ក្រុមនិស្សិតមកពីប្រទេសកូរ៉េខាងត្បូង ចំនួន៣៦នាក់ បានចុះធ្វើទស្សនកិច្ចសិក្សារយៈពេល១០ថ្ងៃ ចាប់ពីថ្ងៃទី០៦-១៥ ខែមករា ឆ្នាំ២០២៥ នៅខេត្តសៀមរាប ក្នុងគោលបំណងដើម្បីចង់សិក្សាស្វែងយល់អំពីការងារស្ម័គ្រចិត្ត កម្មវិធីអភិវឌ្ឍន៍សហគមន៍ និងការផ្លាស់ប្ដូរវប្បធម៌រវាងប្រទេសទាំង២ កម្ពុជា-កូរ៉េខាងត្បូង។
សាស្ត្រាចារ្យ Soon Cheol An ដែលជាអ្នកដឹកនាំក្រុមនិស្សិត បានឱ្យដឹងថា ក្រុមនិស្សិតទាំងអស់បានចូលរួមក្នុងកម្មវិធីស្ម័គ្រចិត្តសហគមន៍ជាច្រើនដូចជា៖ ការចែករំលែកបទពិសោធ និងការចូលរួមអភិវឌ្ឍសហគមន៍ក្នុងតំបន់មួយចំនួនក្នុងខេត្តសៀមរាប តាមរយៈការផ្ដល់សម្ភារៈសិក្សា និងកីឡាមួយចំនួនជូនសាលាបឋមសិក្សា និងសហគមន៍ក្រីក្រ ដើម្បីលើកកម្ពស់គុណភាពអប់រំ និងដើម្បីមកយកបទពិសោធ និងស្វែងយល់ពីគ្នាទៅវិញទៅមក ព្រមទាំងជួយបង្រៀនដល់សិស្សានុសិស្សនៅក្នុងសាលាបឋមសិក្សាពួក ក្នុងស្រុកពួក ខេត្តសៀមរាបផងដែរ។
តំណាងក្រុមនិស្សិត កញ្ញា សូ មីនសុន បានបង្ហាញថា រយៈពេលប៉ុន្មានថ្ងៃនេះ ពួកគាត់បានចុះជួយផ្តល់នូវចំណេះដឹង ចំណេះធ្វើ ឥរិយាបទ និងការចេះរួមរស់ជាមួយគ្នាក្នុងគោលបំណងជួយឱ្យកុមារទាំងអស់ បានចូលរៀនប្រកបដោយសុវតិ្ថភាព និងការការពារដល់កុមារឱ្យមានចំណេះដឹងក្នុងថ្ងៃអនាគត ហើយក៏បានលើកស្ទួយបញ្ហាយេនឌ័រ និងបង្កើតឱ្យមានការចូលរួមរបស់កុមារជាមួយសហគមន៍ និងសង្គមដែលកំពុងរស់នៅដោយមានការជួយគាំទ្រពីប្រព័ន្ធដែលទាក់ទងនឹងកុមារ។
លោក ឆេង ភាត់ នាយកសាលាបឋមសិក្សាពួក បានបង្ហាញការពេញចិត្ត ចំពោះវត្តមានក្រុមនិស្សិតនៃសាកលវិទ្យាល័យដាងគូក និងក្រុមការងារទាំងអស់ ដែលតែងតែចែករំលែកនូវក្ដីស្រឡាញ់ដល់សិស្សានុសិស្សកម្ពុជា ជាពិសេសបានផ្ដល់នូវសម្ភារៈ និងថវិកាជាដើម មកកាន់សាលាមួយនេះទាំងពេលមុន និងពេលនេះ ដែលការផ្ដល់ទាំងនេះ បានឆ្លើយតបនឹងតម្រូវការរបស់សិស្សានុសិស្ស លោកគ្រូអ្នកគ្រូ ជាពិសេសតម្រូវការនៃការអភិវឌ្ឍហេដ្ឋារចនាសម្ព័ន្ធសាលារៀនតែម្ដង។
លោក លីវ រុត មេឃុំពួក និងជាប្រធានគណៈកម្មការគ្រប់គ្រងសាលាបឋមសិក្សាពួក មានប្រសាសន៍ថា ទស្សនកិច្ចនេះមិនត្រឹមតែបង្កើនការយល់ដឹងអំពីសហគមន៍ និងការងារស្ម័គ្រចិត្តទេប៉ុណ្ណោះទេ ប៉ុន្តែវាក៏បានជួយពង្រឹងទំនាក់ទំនងវប្បធម៌ និងភាពស្របចិត្តរវាងប្រជាជនកម្ពុជា និងកូរ៉េខាងត្បូង។ រាល់សកម្មភាពទាំងអស់នេះ គឺដើម្បីចូលរួមចំណែកក្នុងការអភិវឌ្ឍ និងស្វែងយល់អំពីវប្បធម៌រវាងប្រទេសកម្ពុជា និងប្រទេសកូរ៉េខាងត្បូង ក្នុងនាមជាគ្រួសារមនុស្សជាតិតែមួយ ទោះបីជាមានសញ្ជាតិ និងជំនឿផ្សេងៗគ្នាក៏ដោយ ប្រយោជន៍គឺបង្កើតនូវសន្តិភាពជាសាកលនៅលើពិភពលោក។
សូមបញ្ជាក់ថា នេះជាលើកទី៣ហើយ ដែលក្រុមនិស្សិតនៃសាកលវិទ្យាល័យ ដាងគូក បានផ្តល់នូវការជួយគាំទ្រទ្រង់នូវបរិស្ថានសាលារៀន ដោយជួយសាងសងរបងថ្ម ព្រមទាំងគូសគំនូរ និងជួយឧបត្ថម្ភសម្ភារៈសិក្សាមួយចំនួនដូចជា សម្ភារៈសម្រាប់សិស្សសិក្សា សម្ភារៈកីឡា និងសម្ភារៈប្រើប្រាស់មួយចំនួនទៀតដល់សាលា និងសិស្សានុសិស្សផងដែរ៕
អត្ថបទ និងរូបភាព៖ លោក ហេង វន្នី
កែសម្រួល៖ លោក អ៊ុន ណារាជ្យ
