាណត្តិទី៤ ក្រោមអធិបតីឯកឧត្តម លី សំរិទ្ធ ប្រធានក្រុមប្រឹក្សាខេត្ត និងលោក សុខ ថុល អភិបាលរងខេត្ដ ដោយមានការចូលរួមពីថ្នាក់ដឹកនាំមន្ទីរអង្គភាពជុំវិញខេត្ដ ដោយកិច្ចប្រជុំនាពេលនេះដែរ គឺដើម្បីលើកយកនូវរបៀបវារៈមួយចំនួនមកធ្វើការពិនិត្យ ពិភាក្សា និងអនុម័ត។
ក្នុងឱកាសនោះ លោក សុខ ថុល អភិបាលរងខេត្ត បានធ្វើសេចក្តីរាយការណ៍អំពីសូចនាករ នៃគម្រោងផែនការក្នុងក្របខ័ណ្ឌអភិវឌ្ឍខេត្ត និងកម្មវិធីអភិវឌ្ឍមូលដ្ឋានរយៈពេល ៥ឆ្នាំ (២០២៥-២០២៩) របស់រដ្ឋបាលខេត្ត ក្នុងនោះសមាជិកក្រុមប្រឹក្សាខេត្ត បានពិនិត្យ ពិភាក្សាទៅលើចំណុចមួយចំនួន ដែលជាសូចនាករ នៃមន្ទីរអង្គភាព ដោយបានលើកផែនការក្នុងរយៈពេល៥ឆ្នាំ ដោយបានសូមឱ្យធ្វើការកែតម្រូវនូវខ្លឹមសារ អត្ថន័យ ក្នុងគម្រោងដើម្បីធ្វើការអនុម័ត។
ឯកឧត្តម លី សំរិទ្ធ ប្រធានក្រុមប្រឹក្សាខេត្ត បានធ្វើការណែនាំដល់ក្រុមការងារទាំង៥ ត្រូវប្រកាន់ភ្ជាប់ពីតួនាទី ភារកិច្ចរបស់ក្រុមនីមួយៗ សំដៅធ្វើការដោះស្រាយនូវរាល់ទុក្ខកង្វល់របស់ប្រជាពលរដ្ឋនៅតាមមូលដ្ឋាន ដោយត្រូវឈរលើស្មារតីអព្យាក្រិត្យ មិនលំអៀង មិនប្រកាន់និន្នាការនយោបាយ ឈរលើភាពយុត្តិធម៌។ ក្នុងការចុះមូលដ្ឋាននេះ ក្រុមការងារត្រូវគោរពឱ្យបាននូវក្រមសីលធម៌សមាជិកក្រុមប្រឹក្សារាជធានីខេត្ត ដែលបញ្ញត្តដោយសមាគមជាតិក្រុមប្រឹក្សារាជធានី ខេត្ត។
ឯកឧត្តមប្រធានក្រុមប្រឹក្សាខេត្ត ក៏បានបញ្ជាក់ថា ការចុះទៅតាមមូលដ្ឋានធ្វើទៅតាមប្រតិទិនរបស់ក្រុមប្រឹក្សាខេត្តដែលបានកំណត់។ ម៉្យាងទៀតក្នុងករណី មានការណែនាំពីប្រធានក្រុមប្រឹក្សាឱ្យចុះទៅមូលដ្ឋានណាមួយដោយមានការចាំបាច់ ក្រុមដែលពាក់ព័ន្ធត្រូវចុះទៅកាន់មូលដ្ឋាននោះ ដើម្បីបំពេញភារកិច្ចស្នូលរបស់ខ្លួន។ ការចុះមូលដ្ឋាននេះ ប្រជាពលរដ្ឋជាកម្មវត្ថុចម្បងនៃការចុះមូលដ្ឋានរបស់ក្រុមការងារក្រុមប្រឹក្សា ដោយមានសមាសភាពពាក់ព័ន្ធក្នុងមូលដ្ឋានចូលរួមផងដែរ។ ឯកឧត្ដម ក៏បានធ្វើការណែនាំនូវចំណុចមួយចំនួន ដែលជាគន្លឹះក្នុងការកសាងផែនការដល់បណ្តាមន្ទីរអង្គភាពសាមី ក្នុងការកែសម្រួលខ្លឹមសារ ពាក្យពេចន៍មួយចំនួន សំដៅលប់បំបាត់នូវវប្បធម៌អន្តរាគមន៍នៅក្នុងសង្គមផងដែរ ៕
អត្ថបទ និងរូបភាព៖ លោក ឈិត សាវី
កែសម្រួល៖ លោក អ៊ុន ណារាជ្យ
