មន្ត្រីជាន់ខ្ពស់ក្រសួងការងារ និងបណ្តុះបណ្តាលវីជ្ជាជីវៈ បានលើកឡើងថា ការចេះជំនាញវិជ្ជាជីវៈយ៉ាងតិចមួយ គឺជាការផ្តល់ឱកាសឱ្យយុវជនមានការងារធ្វើ ប៉ុន្តែបើយុវជនចេះជំនាញកាន់តែច្រើន នោះពួកគាត់ក៏មានឱកាសច្រើននៅក្នុងការមានការងារធ្វើ ឬការបង្កើតមុខរបរផងដែរ។
ក្នុងឱកាសចុះបំពេញការងារនៅវិទ្យាស្ថានជាតិពហុបច្ចេកទេសអង្គរ ខេត្តសៀមរាប នាព្រឹកថ្ងៃទី១៦ ខែមករា ឆ្នាំ២០២៥នេះ លោកស្រី យឹម ពេជ្រម៉ាលីកា អគ្គនាយករង នៃអគ្គនាយកដ្ឋានអប់រំបណ្តុះបណ្តាលបច្ចេកទេស និងវិជ្ជាជីវៈ នៃក្រសួងការងារ បានឱ្យដឹងថា នៅក្នុងយុទ្ធសាស្ត្របញ្ចកោណដំណាក់កាលទី១ របស់រាជរដ្ឋាភិបាល ដែលដឹកនាំដោយសម្តេចធិបតី ហ៊ុន ម៉ាណែត នាយករដ្ឋមន្ត្រី សម្តេចបានដាក់ចេញនូវអភិក្រមដ៏សំខាន់មួយគឺ រៀនឱ្យចេះ រៀនឱ្យចប់ ឱ្យមានការងារធ្វើ។ ដូច្នេះដើម្បីគាំទ្រនូវអភិក្រមនេះ វិទ្យាស្ថានជាតិពហុបច្ចេកទេសអង្គរ បានបង្កើតកម្មវិធីសិក្សាជាច្រើន ដូចជាកម្មវិធីបណ្តុះបណ្តាលជំនាញវិជ្ជាជីវៈ និងបច្ចេកទេសដល់យុវជនមកពីគ្រួសារក្រីក្រ និងគ្រួសារងាយរងហានិភ័យ (C1) និងកម្មវិធីសិក្សាជំនាញសញ្ញាប័ត្រជាន់ខ្ពស់បច្ចេកទេសជាន់ខ្ពស់ ដែលការសិក្សានេះ វិទ្យាស្ថានមានអន្តេវាសិកដ្ឋានសម្រាប់សិស្សដែលមកពីទីឆ្ងាយស្នាក់នៅផងដែរ។
លោកស្រីបន្តថា កម្មវិធីសិក្សាជំនាញសញ្ញាប័ត្រជាន់ខ្ពស់ បច្ចេកទេសជាន់ខ្ពស់ សិស្សនិស្សិតក៏អាចទទួលបាននូវប្រាក់ឧបត្ថម្ភប្រចាំខែអំពីគម្រោងជំនាញសម្រាប់ការប្រកួតប្រជែង ហៅកាត់ថា S4C ផងដែរ។ ចំពោះការបណ្តុះបណ្តាលបច្ចេកទេសជំនាញវិជ្ជាជីវៈនេះ ជាមធ្យោបាយលឿនបំផុតមួយក្នុងការផ្តល់ជំនាញដល់សិស្សានុសិស្សដែលបានបញ្ចប់ថ្នាក់ចំណេះទូទៅ ឱ្យពួកគាត់មានជំនាញមួយពិតប្រាកដហើយងាយស្រួលក្នុងការស្វែងរកការងារធ្វើ។ លោកស្រីថា បើយើងនិយាយឱ្យខ្លីទៅ ជំនាញដូចជាលុយរបស់យើងមួយ បានន័យថាជាទ្រព្យមួយនៅក្នុងខ្លួនដែលមិនចេះបាត់បង់។
សូមជម្រាបថា សម្រាប់ឆ្នាំ២០២៤ វិទ្យាស្ថានជាតិបច្ចេកទេសអង្គរ បានធ្វើការបណ្តុះបណ្តាលជំនាញវិជ្ជាជីវៈ និងបច្ចេកទេស ដល់យុវជនមកពីគ្រួសារក្រីក្រ និងគ្រួសារងាយរងហានិភ័យ (C1) ដល់សិក្ខាកាមបានជាង ១.០០០នាក់ ខណៈនៅខែមករា ឆ្នាំ២០២៥នេះ វិទ្យាស្ថានក៏កំពុងធ្វើការបណ្តុះបណ្តាលយុវជនមកពីគ្រួសារក្រីក្រប្រមាណជា ១០០នាក់។ សម្រាប់ក្នុងឆ្នាំ២០២៥នេះដែរ វិទ្យាស្ថានក៏បានផ្តល់អាហារូបករណ៍ ១០០% ដល់សិស្សនិស្សិតប្រមាណជាង ២០០នាក់បន្ថែមទៀត សម្រាប់៣មុខជំនាញ ដូចជាវិស្វកម្មសំណង់ស៊ីវិល វិស្វកម្មអេឡិកត្រូនិក និងវិស្វកម្មមេកាត្រូនិក។ ក្រៅពីអាហារូបករណ៍ និស្សិតក៏អាចទទួលបានប្រាក់ឧបត្ថម្ភប្រចាំខែចំនួន៦០ដុល្លារ ពីគម្រោងជំនាញសម្រាប់ការប្រកួតប្រជែង ហៅកាត់ថា S4C ទៀតផង៕
អត្ថបទ និងរូបភាព៖ លោក ជា ស្រស់
កែសម្រួល៖ លោក អ៊ុន ណារាជ្យ
