រដ្ឋបាលខេត្តសៀមរាបបានបើកសន្និបាតបូកសរុបលទ្ធផលការងារប្រចាំឆ្នាំ២០២៤ និងលើកទិសដៅការងារឆ្នាំ២០២៥ ក្រោមអធិបតីភាព ឯកឧត្តម តោ គឹមស៊ាន សមាជិកក្រុមប្រឹក្សាខេត្ត តំណាងឯកឧត្តម លី សំរិទ្ឋ ប្រធានក្រុមប្រឹក្សាខេត្តសៀមរាប និងឯកឧត្តម ប្រាក់ សោភ័ណ អភិបាល នៃគណៈអភិបាលខេត្តសៀមរាប និងមានការចូលរួមពីមន្ដ្រីរាជការ អាជ្ញាធរពាក់ព័ន្ធថ្នាក់មូលដ្ឋាន កងកម្លាំងប្រដាប់អាវុធ និងដៃគូរអភិវឌ្ឍន៍ អង្គការសង្គមស៊ីវិល ប្រមាណ៦០០នាក់ ដែលធ្វើនៅថ្ងៃទី២០ ខែមករា ឆ្នាំ២០២៥នេះ នៅសណ្ឋាគារបាយ័នអេរ៉ា ដែលមានរយៈពេល២ថ្ងៃ។
ឯកឧត្ដម ប្រាក់ សោភ័ណ អភិបាលនៃគណៈអភិបាលខេត្តសៀមរាប បានមានប្រសាសន៍ថា រាជរដ្ឋាភិបាលកម្ពុជា ឆ្នាំ២០២៤ ក្រោមការដឹកនាំរបស់ សម្តេចមហាបវរធិបតី ហ៊ុន ម៉ាណែត នាយករដ្ឋមន្រ្តី នៃព្រះរាជាណាចក្រកម្ពុជា បានដាក់ចេញនូវយុទ្ធសាស្ត្របញ្ចកោណដំណាក់កាលទី១ ដោយផ្តោតសំខាន់លើបាវចនាប្រាំ ដើម្បីកំណើន ការងារ សមធម៌ ប្រសិទ្ធភាព ចីរភាព និងអាទិភាពគន្លឹះទាំង៥គឺ មនុស្ស ផ្លូវ ទឹក ភ្លើង និងបច្ចេកវិទ្យា ជារបៀបវារៈគោលនយោបាយសង្គម សេដ្ឋកិច្ច។ ក្នុងនាមក្រុមប្រឹក្សាខេត្ត ក៍ដូចជាអាជ្ញាធរគ្រប់លំដាប់ថ្នាក់ត្រូវអនុវត្ដឱ្យបានហ្មត់ចត់ នូវកម្មវិធីនយោបាយ របស់រាជរដ្ឋាភិបាល នីតិកាលទី៧ នៃរដ្ឋសភា ព្រមទាំងកម្មវិធីជាតិរបស់ក្រសួង-ស្ថាប័នពាក់ព័ន្ធ ដើម្បីអភិវឌ្ឍមូលដ្ឋានឱ្យសម្រេចបានលទ្ធផលល្អប្រសើរ។
ឯកឧត្តម អភិបាលខេត្ត បានបន្ថែមថា សន្និបាតបូកសរុបលទ្ធផលការងារប្រចាំឆ្នាំ២០២៤ និងលើកទិសដៅការងារឆ្នាំ២០២៥ របស់រដ្ឋបាលខេត្តសៀមរាប គឺជាយន្តការ ការងារសម្រាប់យើងធ្វើការរួមគ្នា ដើម្បីត្រួតពិនិត្យ វាយតម្លៃអំពីលទ្ធផលការងារ ដែលសម្រេចបាន និងដឹងអំពីបញ្ហាប្រឈមដែលនៅសេសសល់ សំដៅរួមគ្នាលើកបទពិសោធន៍ការងារកំណត់ជាទិសដៅអនុវត្តក្នុងឆ្នាំ២០២៥ ឱ្យកាន់តែមានប្រសិទ្ធភាពថែមទៀត។ ឯកឧត្ដមបន្ដថា ក្នុងឆ្នាំ២០២៥នេះ ត្រូវរៀបចំផែនការព្រឹត្តិការណ៍នានា និងសកម្មភាពអនុវត្តប្រកបដោយប្រសិទ្ធភាព តម្លាភាព និងឆ្លើយតបតាមតម្រូវការចាំបាច់ ដើម្បីជំរុញឱ្យវិស័យទេសចរណ៍ កសិកម្ម សេវាកម្ម និងសង្គមកិច្ច ជាពិសេសជំរុញការយកចិត្តទុកដាក់ខ្ពស់លើកិច្ចប្រតិបត្តិការ របស់តួអង្គពាក់ព័ន្ធក្នុងកិច្ចគាំទ្រ សម្របសម្រួលលើការងារសេវាសង្គម នៅក្នុងខេត្តសៀមរាបទាំងមូល ឱ្យមានសន្ទុះឡើង និងស័ក្ដិសិទ្ធភាពថែមទៀតផង។
ឯកឧត្ដមបន្ថែមថា ស្របពេលជាមួយនឹងសមិទ្ធផលជាច្រើន ដែលសម្រេចបាន រដ្ឋបាលខេត្ដ ក៏បានជួបប្រទះនូវបញ្ហាប្រឈមមួយចំនួន ដែលត្រូវត្រួតពិនិត្យ និងវាយតម្លៃ ដើម្បីមានមូលដ្ឋានជាក់លាក់ ក្នុងការរៀបចំផែនការយុទ្ធសាស្ដ្រថ្មីៗ សម្រាប់អនុវត្ដបន្ដឱ្យទទួលបាននូវជោគជ័យក្នុងឆ្នាំ២០២៥នេះ។
ឯកឧត្ដមក៍បានស្នើរឱ្យអ្នកចូលរួមសន្និបាត យកចិត្តទុកដាក់ស្ដាប់ និងប្ដេជ្ញាប្រើប្រាស់បទពិសោធន៍ កម្លាំងកាយចិត្ត ប្រាជ្ញា ស្មារតី ដើម្បីផ្តល់ធាតុចូលបន្ថែមលើបទអន្តរាគមន៍ របស់រដ្ឋបាលក្រុង ស្រុក ឃុំ សង្កាត់ មន្ទីរ អង្គភាព និងអ្នកពាក់ព័ន្ធនានា ដែលនឹងលើកមកបង្ហាញជូនអង្គសន្និបាតបន្ទាប់ពីស្ដាប់របាយការណ៍រួច៕
អត្ថបទ និងរូបភាព ៖លោក យូ វង្ស និងលោក ឈិត សាវី
កែសម្រួលអត្ថបទ ៖ លោក ហាំ ម៉េងហួត
