ពិធីប្រកាសជ័យលាភីការនៃប្រកួត នៅល្ងាចថ្ងៃទី១៩ ខែមករា ឆ្នាំ២០២៥ កម្មវិធីសរសេរតាមអានជាសាធារណ«សំណេរអង្គរ» លើកទី២ បានរកឃើញម្ចាស់ជ័យលាភីទាំង៦រូបហើយ ដោយជ័យលាភីលេខ១ អាយុលើ១៩ឆ្នាំបានទៅលើបេក្ខជនមកពីខេត្តសៀមរាប និងលេខ១ក្រោមអាយុ១៨ឆ្នាំបានទៅលើបេក្ខនារីមកពីខេត្តកណ្តាល។
ម្ចាស់ជ័យលាភីទាំង៦រូបនៃកម្មវិធី «សំណេរអង្គរ» លើកទី២ ឆ្នាំ២០២៥ អាយុក្រោម១៨ឆ្នាំលេខ១គឺបេក្ខនារី រ៉េន វត្ថនា មកពីខេត្តកណ្ដាល។ លេខ២បានទៅលើបេក្ខជន កឿន ពុទ្ធិរតន៍ មកពីខេត្តព្រៃវែង។ លេខ៣បានទៅលើបេក្ខជន ណែត ស៊ីដា មកពីខេត្តសៀមរាប។
ចំណែកបេក្ខជនអាយុលើ១៩ឆ្នាំ លេខ១បានទៅលើបេក្ខជន ជា សាវី មកពីខេត្តសៀមរាប។ លេខ២បានទៅលើបេក្ខជន យ៉ុន បញ្ញា មកពីខេត្តបាត់ដំបង។ លេខ៣បានទៅលើបេក្ខនារីជាប់យុយ ស្រីណុច មកពីខេត្តបន្ទាយមានជ័យ។
ថ្លែងនៅក្នុងពិធីបិទកម្មវិធីសំណេរអង្គរ លើកទី២ ឯកឧត្តម ណាត ប៊ុនរឿន រដ្ឋលេខាធិការក្រសួងអប់រំយុវជន និងកីឡា បានមានប្រសាសន៍ថា ឯកឧត្តម សូមគាំទ្រនូវការរៀបចំឱ្យមានព្រឹត្តិការណ៍សំណេរអង្គរព្រោះជាព្រឹត្តិការណ៍ដែលប្រកបដោយអត្ថន័យ។
មិនតែប៉ុណ្ណោះ ឯកឧត្តម ណាត ប៊ុនរឿន ក៏បានលើកទឹកចិត្តដល់បេក្ខជនឱ្យបន្តចូលរួមគាំទ្រ និងអញ្ជើញមកចូលរួមក្នុងកម្មវិធីសំណេរអង្គរឱ្យកាន់តែច្រើនឡើងថែមទៀតដើម្បីបង្ហាញពីស្មារតីស្រឡាញ់អរិយធម៌ វប្បធម៌ និងអក្សរសាស្ត្រជាតិ។
សូមរម្លឹកជូនដែរថា ម្ចាស់ជ័យលាភីលេខ១នៅក្នុងកម្មវិធីសំណេរអង្គរ លើកទី១ ឆ្នាំ២០២៤ បានទៅលើបេក្ខជន ចេង រតនា ដែលបេក្ខជនរូបនេះសរសេរខុសតែ២ពាក្យប៉ុណ្ណោះ។
ជ័យលាភីលេខ២គឺបេក្ខជន វ៉ន រីដា សរសេរខុស៣ពាក្យ និងជ័យលាភីលេខ៣ បេក្ខនារី យ៉ោប សុឃាក់ សរសេរខុស៣ពាក្យក្នុងចំណោមអ្នកចូលរួមជាង៧០០នាក់។
ដោយឡែក ជ័យលាភីអក្សរស្អាតជាងគេឆ្នាំ២០២៤ បានទៅលើមគ្គទេសក៍ប្រចាំតំបន់អង្គរ ពារ គឹមធន់ ជ័យលាភីលេខ២បានទៅលើបេក្ខនារី បួង ស្រីលីស និងលេខ៣បានទៅលើបេក្ខនារី យុត សុម៉ាលី។
សូមជម្រាបជូនថា វិញ្ញាសាសរសេរតាមអានសំណេរអង្គរ លើកទី២ នៅឆ្នាំនេះគឺ «សៀមរាប-អង្គរ គឺជារតនសម្បត្តិសេដ្ឋកិច្ចវប្បធម៌» ដែលអានដោយឯកឧត្តម ហង់ជួន ណារ៉ុន ឧបនាយករដ្ឋមន្ត្រី រដ្ឋមន្ត្រីក្រសួងអប់រំ យុវជន និងកីឡា៕
អត្ថបទ៖លោក ជាស្រស់ និងលោក បូ សាវី
កែសម្រួល៖លោកស្រី សូ ស៊ីមាន
