នៅចុងសប្តាហ៍ថ្មីៗនេះ ឯកឧត្តម ឃុន សាវឿន រដ្ឋលេខាធិការក្រសួងកសិកម្ម រុក្ខាប្រមាញ់ និង នេសាទ និងលោក ទា គឹមសុទ្ធ ប្រធានមន្ទីរ កសិកម្ម រុក្ខាប្រមាញ់ និង នេសាទខេត្តសៀមរាបព្រមទាំងសហការីបាន ចុះពិនិត្យមើលការប្រមូលផលស្រូវសែនក្រអូប០១ របស់ប្រជាកសិករ នៅភូមិគោកពោធិ៍ ឃុំកែវពណ៌ ស្រុកពួក ដោយមានការចូលរួមពីលោក ស៊ិន ចាន់ថុល អភិបាលស្រុកពួក និងក្រុមការងាររដ្ឋបាលស្រុក អាជ្ញាធរភូមិ ឃុំ មន្ត្រីកសិកម្មឃុំ និងប្រជាកសិករសរុបចំនួន ២៥នាក់។
ក្នុងជំនួបពិភាក្សាជាមួយកសិករ ឯកឧត្តម ឃុន សាវឿន បានពន្យល់ពីសារៈប្រយោជន៍នៃការប្រើពូជស្រូវជាតិយើង ដូចជាពូជសែនក្រអូប០១ ដែលតម្លៃមានស្ថេរភាពជាងពូជស្រូវនាំចូល និងសារៈប្រយោជន៍នៃការចូលរួមចងក្រងជាសហគមន៍កសិកម្មទំនើប ព្រោះការចងក្រងគ្នាជាសហគមន៍កសិកម្មទំនើប គឺប្រមូលផ្ដុំកម្លាំងផលិតទាំងបរិមាណ និងគុណភាពដែលអាចកាត់បន្ថយថ្លៃផលិត ហើយភ្ជាប់ទៅកាន់ទីផ្សារតាមយន្តការផលិតកម្មកសិកម្មតាមកិច្ចសន្យា។
លោក ទា គឹមសុទ្ឋ ប្រធានមន្ទីរកសិកម្មខេត្ត ក៏បានជំរុញលើកទឹកចិត្តដល់កសិករ គួរពិចារណាងាកមកប្រើប្រាស់ពូជក្នុងស្រុករបស់យើងឱ្យបានច្រើន ទើបប្រសើរ ។
កសិករអឿន ល័ក្ខ នៅភូមិគោកពោធិ៍ ឃុំកែវពណ៌ ស្រុកពួកអះអាងយ៉ាងមុតមាំថា លោកបានប្រើពូជស្រូវស្រាលសែនក្រអូប០១ ជាពូជមិនប្រកាន់រដូវ ក្នុងមួយឆ្នាំធ្វើបានពីរដង។ ប្រើពូជនេះរយៈពេល៦ឆ្នាំមកហើយលើផ្ទៃដីជាង៧ហិកតា។ លោក ល័ក្ខ លើកឡើងថា បានជាលោកប្រើពូជសែនក្រអូបនេះព្រោះលក់បានថ្លៃ មានទីផ្សារល្អ តម្លៃមានស្ថេរភាព និងជាពូជរបស់ខ្មែរយើង ហេតុនេះលោកនៅតែបន្តប្រើពូជនេះនិងចង់ឱ្យបងប្អូនកសិករជិតខាងប្រើពូជនេះទំាងអស់គ្នា។
កសិករម្នាក់កំពុងធ្វើស្រែនៅភូមិស្វាយចន្ទរ ឃុំព្រៃជ្រូក ស្រុកពួក ធ្លាប់បានប្រើពូជផ្សេងៗលើដីស្រែប្រមាណជា៨០ហិកតា តែពេលនេះគាត់បានសម្រេចចិត្តងាកមកប្រើពូជស្រូវសែនក្រអូប និងពូជជាតិមួយចំនួនទៀតព្រោះពិនិត្យឃើញថាពូជសែនក្រអូបមានតម្លៃខ្ពស់ និងតម្លៃមានស្ថេរភាពជាង។
ក្រោយពីបានស្តាប់អនុសាសន៍ណែនាំមក ប្រជាកសិករមានចំណាប់អារម្មណ៍ខ្ពស់ និងសន្យាងាកមកធ្វើពូជក្នុងស្រុកតាមលទ្ធភាព និងស្ម័គ្រចិត្តចូលរួមបង្កើតជាសហគមន៍កសិកម្មទំនើបនៅពេលខាងមុខ។
ឯកឧត្តមក៏បានសាកសួរពីការជួលដីធ្វើស្រែរបស់កសិករ ប៉ុន្តែនៅតំបន់នោះមិនមានបញ្ហានេះទេ។ ជាមួយគ្នានេះ ឯកឧត្តម ឃុន សាវឿន និងក្រុមការងារបានបន្តដំណើរស្វែងយល់ពីការលក់ធាតុចូលកសិកម្ម នៅដេប៉ូ ឈួន វណ្ណឆៃ ស្ថិតនៅទីរួមស្រុកពួក។ ម្ចាស់ដេប៉ូបានលើកឡើងថា ការឡើងចុះតម្លៃកសិផលជាបញ្ហាធម្មតារបស់ទីផ្សារ ហើយការលក់ដូររបស់ពួកគាត់នៅដំណើរការដូចធម្មតាទោះកសិករប្តូរពូជមកប្រើពូជជាតិដូចជាសែនក្រអូប០១ក៏ដោយ។
អត្ថបទ៖លោក យូ វង្ស
កែសម្រួល៖លោកស្រី សូ ស៊ីមាន
